ភ្នំពេញ ៖ ស្ត្រីម្នាក់ ត្រូវបានគេប្រទះឃើញដេកស្លាប់នៅលើរទេះអេតចាយបង្កជាការភ្ញាក់ផ្អើលកាលពីថ្ងៃសៅរ៍ ៨រោច ខែចេត្រ ឆ្នាំកុរ ឯកស័ក ព.ស២៥៦២ ត្រូវនឹងថ្ងៃទី២៧ ខែមេសា ឆ្នាំ២០១៩ វេលាម៉ោង១១និង៣០នាទី នៅចំណុចផ្លូវលំ ជាប់របងដីក្រុមហ៊ុនគូកាកូអ៊ីន ភូមិ១ សង្កាត់ស្រះចក ខណ្ឌដូនពេញ រាជធានីភ្នំពេញ។
សមត្ថកិច្ចបានឲ្យដឹងថា អត្តសញ្ញាណសព ឈ្មោះ យាយ យួន ភេទស្រី អាយុប្រហែល៤២ឆ្នាំ មុខរបរមិនពិតប្រាកដ ស្នាក់នៅបន្ទប់ជួលលេខ២ ផ្ទះលេខ៦៩ ផ្លូវរថភ្លើង ក្រុម៥៤ ភូមិ១៤ សង្កាត់បឹងកក់១ ខណ្ឌទួលគោក រាជធានីភ្នំពេញ(សពមានលុយ បានជួលបន្ទប់ស្នាក់នៅក្នុងមួយយប់តម្លៃមួយម៉ឺនរៀល ពេលអត់លុយ សពដេកលើរទេះអេតចាយ)។
សមត្ថកិច្ចបានបន្តទៀតថា ដំណើររឿងហេតុនោះ គឺឆ្លងតាមការបំភ្លឺរបស់ ឈ្មោះ ម៉ៅ ស្រីពៅ ភេទស្រី អាយុ៤២ឆ្នាំ និង ឈ្មោះ ឈុន សេង ភេទស្រី អាយុ៤២ឆ្នាំ បានឲ្យដឹងថា សពឈ្មោះ យាយ យួន បានមកជួលបន្ទប់លេខ២ ផ្ទះ លេខ៦៩ ផ្លូវរថភ្លើង ក្រុម៥៤ ភូមិ១៤ សង្កាត់បឹងកក់១ ខណ្ឌទួលគោក រាជធានីភ្នំពេញ រយៈពេលប្រហែលប្រាំខែហើយ ដើម្បីរកស៊ីដើររើសអេតចាយ គ្មានប្តីកូន ឬបងប្អូនទេ ហើយគាត់មានជំងឺប្រចាំកាយ(ស្លេកស្លាំង) លុះព្រឹកម៉ោងប្រហែល១០ព្រឹក ថ្ងៃទី២៧ ខែមេសា ឆ្នាំ២០១៩ សពបានដេកលើរទេះអេតចាយរបស់គាត់ ដូចសព្វដង ដោយអាការៈហេវហត់ រហូតដល់វេលាម៉ោងប្រហែល១១និង៣០នាទី ថ្ងៃដដែល សពបានស្លាប់នៅលើរទេះអេតចាយតែម្ដង។
ឆ្លងតាមការពិនិត្យរបស់លោកឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យរាជធានីភ្នំពេញ និងការិយាល័យវិទ្យាសាស្ត្រកោសល្យវិច័យ នៃស្នងការដ្ឋាននគរបាលរាជធានីភ្នំពេញ សពស្លាប់ដោយសារគាំងបេះដូង។
បច្ចុប្បន្ន សព យកទៅបូជាតាមប្រពៃណីនៅវត្តទួល សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ៕
Source: Kampuchea Thmey Daily
0 Comments