សៀមរាប ៖ សមត្ថកិច្ចបានឲ្យដឹងថា ជនសង្ស័យមួយក្រុមបានធ្វើសកម្មភាពជិះរថយន្តលុចស៊ី១គ្រឿង ចូលទៅគាស់ផ្ទះប្តូរប្រាក់ វីង លុយបានមួយចំនួនរួចគេចខ្លួនបាត់។ ករណីនេះសមត្ថកិច្ចកំពុងស្រាវជ្រាវដើម្បីកំណត់មុខសញ្ញាជនសង្ស័យ។
ហេតុការណ៍នេះកើតឡើងនៅម៉ោងប្រមាណជិត០៥ ព្រឹក ឈានចូលថ្ងៃទី២២ ខែមេសា ឆ្នាំ២០១៩ មុខផ្សារដើមក្រឡាញ់ ស្ថិតក្នុងភូមិទក្សិណត្បូង សង្កាត់គោកចក ក្រុង-ខេត្តសៀមរាប។
សមត្ថកិច្ចបន្តថា ករណីអំពើលួច មានស្ថានទម្ងន់ទោស នេះ គឺជនសង្ស័យបានគាស់ទម្លុះទម្លាយ ដែលបង្កឡើងដោយជន(សង្ស័យ មិនស្គាល់អត្តសញ្ញាណ )ជិះរថយន្ត ០១គ្រឿង ម៉ាកលុចស៊ីស Luxus RX 300 ពណ៌ស្ករ គ្មានស្លាកលេខ ធ្វើសកម្មភាពយក កន្ត្រៃកាត់ដែក និង ដែកត្បែង កាត់សោ នៅហាងលក់ទូរស័ព្ទ យីហោ ម៉ូឌែលហ្វូន មានទូរតាំងអីវ៉ាន់ ដាក់វីង(wing)ស្ថិតក្នុងភូមិទក្សិណត្បូង សង្កាត់គោកចក ក្រុង-ខេត្តសៀមរាប។ សមត្ថកិច្ចបន្តថា ជនរងគ្រោះមានឈ្មោះ លឹម អូន ភេទប្រុស អាយុ ២៨ឆ្នាំ គឺដោយពេលយប់ជនរងគ្រោះ បានចាក់សោហាង ហើយទៅសំរាកនៅផ្ទះ លុះពេលព្រឹកមកបើកតូបទើបដឹងឆោឡោ បង្កការភ្ញាក់ផ្អើលហើយប្តឹងទៅសមត្ថកិច្ច ដើម្បីមកពិនិត្យ។ សកម្មភាពនេះជនសង្ស័យ បានចូលលួចយក ទូដែក ចំនួន១ រុញដាក់ចូល ក្នុងឡាន ហើយជិះគេចខ្លួនបាត់។ តាមការបំភ្លឺរបស់ម្ចាស់ផ្ទះឲ្យដឹងថា ក្នុងទូដែកនោះ មាន៖ ទូរស័ព្ទដៃ ១គ្រឿង មាក oppo F5 ពណ៌ខ្មៅ គ្មានស៊ីម ម៉ាស៊ីនវេលុយ wing ចំនួន ០៣គ្រឿង ប្រាក់ខ្មែរចំនួន ១៩ម៉ឺនរៀល អត្តសញ្ញាណប័ណ្ណសញ្ជាតិខ្មែរ ចំនួន១ និងឯកសារជួលផ្ទះ មួយចំនួន។ ទោះជាយ៉ាងណាក៏ដោយសមត្ថកិច្ចមិនទាន់កំណត់មុខសញ្ញាជនសង្ស័យបាននៅឡើយទេ។ វត្ថុតាងបន្សល់ទុកកន្ត្រៃកាត់ដែក១ ដែកត្បែង ១។ ប្រជាពលរដ្ឋនៅក្រុងសៀមរាបមានការព្រួយបារម្ភយ៉ាងខ្លាំង ករណីចោរគាស់ផ្ទះ ដែលជនល្មើសជិះសុទ្ធតែឡានទំនើបបែបនេះ ហើយសមត្ថកិច្ចថា មិនស្គាល់អត្តសញ្ញាណ ដែលបច្ចុប្បន្នសកម្មភាពចោរគាស់ផ្ទះកើនឡើង។
ករណីនេះដែរ នគរបាលជាន់ខ្ពស់នៃស្នងការដ្ឋានខេត្តសៀមរាប បានអះអាងថា ពិតជាកើតឡើងមែន ហើយកម្លាំងនគរបាលជំនាញកំពុងស្រាវជ្រាវយ៉ាងយកចិត្តទុកដាក់៕
Source: Kampuchea Thmey Daily
0 Comments