តាកែវ ៖ ក្មេងស្រីអាយុ១៩ឆ្នាំម្នាក់ បានបើកបរម៉ូតូវ៉ាជែងក្នុងស្ថានភាពផ្លូវគ្រោះថ្នាក់ និងខ្វះការប្រុងប្រយ័ត្ន ទៅទាក់ដៃចង្កូតម៉ូតូមួយគ្រឿងទៀត បណ្តាលឲ្យដួលចូលកង់រថយន្តដឹកដី កិនស្លាប់ភ្លាមមួយរំពេច។
ហេតុការណ៍គ្រោះថ្នាក់ចរាចរណ៍ព្រោះតែខ្វះការប្រុងប្រយ័ត្ននេះ បានកើតឡើងកាលពីវេលាម៉ោង១៦និង០០នាទី ស្ថិតនៅលើផ្លូវជាតិលេខ២ ចន្លោះគីឡូម៉ែត្រលេខ ៣៩-៤០ ចំណុចភូមិកណ្តឹងធំ ឃុំកណ្តឹង ស្រុកបាទី ខេត្តតាកែវ។
តាមការឲ្យដឹងពីប៉ូលិសស្រុកបាទីប្រាប់ថា ក្មេងស្រីរងគ្រោះមានឈ្មោះ ហ៊ែល សម្ភស្ស អាយុ១៩ឆ្នាំ រស់នៅភូមិកណ្ដឹងធំ ឃុំកណ្ដឹង ស្រុកបាទី ខេត្តតាកែវ។ ជនរងគ្រោះបើកបរម៉ូតូម៉ាកស្កុបពី ពណ៌ស ពាក់ស្លាក់លេខ ភ្នំពេញ 1 HI 5216 ពីជើងទៅត្បូង លុះដល់ចំណុចកើតហេតុ បានបើកវ៉ាជែងម៉ូតូមួយគ្រឿងទៀតដែលកំពុងបើកបរស្របទិសគ្នា ក៏ទាក់ដៃចង្កូតបណ្តាលឲ្យដួល គាប់ជួនពេលនោះមានរថយន្តដឹកដីដែលកំពុងបើកបរស្របទិសគ្នាដែរនោះបានមកដល់ កិនជនរងគ្រោះស្លាប់ភ្លាមៗនៅនឹងកន្លែងតែម្តងទៅ។
ក្រោយកើតហេតុ កម្លាំងជំនាញ នៃអធិការនគរបាលស្រុកបាទី បានចុះដល់វាស់វែងធ្វើកំណត់ហេតុនិងដកហូតវត្ថុតាងម៉ូតូជនរងគ្រោះ និងរថយន្ត យកមករក្សាទុកនៅអធិការដ្ឋាននគរបាលស្រុកដើម្បីធ្វើការដោះស្រាយគ្នានៅពេលក្រោយ តាមនីតិវិធី។ ចំណែកសពក្មេងស្រីរងគ្រោះ បានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments