ជនអន្តោប្រវេសន៍អាមេរិកកណ្តាលនៅឯមណ្ឌលឃុំឃាំងមួយនៅភាគខាងត្បូងប្រទេសម៉ិកស៊ិកបានធ្វើការតវ៉ាប្រឆាំងនឹងការជាប់ឃុំរបស់ពួកគេកាលពីថ្ងៃសុក្រពោលគឺមួយថ្ងៃ បន្ទាប់ពីការរត់គេចខ្លួនរបស់អ្នកជាប់ឃុំដែលភាគច្រើនជាជនជាតិគុយបាប្រហែលជា១,៣០០នាក់។
ជនចំណាកស្រុករាប់សិបនាក់បានស្រែកកាលពីព្រឹកថ្ងៃសុក្រថា “យើងចង់ទៅ” និង “យើងឃ្លាន” នៅមណ្ឌលនេះក្នុងទីក្រុង Tapachula នៃរដ្ឋ Chiapas ភាគខាងត្បូង។
សាក្សីបាននិយាយថា នៅពេលអាហារពេលល្ងាចកាលពីថ្ងៃព្រហស្បតិ៍ ជនចំណាកស្រុកប្រហែល១,៣០០នាក់បានរត់គេចខ្លួនបន្ទាប់ពីគំរាមដុតមណ្ឌលឃុំឃាំងនេះដើម្បីតវ៉ាប្រឆាំងនឹងការដាក់មនុស្សច្រើនពេក។
វិទ្យាស្ថានអន្តោប្រវេសន៍ជាតិ (INM) បាននិយាយនៅក្នុងសេចក្តីថ្លែងការណ៍មួយថា “មានការចាកចេញដោយគ្មានការអនុញ្ញាតជាទ្រង់ទ្រាយធំនៃមនុស្សដែលត្រូវបានគេដាក់នៅក្នុងស្ថានីយអន្តោប្រវេសន៍”។
វិទ្យាស្ថាននេះបាននិយាយថា មនុស្សចំនួន៧០០នាក់បានត្រលប់មកវិញភ្លាមៗបន្ទាប់ពីចាកចេញប៉ុន្តែប្រធានាធិបតីម៉ិកស៊ិកលោក Andres Manuel Lopez Obrador បានបញ្ជាក់កាលពីព្រឹកថ្ងៃសុក្រថា មនុស្សប្រហែល៥០០នាក់ផ្សេងទៀតមិនត្រូវបានគេដឹង។
ចាប់តាំងពីខែតុលាមក ជនជាតិអាមេរិកកណ្តាលនិងគុយបារាប់ម៉ឺននាក់បានធ្វើដំណើរឆ្លងកាត់ប្រទេសម៉ិកស៊ិកជាក្រុមដោយសង្ឃឹមថានឹងឈានទៅដល់សហរដ្ឋអាមេរិក។
ជនចំណាកស្រុកបាននិយាយថា ពួកគេកំពុងរត់គេចពីភាពក្រីក្រនិងអំពើហិង្សា។
មជ្ឈមណ្ឌល Tapachula ត្រូវបានសាងសង់ឡើងដើម្បីដាក់មនុស្សចំនួន៩០០នាក់ប៉ុន្តែអ្នកស្រុកនិយាយថា ពេលខ្លះវាដាក់មនុស្សរហូតដល់ទៅ៣,០០០នាក់ឯណោះ។
គួរបញ្ជាក់ថា វាជាលើកទីបីហើយចាប់តាំងពីខែតុលាមកដែលជនចំណាកស្រុកនៅមណ្ឌល Tapachula បានធ្វើកុបកម្មប្រឆាំងនឹងស្ថានភាពរបស់មណ្ឌលនេះ៕ AFP
Source: Kampuchea Thmey Daily
0 Comments