ភ្នំពេញ ៖ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងថា ក្រសួងបានត្រៀមខ្លួនរួចជាស្រេច ក្នុងការបន្តកិច្ចសហការជាមួយសមាគមរោងចក្រកាត់ដេរនៅកម្ពុជា (GMAC) សំដៅលើកកម្ពស់ភាពប្រកួតប្រជែង នៃវិស័យឧស្សាហកម្មផ្នែកវាយនភណ្ឌកម្ពុជា នៅលើឆាកអន្តរជាតិ ដើម្បីរួមចំណែកជាមួយរាជរដ្ឋាភិបាលក្នុងការសម្រេចឲ្យបាននូវចក្ខុវិស័យកម្ពុជាឆ្នាំ២០៣០ ជាប្រទេសមានចំណូលមធ្យមកម្រិតខ្ពស់ និង ឆ្នាំ២០៥០ ជាប្រទេសមានចំណូលខ្ពស់។
ការលើកឡើងរបស់លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបែបនេះធ្វើឡើងនៅក្នុង សន្និបាតប្រចាំឆ្នាំ២០១៩ របស់សមាគមរោងចក្រកាត់ដេរនៅកម្ពុជា (GMAC) និងពិធីបោះឆ្នោតជ្រើសរើសគណៈកម្មាធិការប្រតិបត្តិរបស់សមាគមរោងចក្រកាត់ដេរនៅកម្ពុជា សម្រាប់អាណត្តិឆ្នាំ២០១៩-២០២១ កាលពីថ្ងៃទី២៧ ខែមេសា ឆ្នាំ២០១៩ នៅតំបន់សេដ្ឋកិច្ចពិសេសភ្នំពេញ។
លោកបណ្ឌិតរដ្ឋមន្ត្រីបានបន្តថា «ក្នុងនាមថ្នាក់ដឹកនាំក្រសួងការងារ និងបណ្ដុះបណ្ដាលវិជ្ជាជីវៈ និងក្នុងនាមខ្លួនខ្ញុំផ្ទាល់ ខ្ញុំសូមអរគុណយ៉ាងជ្រាលជ្រៅចំពោះ លោក វ៉ាន់ ស៊ូអៀង ដែលបានបំពេញតួនាទីជាប្រធានសមាគមរោងចក្រកាត់ដេរនៅកម្ពុជា ក៏ដូចជាសមាជិក-សមាជិកាទាំងអស់ដែលតែងតែគាំទ្រ និងផ្តល់កិច្ចសហការល្អជាមួយក្រសួង ក្នុងការរួមចំណែកយ៉ាងសកម្មក្នុងការអភិវឌ្ឍវិស័យការងារ និងបណ្តុះបណ្តាលវិជ្ជាជីវៈ។
នាឱកាសដ៏វិសេសវិសាលនេះផងដែរ ខ្ញុំក៏សូមអបអរសាទរចំពោះ ប្រធានសមាគម GMAC ថ្មី ដែលត្រូវបានបោះឆ្នោតជ្រើសរើសជាប្រធានសមាគមរោងចក្រកាត់ដេរនៅកម្ពុជា សម្រាប់អាណត្តិឆ្នាំ២០១៩-២០២១ នាពេលនេះ»។
លោករដ្ឋមន្ត្រីបានបន្តថា ផ្តើមចេញពីគោលនយោបាយពាណិជ្ជកម្មផ្សារភ្ជាប់នឹងបទដ្ឋានការងារអន្តរជាតិ ដែល រាជរដ្ឋាភិបាល បាននិងកំពុងអនុវត្តចាប់ពីឆ្នាំ១៩៩៩ បានធ្វើឲ្យឧស្សាហកម្មកាត់ដេរសំលៀកបំពាក់ និងផលិតស្បែកជើងនៅកម្ពុជាបន្តរីកចម្រើនគួរជាទីមោទនៈ ចាប់ផ្តើមពីរោងចក្រប្រមាណជាង៦០រោងចក្រ ជាមួយនឹងកម្មករនិយោជិតប្រមាណ៨ម៉ឺននាក់ រហូតមកដល់ពេលនេះ រោងចក្រកើនឡើងដល់ប្រមាណ ១២០០រោងចក្រ ជាមួយនិងកម្មករនិយោជិតប្រមាណជាង៨៤ម៉ឺននាក់។ វិស័យកាត់ដេរ គឺជាវិស័យមួយដែលបានដើរតួនាទីយ៉ាងសំខាន់ ក្នុងការជំរុញកំណើនសេដ្ឋកិច្ចនៅកម្ពុជា និងបានផ្តល់ឱកាសការងារជូនប្រជាពលរដ្ឋ។
