លោក សុខ សម្បត្តិ ៖ សមាជិកក្រុមប្រឹក្សាសង្កាត់ ត្រូវពិនិត្យឲ្យបានច្បាស់លាស់មុនបោះឆ្នោតជ្រើសរើសក្រុមប្រឹក្សារាជធានីភ្នំពេញ ខណ្ឌ

ភ្នំពេញ ៖ ប្រធានគណៈកម្មាធិការគណបក្សប្រជាជនកម្ពុជាខណ្ឌព្រែកព្នៅ លោក សុខ សម្បត្តិ បានមានប្រសាសន៍លើកឡើងថា សមាជិកក្រុមប្រឹក្សាសង្កាត់ទាំងអស់ ដែលជាអង្គបោះឆ្នោតក្រុមប្រឹក្សារាជធានីភ្នំពេញ ខណ្ឌ ត្រូវពិនិត្យឲ្យបានច្បាស់លាស់មុនបោះឆ្នោតជ្រើសរើស ក្រុមប្រឹក្សារាជធានីភ្នំពេញ ខណ្ឌ ដែលនឹងប្រព្រឹត្តទៅនៅខែក្រោយនេះ។

ការលើកឡើងបែបនេះរបស់ លោក សុខ សម្បត្តិ បានធ្វើឡើងនៅក្នុងពិធីសំណេះសំណាលជាមួយក្រុមប្រឹក្សាសង្កាត់ ជាអង្គរ បោះឆ្នោតក្រុមប្រឹក្សារាជធានីភ្នំពេញ ខណ្ឌ អាណត្តិទី៣ កាលពីព្រឹកថ្ងៃសៅរ៍ ទី២៧ ខែមេសា ឆ្នាំ២០១៩ នៅទីស្នាក់ការគណបក្សប្រជាជនកម្ពុជាខណ្ឌព្រៃព្នៅ ក្រោមអធិបតីភាព លោក ឃួង ស្រេង សមាជិកគណៈកម្មការកណ្តាលគណបក្សប្រជាជនកម្ពុជា អនុប្រធានគណបក្សប្រជាជនកម្ពុជារាជធានីភ្នំពេញ និងជាប្រធាន ក្រុមការងារចុះជួយខណ្ឌព្រែកព្នៅ។

លោក សុខ សម្បត្តិ បានមានប្រសាសន៍បញ្ជាក់ទៅក្រុមប្រឹក្សាសង្កាត់ទាំងអស់ថា ក្នុងនាមជា អង្គបោះឆ្នោតក្រុមប្រឹក្សារាជធានីខណ្ឌ ការគូសសន្លឹកឆ្នោត ត្រូវពិនិត្យឱ្យបានច្បាស់លាស់ទៅលើគណបក្សនីមួយៗដោយសារតែមានគណបក្សមួយនោះមាន ឈ្មោះស្រដៀងនឹងគណបក្សប្រជាជនកម្ពុជាដែរ។

ក្រៅពីការលើកឡើងខាងលើ លោក សុខ សម្បត្តិ ក៏បានលើកឡើងពីបញ្ហាសន្តិសុខសណ្ដាប់ធ្នាប់នៅក្នុងមូលដ្ឋានរបស់ខ្លួន ដោយលោកបញ្ជាក់ថា ក្នុងរយៈពេល នៃពិធីបុណ្យចូលឆ្នាំថ្មីប្រពៃណីជាតិប៉ុន្មានថ្ងៃកន្លងមកនេះ ឃើញថា នៅក្នុងមូលដ្ឋានខណ្ឌព្រែកព្នៅ គឺបញ្ហាសន្តិសុខសណ្ដាប់ធ្នាប់ល្អប្រសើរ គ្មានចោរ គាស់ផ្ទះ ចោរលួច ចោរប្លន់។ ការរក្សាបាននូវសន្តិសុខសណ្ដាប់ធ្នាប់ល្អប្រសើរនេះ ដោយសារតែអាជ្ញាធរ សង្កាត់ ខណ្ឌ បង្កើតកម្លាំងល្បាត ពួនស្ទាក់នៅតាមទីកន្លែងស្មុគស្មាញមួយចំនួននៅក្នុងមូលដ្ឋាន៕