បន្ទាយមានជ័យ ៖ នៅវេលាម៉ោង៨និង៣០ព្រឹក ថ្ងៃទី២២ ខែមេសា ឆ្នាំ២០១៩ នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា និង លោក ប្រាយុទ្ធ ចាន់អូចា នាយករដ្ឋមន្ត្រីថៃ អញ្ជើញជាអធិបតីក្នុងកម្មវិធី៣ផ្សេងគ្នានៅតំបន់ព្រំដែនរវាងប្រទេសទាំងពីរ ។
កម្មវិធីទាំងបីនោះរួមមាន ៖១.ការចាក់បេតុងតភ្ជាប់មុខតំណស្ពានមិត្តភាពកម្ពុជា-ថៃ(ស្ទឹងបត់-បានណងអៀន),២.បើកការដ្ឋានសាងសង់អគារ ច្រកទ្វារព្រំដែនអន្តរជាតិស្ទឹងបត់ និង ផ្លូវតភ្ជាប់ទៅផ្លូវជាតិលេខ៥ និង ទី៣.ពិធីចុះហត្ថលេខាលើកិច្ចព្រមព្រៀងប្រតិបត្តិការរួមគ្នាលើការដឹកជញ្ជូន ផ្លូវដែកឆ្លងកាត់ព្រំដែន និង ពិធីប្រគល់-ទទួលរថភ្លើង (DMU)។
សម្ដេចតេជោ ហ៊ុន សែន និងលោក ប្រាយុទ្ធ ចាន់អូចា នឹងធ្វើដំណើររួមគ្នាតាមរថភ្លើងចេញពីស្ថានីយ(បានក្លងលឹក)របស់ថៃឆ្ពោះមកកាន់ស្ថានីយរថភ្លើងប៉ោយប៉ែតរបស់កម្ពុជា។ ក្រោយបញ្ចប់កម្មវិធីនេះ សម្ដេចតេជោហ៊ុន សែន និង លោក ប្រាយុទ្ធ ចាន់អូចា នឹងអញ្ជើញពិសារបាយរួមគ្នា នៅក្រុងអារញ្ញប្រថេតប្រទេសថៃ។
សូមបញ្ជាក់ថា ស្ពានមិត្តភាពកម្ពុជា-ថៃ(ស្ទឹងបត់-បានណងអៀន) ដែលចាក់បេតុងតភ្ជាប់នៅថ្ងៃនេះសាងសង់ដោយកងវិស្វកម្ម នៃកងយោធពលខេមរភូមិន្ទថៃ ហើយសិក្សា និងត្រួតពិនិត្យបច្ចេកទេសដោយនាយកដ្ឋានហាយវ៉េ(DOH)ក្រសួងដឹកជញ្ជូនថៃ ក្រោមជំនួយឥតសំណងពីរាជរដ្ឋាភិបាល ថៃជាង១៩លានដុល្លារ។
ស្ពាននេះ ជាស្ពានធំទីមួយ ដែលបានសាងសង់លើខ្សែបន្ទាត់ព្រំដែនកម្ពុជា-ថៃ នៅចន្លោះបង្គោលខណ្ឌព្រំសីមាលេខ៥០ និងលេខ៥១។ ស្ពាននេះ មានប្រវែង៦២០ម៉ែត្រ ទទឹង១៧ម៉ែត្រ ដោយនៅផ្នែកកម្ពុជាមានប្រវែង២១៥ម៉ែត្រនៅផ្នែកខាងថៃ មានប្រវែង៤០៥ម៉ែត្រ។ ការសាងសង់ស្ពាន នេះគឺជាការបើកឡើងនូវទំព័រប្រវត្តិសាស្ត្រថ្មីមួយរវាងប្រទេសទាំងពីរសំដៅធ្វើឲ្យប្រសើរឡើងការធ្វើពាណិជ្ជកម្មឆ្លងកាត់ព្រំដែនរវាងកម្ពុជា-ថៃ។
ដោយឡែក ការសាងសង់អគារច្រកទ្វារព្រំដែនអន្តរជាតិ(ស្ទឹងបត់-បានណងអៀន ) និង សាងសង់ផ្លូវតភ្ជាប់ទៅផ្លូវជាតិលេខ៥ រាជរដ្ឋាភិបាលកម្ពុជា ទទួលបានហិរញ្ញប្បទានសម្បទានពីរាជរដ្ឋាភិបាលថៃប្រមាណ២៦.៤២លានដុល្លារ សម្រាប់សាងសង់អគារច្រកទ្វារត្រួតពិនិត្យព្រំដែន និង ផ្លូវតភ្ជាប់, សំណង់អគារអន្តេវាសិកដ្ឋាន,ចំណតសម្រាប់ផ្ទេរទំនិញឆ្លងកាត់ «ឃ្លាំង និងទីលានកុងតឺន័រ»,ការជួសជុលកែលំអផ្លូវចាស់ និង សំណង់កាត់បន្ថយគ្រោះទឹកជំនន់។
