មនុស្ស​ជាង​៥០​នាក់​អាច​ស្លាប់​ ដោយសារ​ការបាក់​ដី​នៅ​អណ្ដូងរ៉ែ​ត្បូង​មី​យ៉ាន់​ម៉ា

ប៉ូលិស​ក្នុងស្រុក​បាន​និយាយ​កាលពី​ថ្ងៃ​អង្គា​រថា មនុស្ស​ជាង​៥០​នាក់​ត្រូវបាន​គេ​ព្រួយបារម្ភ​ថា​ស្លាប់​បន្ទាប់ពី​ការបាក់​ដី​មួយ​នៅ​ភាគ​ខាងជើង​ប្រទេស​មី​យ៉ាន់​ម៉ា​បាន​លេប​ត្របាក់​អ្នក​ជីក​រ៉ែ​ត្បូង​ខណៈពេល​ពួកគេ​កំពុង​ដេកលក់​។​នេះ​ជា​គ្រោះថ្នាក់​សម្លាប់​មនុស្ស​ចុងក្រោយ​បំផុត​នៅក្នុង​ឧស្សាហកម្ម​ដ៏​គ្រោះថ្នាក់​មួយ​។

មនុស្ស​រាប់សិប​នាក់​បាន​ស្លាប់​ជា​រៀងរាល់ឆ្នាំ​ដោយសារ​ការបាក់​ដី​ដែល​បណ្តាលមកពី​ការជីក​រក​រ៉ែ​ត្បូង ដែលជា​ឧស្សាហកម្ម​មានការ​គ្រប់គ្រង​មិនល្អ​ហើយ​ពោរពេញ​ទៅដោយ​អំពើពុករលួយ​។​ ​ប៉ូលិស​ក្នុង​តំបន់​បាន​និយាយថា គ្រោះថ្នាក់​នៅ​រដ្ឋ Kachin កាលពី​យប់​ថ្ងៃ​ចន្ទ​មួយ​នេះ​គឺ​ធំ​ខ្លាំងណាស់​ដែល​វា​បាន​បង្កើត​ទៅជា “​បឹង​ភក់​” ដ៏​ធំ​មួយ​ដែល​កប់​កម្មករ​អណ្តូងរ៉ែ​ក៏ដូចជា​រថយន្ត​ប្រមាណ​៤០​គ្រឿង​ផងដែរ​។
​
​មន្ត្រី​ទទួលបន្ទុក​មកពី​ប៉ុស្តិ៍​ប៉ូលិស​ក្រុង Hpakant បាន​ប្រាប់ AFP ថា “​មនុស្ស​ចំនួន​៥៤​នាក់​បាន​បាត់​ខ្លួន​នៅក្នុង​ភក់​។ គ្មាន​ផ្លូវ​ដែល​អ្នក​បាត់​ខ្លួន​អាច​នៅរស់​នោះទេ​”​។មកទល់ពេលនេះ មានតែ​សាកសព​ចំនួន​២​ប៉ុណ្ណោះ​ដែល​ត្រូវបាន​គេ​រកឃើញ​។ក្រសួង​ព័ត៌មាន​បានបញ្ជាក់​ពី​គ្រោះថ្នាក់​នេះ​និង​ចំនួន​អ្នក​បាត់​ខ្លួន​ហើយ​បាន​បន្ថែមថា ទីតាំង​នេះ​ត្រូវបាន​រុករក​រ៉ែ​ដោយ​ក្រុមហ៊ុន Myanmar Thura Gems និង Shwe Nagar Koe Kaung​។
​
​នាយក​ក្រុមហ៊ុន Myanmar Thura Gems លោក Hla Soe Oo បាន​ប្រាប់ AFP តាម​ទូរស័ព្ទ​ថា លោក​កំពុង​ធ្វើដំណើរ​ទៅ​តំបន់​នោះ​ហើយ​មិន​មាន​ព័ត៌មាន​លម្អិត​បន្ថែម​ទៀត​ទេ​។អណ្តូងរ៉ែ​ត្បូង​បើកចំហ​នៅ​ទីប្រជុំជន Hpakant របស់​រដ្ឋ Kachin បានប្រែក្លាយ​តំបន់​ដាច់ស្រយាល​មួយ​នេះ​ទៅជា​ដី​ដែលមាន​រាង​ដូច​ឋាន​ព្រះ​ចន្ទ​។

ការបាក់​ដី​នៅក្នុង​តំបន់​នេះ​គឺជា​រឿង​ធម្មតា​ហើយ​ជនរងគ្រោះ​ជា​ញឹកញាប់​គឺ​មកពី​សហគមន៍​ជនជាតិភាគតិច​ក្រីក្រ​ដែល​កំពុង​ស្វែងរក​សំណល់​ដែល​បន្សល់ទុក​ដោយ​ក្រុមហ៊ុន​ធំៗ​។ ​ការ​បាក់​ដី​ដ៏​ធំ​មួយ​នៅក្នុង​ខែវិច្ឆិកា​ឆ្នាំ​២០១៥​បាន​បណ្ដាល​ឲ្យ​មនុស្ស​ជាង​១០០​នាក់​ស្លាប់​។​កាលពី​ខែកក្កដា​ឆ្នាំមុន សាកសព​នៃ​ជនរងគ្រោះ​ដោយ​បំណាក់​ដី​ចំនួន​២៣​នាក់​ត្រូវបាន​គេ​រកឃើញ​បន្ទាប់ពី​ការស្វែងរក​រយៈពេល​ច្រើន​ថ្ងៃ​៕ AFP


​
​

Source: Kampuchea Thmey Daily