ជាមួយគ្នានេះដែរ លោករដ្ឋមន្ត្រីបានកោតសរសើរ និងវាយតម្លៃខ្ពស់សាទរចំពោះកិច្ចការកន្លងមកដែលសមាគមរោងចក្រកាត់ដេរនៅកម្ពុជា បានធ្វើការសហការយ៉ាងសិ្អតរមួតជាមួយក្រសួងការងារ និងបណ្តុះបណ្តាលវិជ្ជាជីវៈក្នុងនោះរួមមាន ៖ ការរួមគ្នាអនុវត្តនូវគោលនយោបាយពាណិជ្ជកម្មផ្សារភ្ជាប់ទៅនឹងបទដ្ឋានការងារអន្តរជាតិ ដែលកន្លងមកយើងបាននឹងកំពុងរួមគ្នាអនុវត្តប្រកបដោយជោគជ័យ ជាពិសេសតាមរយៈគម្រោងរោងចក្រកាន់តែប្រសើរនៅកម្ពុជា ដែលបានចុះអនុស្សរណៈយោគយល់រវាងភាគីរាជរដ្ឋាភិបាល រួមមាន ៖ ក្រសួងការងារ និង បណ្ដុះបណ្ដាលវិជ្ជាជីវៈ ក្រសួងពាណិជ្ជកម្ម ជាមួយនឹងវិស័យឯកជន រួមមាន ៖ សមាគមរោងចក្រកាត់ដេរនៅកម្ពុជា (GMAC) និងអង្គការអន្តរជាតិខាងការងារ (ILO)។
ការបង្កើនកិច្ចសហប្រតិបត្តិការយ៉ាងជិតស្និទ្ធ តាមរយៈការអនុវត្តយន្តការត្រីភាគី និងកិច្ចសន្ទនាសង្គម ដែលយើងបានអនុវត្តប្រកបដោយប្រសិទ្ធភាព ជាមូលដ្ឋានគ្រឹះធានាបាននូវភាពសុខដុមផ្នែកទំនាក់ទំនងវិជ្ជាជីវៈ ធ្វើឲ្យមានការថយចុះនូវវិវាទការងារបានប្រសើរជាងមុនច្រើន។
ការបន្តចូលរួមអនុវត្តយ៉ាងសកម្ម ក្នុងការគាំទ្រដល់កម្មវិធីកំណែទម្រង់របស់រាជរដ្ឋាភិបាល យុទ្ធសាស្ត្រចតុកោណ និងគោលនយោបាយនានា ដូចជាគោលនយោបាយជាតិស្ដីពីមុខរបរ និងការងារ គោលនយោបាយជាតិ ស្ដីពីការអប់រំបណ្ដុះបណ្ដាលបច្ចេកទេស និងវិជ្ជាជីវៈ គោលនយោបាយជាតិអភិវឌ្ឍន៍វិស័យឧស្សាហកម្ម និងក្របខណ្ឌគោលនយោបាយជាតិគាំពារសង្គម។
ទន្ទឹមនឹងនេះ ការចូលរួមអនុវត្តប្រកបដោយស្មារតីទទួលខុសត្រូវនូវកាតព្វកិច្ចនានាដែលបានចែងក្នុងច្បាប់ ស្តីពីការងារ ច្បាប់ស្ដីពីសហជីព ច្បាប់ស្តីពីរបបសន្តិសុខសង្គម សម្រាប់ជនទាំងឡាយណាដែលស្ថិតនៅក្រោមបញ្ញត្តិច្បាប់ស្តីពីការងារ ច្បាប់ស្តីពីប្រាក់ឈ្នួលអប្បបរមា រួមទាំងបទដ្ឋានគតិយុត្តិនានាពាក់ព័ន្ធនឹងវិស័យការងារផងដែរ។ បន្ថែមពីនេះ GMAC ក៏ជាដៃគូដ៏សំខាន់ផងដែរ ដែលបានចូលរួមធ្វើឲ្យក្រសួងអាចសម្រេចបានដោយជោគជ័យនូវការអនុវត្តផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ ព្រមទាំងកម្មវិធីការងារសមរម្យសម្រាប់ប្រទេសកម្ពុជា និងគម្រោងនានាផងដែរ។
លោកបណ្ឌិត អ៊ិត សំហេង បានបញ្ជាក់ថា ស្ថិតក្នុងបរិបទ ដែលវិស័យនេះកាន់តែប្រឈមខ្លាំងទៅនឹងលទ្ធភាពប្រកួតប្រជែងជាមួយប្រទេសនាំចេញនានា យើងបានធ្វើការយ៉ាងជិតស្និទ្ធជាមួយគ្នា ស្វែងរកដំណោះស្រាយរួមគ្នា ដើម្បីធានាថា វិស័យនេះនៅតែអាចបន្តធានាបាននូវឧត្ដមភាពប្រកួតប្រជែង សមាជិកទាំងអស់របស់GMAC អាចរក្សាបានដំណើរផលិតកម្មអាជីវកម្មរបស់ខ្លួន ប្រកបដោយចីរភាព៕
Source: Kampuchea Thmey Daily
0 Comments