ភ្នំពេញ ៖ កវីនិពន្ធវ័យក្មេង និងជាអ្នកនិពន្ធបទ រងា ច្រៀងដោយតារាស្រីពហុជំនាញអ្នកនាង ខាត់ សុឃីម គឺលោក ស៊ីវ ចន្ទ ថ្មីៗនេះ ត្រូវបានប្រភពពីរង្វង់អ្នកសិល្បៈជិតដិតជាមួយគ្នាបង្ហើបប្រាប់ឲ្យដឹងថា បច្ចុប្បន្នអ្នកនិពន្ធរូបនេះ កំពុងមានទំនាក់ទំនងស្នេហាផ្អែមល្ហែមជាមួយគូស្នេហ៍វ័យក្មេងម្នាក់យ៉ាងត្រជាក់ល្ហឹម។
ប្រភពដដែលនេះបាននិយាយទៀតថា ចំណងស្នេហារវាងអ្នកនិពន្ធរូបនេះ ជាមួយគូស្នេហ៍វ័យប្រហែលគ្នានោះ គឺចាប់ផ្តើមមានរយៈពេលជិត២ឆ្នាំមកហើយ គ្រាន់តែដំបូងឡើងមិនសូវបង្ហាញឬទម្លាយឲ្យនrណាដឹងនោះឡើយ ប៉ុន្តែទើបតែថ្មីៗនេះពោលគឺក្រោយពេលភ្ជាប់ពាក្យរួចរាល់ទើប ស៊ីវ ចន្ទ ហ៊ានសារភាពប្រាប់មិត្តភ័ក្ដិ និងអ្នកសិល្បៈរួមអាជីពដូចគ្នាពីគម្រោងត្រៀមចូលរោងជ័យនាពេលឆាប់ៗខាងមុខនេះ។
ប្រាប់កម្ពុជាថ្មីឲ្យដឹងតាមរយៈការផ្ញើសារឆាតហ្វេសប៊ុកអ្នកនិពន្ធ លោក ស៊ីវ ចន្ទ បាននិយាយទទួលស្គាល់ការពិតថា ពេលនេះលោកពិតជាបានភ្ជាប់ពាក្យជាមួយគូស្នេហ៍វ័យប្រហែលគ្នាពិតមែន ដែលចំណងស្នេហានេះគឺកើតឡើងមានរយៈពេលជាង១ឆ្នាំមកហើយខណៈដែលពិធីភ្ជាប់ពាក្យក៏បានធ្វើហើយរួចរាល់កាលពីអំឡុងពេលបុណ្យចូលឆ្នាំថ្ងៃទី២ផងនោះ។
កវីនិពន្ធវ័យក្មេង ស៊ីវ ចន្ទបានបញ្ជាក់ថា ក្រោយពេលភ្ជាប់ពាក្យដឹងឮដល់ចាស់ទុំទាំងសងខាងហើយនោះ រវាងខ្ញុំ និងគូដណ្តឹងមានគម្រោងរៀបអាពាហ៍ពិពាហ៍នៅឆ្នាំក្រោយ ព្រោះដើម្បីទុកពេល១ឆ្នាំក្នុងការសន្សំលុយសិន។
លោកថា គូដណ្តឹងរបស់ខ្លួនក៏ជាអ្នករស់នៅរួមខេត្តជាមួយគ្នានៅខេត្តតាកែវផងដែរ គឺគ្រាន់តែខុសស្រុកគ្នាតែប៉ុណ្ណោះ។
សូមបញ្ជាក់ថា គិតមកទល់ពេលនេះ បទចម្រៀងដែល លោក ស៊ីវ ចន្ទ បាននិពន្ធដើម្បីដាក់ចូលប្រជែងទីផ្សារចម្រៀងរួមមាន ៖
១-បទ រងា,២- រាំបទខ្មែរទំនើប (ច្រៀងដោយអ្នកនាងខាត់សុឃីម),៣-បទ កោរសក់សាងបុណ្យ (រស់ ព្រួយ),៤-បទ អារម្មណ៍លួចស្នេហ៍អូន (លឺម ឧត្តម),៥,កូនខុសហើយម៉ែ,៦-បទ យើងលែងជាស្នេហាហើយ(ប៊ុត សីហា)និងបទ ដាច់យប់ដាច់ជីវិត ហើយក្រៅពីនេះក៏ធ្លាប់និពន្ធកំប្លែងខ្លីឲ្យនាយ គ្រឿន បានមួយរឿងកាលពីថ្មីៗនេះផងដែរ៕
Source: Kampuchea Thmey Daily
0 Comments