ភ្នំពេញ ៖ រយៈពេល៧ថ្ងៃ គិតត្រឹមថ្ងៃទី២២ ដល់ថ្ងៃទី២៥ ខែមេសា ឆ្នាំ២០១៩ ក្នុងដំណាក់កាលបិទផ្សាយបញ្ជីបោះឆ្នោតដំបូង គណៈកម្មការរាជធានី ខេត្ត រៀបចំការបោះឆ្នោត (គធ.ខប) ពុំបានទទួលពាក្យបណ្តឹងជំទាស់ឡើយ ប៉ុន្តែទទួលពាក្យបណ្តឹងតវ៉ា១០បណ្ដឹង ក្នុងនោះសម្រេចយល់ព្រមតាមពាក្យបណ្តឹងចំនួន៣ និងកំពុងដោះស្រាយចំនួន៧បណ្ដឹង។
សេចក្តីប្រកាសព័ត៌មាន ដែលកម្ពុជាថ្មីទទួលបាននៅថ្ងៃទី២៧ ខែមេសា ឆ្នាំ២០១៩ បានឲ្យដឹងថា បណ្តឹងទាំង១០បណ្តឹងខាងលើនេះ រួមមាន នៅខេត្តបាត់ដំបងចំនួន១បណ្តឹង ដោយយល់ព្រមតាមពាក្យបណ្ដឹង, ខេត្តកំពង់ស្ពឺ ចំនួន២បណ្ដឹង កំពុងដោះស្រាយទាំង២បណ្ដឹង, ខេត្តកំពង់ធំ ចំនួន៦បណ្តឹង យល់ព្រមតាមពាក្យបណ្តឹងចំនួន១បណ្តឹង និងកំពុងដោះស្រាយចំនួន៥បណ្តឹង និងខេត្តតាកែវ ចំនួន១បណ្តឹង ដោយយល់ព្រមតាមពាក្យបណ្តឹង។
សូមបញ្ជាក់ថា ការដាក់ ការទទួល និងការដោះស្រាយពាក្យបណ្ដឹងទាក់ទងទៅនឹងបញ្ជីបោះឆ្នោតដំបូង មានរយៈពេល១៩ថ្ងៃ (លើកលែងថ្ងៃបុណ្យផ្លូវការ១ថ្ងៃ) ចាប់ពីថ្ងៃទី២២ ខែមេសា ដល់ថ្ងៃទី១០ ខែឧសភា ឆ្នាំ២០១៩។ ដំណាក់កាលនីមួយៗនៃបណ្ដឹងរួមមាន ទី១, ការប្តឹងទៅ គធ.ខប ក្នុងរយៈពេល៥ថ្ងៃ បន្ទាប់ពីថ្ងៃបិទផ្សាយបញ្ជីបោះឆ្នោតដំបូង ចាប់ពីថ្ងៃទី២២ ដល់ថ្ងៃទី២៦ ខែមេសា ឆ្នាំ២០១៩ ទី២, ការដោះស្រាយពាក្យបណ្តឹងដោយ គធ.ខប ក្នុងរយៈពេល៣ថ្ងៃ បន្ទាប់ពីថ្ងៃប្តឹង ចាប់ពីថ្ងៃទី២៧ ដល់ថ្ងៃទី២៩ ខែមេសា ឆ្នាំ២០១៩ ទី៣, ការប្តឹងទៅ គ.ជ.ប ក្នុងរយៈពេល៥ថ្ងៃ បន្ទាប់ពីថ្ងៃ គធ.ខប បដិសេធ (ឈប់បុណ្យ៧ថ្ងៃ ចាប់ពីថ្ងៃទី៣០ ខែមេសា ដល់ថ្ងៃទី៥ ខែឧសភា ឆ្នាំ២០១៩ ទី៤, ការដោះស្រាយពាក្យបណ្តឹងដោយ គ.ជ.ប ក្នុងរយៈពេល៥ថ្ងៃ បន្ទាប់ពីថ្ងៃប្តឹង ចាប់ពីថ្ងៃទី៦ ដល់ ថ្ងៃទី១០ ខែឧសភា ឆ្នាំ២០១៩។
ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៣ ឆ្នាំ៣០១៩ នឹងប្រព្រឹត្តទៅនៅថ្ងៃអាទិត្យទី២៦ ខែឧសភា ឆ្នាំ២០១៩ ហើយលោក ឌុច សុន សមាជិកគណៈកម្មាធិការជាតិរៀបចំការបោះឆ្នោត (គ.ជ.ប) ធ្លាប់បានអះអាងថា ជនណាក៏ដោយ ឬតំណាង មានសិទ្ធិប្ដឹងតវ៉ា និងប្ដឹងជំទាស់ជាលាយលក្ខណ៍អក្សរ ទាក់ទងនឹងបញ្ជីបោះឆ្នោតដំបូងទៅ គធ.ខប ឬ គ.ជ.ប ហើយពាក្យបណ្ដឹងត្រូវធ្វើឡើងជាលាយលក្ខណ៍អក្សរ ប៉ុន្តែពាក្យបណ្ដឹងអនាមិកពុំត្រូវបានចាត់ទុកជាពាក្យប្ដឹងស្របច្បាប់ និងមិនត្រូវលើកយកមកដោះស្រាយឡើយ៕
Source: Kampuchea Thmey Daily
0 Comments