ប្រទេសកូរ៉េខាងជើង និងកូរ៉េខាងត្បូងកាលពីថ្ងៃសៅរ៍ បានបញ្ចេញកំណត់ហេតុផ្សេងគ្នា ខណៈដែលពួកគេបានប្រារព្ធខួបលើកទីមួយនៃកិច្ចប្រជុំកំពូលរវាងមេដឹកនាំរបស់ពួកគេ។
លោក គីម ជុងអ៊ុន និងលោកប្រធានាធិបតី មូន ចេអ៊ីន បានរៀបចំកិច្ចប្រជុំលើកដំបូងរបស់ពួកគេនៅថ្ងៃទី២៧ខែមេសាឆ្នាំមុននៅក្នុងតំបន់គ្មានយោធាដែលពុះចែកឧបទ្វីបនេះអំឡុងការវិវត្តន៍ផ្នែកការទូតយ៉ាងឆាប់រហ័សដែលត្រូសត្រាយផ្លូវសម្រាប់កិច្ចប្រជុំកំពូលជាប្រវត្តិសាស្ត្ររវាងលោកគីមនិងប្រធានាធិបតីអាមេរិកលោកដូណាល់ត្រាំនៅក្នុងប្រទេសសិង្ហបុរីនៅខែមិថុនា។
ប៉ុន្តែមួយឆ្នាំក្រោយមក មានការរីកចម្រើនតិចតួចណាស់អំពីបញ្ហាអាវុធនុយក្លេអ៊ែររបស់កូរ៉េខាងជើងខណៈដែលទីក្រុងព្យុងយ៉ាងនិងវ៉ាស៊ីនតោនបានជាប់គាំងចាប់តាំងពីជំនួបកំពូលលើកទីពីររវាងលោកត្រាំនិងលោកគីមនៅទីក្រុងហាណូយកាលពីខែកុម្ភៈបានបញ្ចប់ទៅដោយគ្មានកិច្ចព្រមព្រៀងមួយ។
លោកមូនដែលបានរៀបចំកិច្ចប្រជុំលើកដំបូងរវាងមេដឹកទាំងពីរគឺបានព្យាយាមជួយសង្គ្រោះផ្នែកការទូតបើទោះបីជាកូរ៉េខាងជើងនៅតែមិនមានការឆ្លើយតបធំធេងក៏ដោយ។
ចាប់តាំងពីកិច្ចប្រជុំក្នុងទីក្រុងហាណូយមក កូរ៉េខាងជើងមិនបានចូលរួមកិច្ចប្រជុំប្រចាំសប្តាហ៍របស់ប្រធានការិយាល័យកិច្ចចរចារួមរបស់ពួកគេនៅទីក្រុង Kaesong ទេហើយក៏មិនបានចូលរួមក្នុងគម្រោងរួមផ្សេងទៀតផងដែរ។
កូរ៉េខាងជើងមិនបានឆ្លើយតបទៅនឹងការអញ្ជើញរបស់កូរ៉េខាងត្បូងក្នុងសប្តាហ៍នេះសម្រាប់ពិធីមួយនៅថ្ងៃសៅរ៍ក្នុងភូមិ Panmunjom ដើម្បីរំលឹកដល់កិច្ចប្រជុំជាប្រវត្តិសាស្ត្ររបស់ពួកគេកាលពីឆ្នាំមុនទេ។
ផ្ទុយទៅវិញ នៅថ្ងៃសៅរ៍ គណៈកម្មាធិការកូរ៉េខាងជើងដើម្បីបង្រួបបង្រួមប្រទេសដោយសន្តិភាពដែលគ្រប់គ្រងទំនាក់ទំនងអន្តរកូរ៉េបានជំរុញឲ្យក្រុងសេអ៊ូលចាត់វិធានការសកម្មបន្ថែមទៀតដើម្បីកែលម្អទំនាក់ទំនង។
គណៈកម្មាធិការនេះបាននិយាយនៅក្នុងសេចក្តីថ្លែងការណ៍មួយដែលផ្សាយដោយភ្នាក់ងារព័ត៌មានកណ្តាលកូរ៉េ (KCNA) ថា “ស្ថានការណ៍ធ្ងន់ធ្ងរមួយកំពុងត្រូវបានបង្កើតឡើងដែលអាចមើលឃើញពីការវិលត្រលប់ទៅរកអតីតកាលនៃគ្រោះមហន្តរាយនៅក្នុងគ្រោះថ្នាក់នៃសង្គ្រាម”។
ចំណែកឯសេចក្តីអត្ថាធិប្បាយមួយដែលធ្វើឡើងដោយកាសែតអភិរក្ស Dong-A Ilbo របស់កូរ៉េខាងត្បូងនៅថ្ងៃសៅរ៍បានកត់សម្គាល់ថា ទំនាក់ទំនងអន្តរកូរ៉េបានវិលត្រលប់ទៅរក “គំរូចាស់” វិញដែលក្រុងសេអ៊ូលព្យាយាមជាឯកភាពដើម្បីចូលរួមជាមួយក្រុងព្យុងយ៉ាងបើទោះបីជាត្រូវបានព្រងើយកន្តើយម្តងហើយម្តងទៀតដោយអ្នកជិតខាងរបស់ខ្លួនក៏ដោយ៕ AFP
Source: Kampuchea Thmey Daily
0 Comments