សៀមរាប ៖ សមត្ថកិច្ចបានឲ្យដឹងថា ដោយសារទំនាស់ដីធ្លីបន្តិចបន្តួច ប្អូនប្រុសបានដាច់ចិត្តកាប់ទៅលើបងស្រីរបស់ខ្លួនរហូតស្លាប់យ៉ាងអាណោចអាធ័មនៅនឹងកន្លែងចំនួន២នាក់។ រួចត្រូវនគរបាលឃាត់ខ្លួនបានជាក់ស្តែងតែម្តង។
ហេតុការណ៍នេះកើតឡើងវេលាម៉ោង១៧និង៣០នាទី នៅថ្ងៃទី២០ ខែមេសា ឆ្នាំ២០១៩ ភូមិដំរីកូន ឃុំពពេល ស្រុកសូទ្រនិគម។ សមត្ថកិច្ចមូលដ្ឋានបានឲ្យដឹងថា មានករណីឃាតកម្មមួយដែលបង្កឡើងដោយបងប្អូនបង្កើតបានកាប់សម្លាប់គ្នាដោយសារតែរឿងដីធ្លី។ សមត្ថកិច្ចបន្តថា ជនរងគ្រោះមាន២នាក់ទី១.ឈ្មោះវ៉ូ ខឹម ភេទស្រី អាយុ៤៩ឆ្នាំទីលំនៅភូមិ.ឃុំកើតហេតុ កាប់ត្រូវថ្គាមខាងឆ្វេង១កន្លែងនិងកញ្ចឹងក១កន្លែង បណ្តាលឲ្យស្លាប់នៅនឹងកន្លែង។ ទី២.ឈ្មោះវ៉ូ ឃុត ភេទស្រី អាយុ៤២ឆ្នាំទីលំនៅភូមិ.ឃុំកើតហេតុ កាប់ត្រូវចំថ្គាមខាងឆ្វេង២កន្លែង លើត្រចៀក១កន្លែង បំពង់ក១កន្លែង ត្រចៀក១កន្លែង។
ជនសង្ស័យ មានឈ្មោះវ៉ូ វន ភេទប្រុស អាយុ ៤៣ឆ្នាំ ទីលំនៅភូមិ.ឃុំកើតហេតុ។ សមត្ថកិច្ចបន្ថែមថា អង្គហេតុ នៅថ្ងៃទី២០ ខែមេសា ឆ្នាំ២០១៩ វេលាម៉ោង១៨និង២០នាទី ជនសង្ស័យបានជីកដីដាក់បង្គោលធ្វើបន្ទប់ទឹក នៅមុខផ្ទះជនរងគ្រោះ ហើយជនរងគ្រោះបានស្ដីបន្ទោស ជនសង្ស័យ តបសំដីទៅវិញ មួយសន្ទុះជនសង្ស័យបានឡើងទៅលើផ្ទះយកកាំបិតប៉័ងតោចុះមកចាប់ជនរងគ្រោះទី១បណ្តាលឲ្យស្លាប់តែម្ដង ឃើញដូចនោះ ជនរងគ្រោះទី២ដែលនៅផ្ទះក្បែរ បានស្រែកឲ្យគេជួយ ក៏ត្រូវជនសង្ស័យ រត់ទៅដេញកាប់រហូតដល់ស្លាប់ដែរ។
បច្ចុប្បន្នជនសង្ស័យត្រូវបានកម្លាំងនគរបាលមូលដ្ឋាននាំខ្លួនទៅអធិការដ្ឋានស្រុកសូទ្រនិគម ដើម្បីរៀបចំសំណុំរឿងទៅការិយាល័យជំនាញចាត់ការបន្តទៅតុលាការ៕
Source: Kampuchea Thmey Daily
0 Comments