ដំណើរការសាងសង់អគារនៅច្រកព្រំដែនថ្មីនេះគ្រោងប្រើប្រាស់រយៈពេលសាងសង់ចំនួន២៤ខែដោយគិតចាប់ពីខែមេសា ឆ្នាំ២០១៩ នេះតទៅ។ ការបើកច្រកទ្វារព្រំដែនអន្តរជាតិ(ស្ទឹងបត់-បានណងអៀន)ថ្មីនេះ គឺជាការបើកឡើងនូវទំព័រប្រវត្តិសាស្ត្រថ្មីមួយសម្រាប់សម្រួលដល់ការធ្វើពាណិជ្ជកម្មឆ្លងកាត់ព្រំដែន រវាងកម្ពុជា-ថៃ និងដើម្បីជំរុញលើកកម្ពស់ប្រព័ន្ធភស្តុភារកម្មនៅកម្ពុជាផងដែរ។
ពាក់ព័ន្ធការដឹកជញ្ជូនផ្លូវដែកឆ្លងកាត់ប្រទេសទាំងពីរវិញ រដ្ឋមន្ត្រីក្រសួងសាធារណការ និងដឹកជញ្ជូនកម្ពុជា និងរដ្ឋមន្ត្រីក្រសួងដឹកជញ្ជូនថៃ នឹងចុះហត្ថលេខាជាមួយគ្នាក្រោមអធិបតីភាពនាយករដ្ឋមន្ត្រី នៃប្រទេសទាំងពីរ។ បន្ទាប់មកក៏មានពិធីប្រគល់រថភ្លើងដែលមានទូចំនួន៤ ដល់រាជរដ្ឋាភិបាលកម្ពុជាពីសំណាក់នាយករដ្ឋមន្ត្រីថៃផងដែរ។ រថភ្លើងដែលជាអំណោយរបស់ថៃនេះជាប់ជាមួយទូអ្នកដំណើរចំនួន៤ដែលអាចផ្ទុកអ្នកដំណើរ បានដល់៨០នាក់ក្នុងទូនីមួយៗ។ រថភ្លើងដឹកអ្នកដំណើរ DMU (Diesel Multiple Unit) ផលិតដោយក្រុមហ៊ុន Hitachi របស់ជប៉ុន។
ចាប់ពីវេលាម៉ោង១០យប់ ថ្ងៃទី២១មេសានេះ ច្រកទ្វារព្រំដែនអន្តរជាតិប៉ោយប៉ែត នឹងបិទបណ្តោះអាសន្នដើម្បីរៀបចំកម្មវិធីសម្ពោធបើកដំណើរការស្ពានមិត្តភាពកម្ពុជា-ថៃ(ស្ទឹងបត់-បានណងអៀន)និងស្ថានីយរថភ្លើងប៉ោយប៉ែត-ខ្លងលឹក នៅថ្ងៃទី២២មេសា។ ការបិទច្រកទ្វារនេះ ធ្វើឡើងដើម្បីសុវត្ថិភាពក្នុងជំនួបនាយករដ្ឋមន្ត្រីថៃ ប្រាយុទ្ធ ចាន់អូចា និង នាយករដ្ឋមន្ត្រីកម្ពុជា សម្ដេច ហ៊ុន សែន។
យោងតាមសេចក្ដីជូនដំណឹងរបស់ប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត បានសរសេរលើទំព័រហ្វេសប៊ុករបស់ខ្លួន ដូច្នេះចាប់ពីម៉ោង២២និង០០នាទី ថ្ងៃទី២១មេសានេះតទៅ ច្រកទ្វារព្រំដែនអន្តរជាតិប៉ោយប៉ែត ត្រូវបានបិទជាបណ្ដោះអាសន្ន។ រហូតដល់ចប់កម្មវិធីថ្ងៃ២២ ខែមេសា ឆ្នាំ២០១៩ ទើបបើកដំណើរការជាធម្មតាវិញ។
គួរបញ្ជាក់ថា ផ្លូវដែកភាគជើង ភ្នំពេញ- បាត់ដំបង-ប៉ោយប៉ែត ព្រំដែនកម្ពុជា-ថៃមានប្រវែង៣៨៦គីឡូម៉ែត្រ ត្រូវបានសាងសង់ឡើងនៅក្នុងសម័យ អាណានិគមបារាំង ៖ ផ្លូវដែកភ្នំពេញ-ពោធិ៍សាត់សាងសង់ពីឆ្នាំ១៩២៩ ដល់១៩៣១ប្រវែង១៦៦គ.ម។ ផ្លូវដែកពីពោធិ៍សាត់-មង្គលបូរីសាងសង់ ពីឆ្នាំ១៩៣១ ដល់ ១៩៣៣ប្រវែង១៦៤ គ.ម និង ផ្លូវដែកពីមង្គលបូរី-ប៉ោយប៉ែតសាងសង់ពីឆ្នាំ១៩៣៣ដល់១៩៤២ប្រវែង៥៥,០៥គ.ម។ កំណាត់ ផ្លូវដែក មកកាន់ក្រុងប៉ោយប៉ែត ត្រូវបានកាត់ផ្ដាច់ក្នុងពេលកម្ពុជាធ្លាក់ក្នុងអន្លង់ភ្លើងសង្គ្រាមនាឆ្នាំ១៩៧០។ ផ្លូវដែកមួយខ្សែនេះ ត្រូវបានស្តារឡើងវិញជាបន្តបន្ទាប់ រហូតរួចរាល់ជាស្ថាពរ និងដាក់ឲ្យដំណើរការឡើងវិញ កាលពីខែមេសា ឆ្នាំ២០១៨ មុនពេលចូលឆ្នាំថ្មី ដោយចំណាយថវិកាជិត៨៤លានដុល្លារអាមេរិក៕
Source: Kampuchea Thmey Daily
0 Comments