ប៉ូលិសបាននិយាយកាលពីថ្ងៃពុធថា ការតាមប្រមាញ់របស់ប្រទេសស្រីលង្កាសម្រាប់អ្នកដែលទទួលខុសត្រូវចំពោះការបំផ្ទុះគ្រាប់បែកដែលបានសម្លាប់មនុស្សជាង៣៥០នាក់គឺបានរកឃើញជនសង្ស័យចំនួន១៨នាក់បន្ថែមទៀតស្របពេលមានសម្ពាធកាន់តែខ្លាំងទៅលើអ្នកនយោបាយឲ្យពន្យល់ពីមូលហេតុដែលគ្មាននរណាម្នាក់ធ្វើសកម្មភាពតាមការព្រមានជាសម្ងាត់។
រដ្ឋាភិបាលបានប្រកាសថានឹងមានការបណ្តេញចេញនៅក្នុងកងកម្លាំងសន្តិសុខនិងមេដឹកនាំប៉ូលិសបន្ទាប់ពីការវាយប្រហារកាលពីថ្ងៃអាទិត្យលើព្រះវិហារនិងសណ្ឋាគារប្រណីតខណៈពេលដែលចំនួនអ្នកស្លាប់ក្នុងការបំផ្ទុះគ្រាប់បែកបានកើនឡើងដល់៣៥៩នាក់។
ក្រុមអាជ្ញាធរបានធ្វើការស៊ើបអង្កេតជាបន្ទាន់ចំពោះការអះអាងរបស់ក្រុមរដ្ឋឥស្លាមដែលថាខ្លួនបានបើកការវាយប្រហារសម្រាប់អ្វីដែលជាការវាយប្រហារសកម្មប្រយុទ្ធដ៏អាក្រក់បំផុតលើជនស៊ីវិលនៅអាស៊ី។អ្នកនាំពាក្យប៉ូលិសលោក Ruwan Gunasekera បាននិយាយថា ការចាប់ខ្លួនថ្មីនេះត្រូវបានធ្វើឡើងនៅក្នុងការវាយឆ្មក់ពេលយប់ដោយប្រើប្រាស់អំណាចគ្រាអាសន្នដែលត្រូវបានណែនាំចាប់តាំងពីការវាយប្រហារ។
លោក Gunasekera បានថ្លែងថា “ផ្អែកតាមព័ត៌មាន យើងបានឆ្មក់ចូលក្នុងទីតាំងបីកន្លែងនិងចាប់បានជនសង្ស័យចំនួន១៧នាក់។ ជនសង្ស័យម្នាក់ទៀតត្រូវបានចាប់ខ្លួននៅទីតាំងទី៤”។លោកនាយករដ្ឋមន្ត្រី Ranil Wickremesinghe បាននិយាយកាលពីថ្ងៃអង្គារថា ប៉ូលិសកំពុងស្វែងរកជនសង្ស័យប្រដាប់អាវុធបន្ថែមទៀតហើយថាការវាយប្រហារបន្ថែមទៀតអាចកើតមានឡើង។ លោកបាននិយាយថា “យើងកំពុងព្យាយាមចាប់ខ្លួនពួកគេ”។
ប៉ូលិសបានប្រកាសពីការចាប់ខ្លួនមនុស្ស៥៨នាក់ចាប់តាំងពីការបំផ្ទុះគ្រាប់បែកលើព្រះវិហារបីកន្លែងនិងសណ្ឋាគារបីកន្លែង។ ការវាយប្រហារមួយនៅសណ្ឋាគារទី៤គឺត្រូវបរាជ័យ។ស្របពេលមានការតាមប្រមាញ់ជនសង្ស័យ ក្រុមរដ្ឋឥស្លាមបានប្រកាសទទួលខុសត្រូវចំពោះការវាយប្រហារនេះហើយបានបញ្ចេញរូបភាពនិងវីដេអូរបស់បុរសដែលខ្លួននិយាយថា បានចូលរួមឬរៀបចំការវាយប្រហារ។
ទោះបីជាយ៉ាងណាក៏ដោយ រដ្ឋាភិបាលបានស្ដីបន្ទោសក្រុមឥស្លាមនិយមក្នុងស្រុកមួយឈ្មោះថា Thawheeth Jama'ath (NTJ) ហើយបាននិយាយថា ពួកគេកំពុងស៊ើបអង្កេតថាតើអ្នកបំផ្ទុះគ្រាប់បែកមានជំនួយពីបរទេសដែរឬក៏អត់។លោក Wickremesinghe បាននិយាយថា សេវាសន្តិសុខជឿជាក់ថា មានតំណភ្ជាប់បរទេសហើយមានភស្តុតាងមួយចំនួនបានគាំទ្រការអះអាងបែបនេះ៕ AFP
Source: Kampuchea Thmey Daily
0 Comments