សហរដ្ឋអាមេរិកកាលពីថ្ងៃសុក្របានដាក់ទណ្ឌកម្មទៅលើរដ្ឋមន្ត្រីការបរទេសរបស់ប្រទេសវេណេហ្ស៊ូអេឡាដែលនេះជាការបង្កើនយុទ្ធនាការដាក់សម្ពាធរបស់ខ្លួនក្នុងគោលបំណងបណ្តេញលោកប្រធានាធិបតី Nicolas Maduro ចេញពីតំណែង។
សកម្មភាពប្រឆាំងនឹងរដ្ឋមន្ត្រីការបរទេស Jorge Arreaza គឺជាសញ្ញាចុងក្រោយនិងខ្លាំងបំផុតដែលបង្ហាញថា សហរដ្ឋអាមេរិកមិនចាប់អារម្មណ៍ក្នុងការចរចាជាមួយលោក Maduro ទេ។ លោកជាមេដឹកនាំឆ្វេងនិយមដែលប្រទេសជាង៥០លែងទទួលស្គាល់ជាប្រធានាធិបតី។
រដ្ឋមន្ត្រីការបរទេសអាមេរិកលោក Mike Pompeo បានហៅលោក Arreaza ថាជា “អ្នកបម្រើលោក Maduro” និងបានសរសេរនៅលើ Twitter ថា លោកត្រូវបានគេដាក់ទណ្ឌកម្មដោយសារតែការប៉ុនប៉ងទប់ស្កាត់បំណងប្រាថ្នាប្រជាធិបតេយ្យរបស់ប្រជាជនវេណេហ្ស៊ូអេឡា។
លោក Pompeo បាននិយាយថា “ប៉ុន្តែខ្ញុំស្គាល់ជនជាតិវេណេហ្ស៊ូអេឡា ពួកគេនឹងមិនភ័យខ្លាចទេ។ ជាមួយការគាំទ្រពីបណ្តាប្រទេសប្រជាធិបតេយ្យឈានមុខរបស់ពិភពលោក ពួកគេនឹងស្ដារឡើងវិញនូវលទ្ធិប្រជាធិបតេយ្យនិងកសាងប្រទេសឡើងវិញ”។
ក្រោមការដាក់ទណ្ឌកម្មនេះ ទ្រព្យសម្បត្តិអាមេរិករបស់លោក Arreaza នឹងត្រូវរារាំងហើយពលរដ្ឋអាមេរិកនឹងត្រូវហាមឃាត់ពីការទាក់ទងជាមួយអ្នកការទូតកំពូលរបស់ប្រទេសវេណេហ្ស៊ូអេឡារូបនេះ។
លោក Arreaza គឺជាមន្ត្រីវេណេហ្ស៊ូអេឡាចុងក្រោយបង្អស់ដែលត្រូវបានកំណត់គោលដៅខណៈពេលដែលរដ្ឋការរបស់លោកប្រធានាធិបតី Donald Trump ព្យាយាមផ្តល់អំណាចដល់លោក Juan Guaido ដែលជាមេដឹកនាំគណបក្សប្រឆាំង។
ប៉ុន្តែខណៈដែលការដាក់ទណ្ឌកម្មមុនៗភាគច្រើនបានចោទប្រកាន់ពីអំពើពុករលួយឬការរំលោភបំពានសិទិ្ធមនុស្សនោះ ក្រសួងហិរញ្ញវត្ថុមិនបានលើកឡើងពីការរំលោភបំពានជាក់លាក់ណាមួយដោយលោក Arreaza ទេដោយគ្រាន់តែនិយាយថា គាត់ត្រូវបានដាក់ទណ្ឌកម្មដោយសារតែតួនាទីរបស់គាត់ជារដ្ឋមន្ត្រីការបរទេសប៉ុណ្ណោះ។
លោក Steven Mnuchin រដ្ឋមន្ត្រីក្រសួងរតនាគារបាននិយាយថា សហរដ្ឋអាមេរិកនឹងបន្តផ្តោតគោលដៅលើអ្នកប្រព្រឹត្តអំពើពុករលួយក្នុងក្រុមលោក Maduro ដោយរួមទាំងអ្នកដែលមានភារកិច្ចផ្នែកការទូតនិងយុត្តិធម៌ជំនួសមុខឲ្យរបបខុសច្បាប់នេះផងដែរ៕ AFP
Source: Kampuchea Thmey Daily
0 Comments