ប៉ូលិសបាននិយាយនៅថ្ងៃសៅរ៍ថា មនុស្សចំនួន១៥នាក់ដោយក្នុងនោះមានកុមារ៦នាក់ផងដែរ បានស្លាប់អំឡុងប្រតិបត្តិការមួយរបស់កងកម្លាំងសន្តិសុខស្រីលង្កា បន្ទាប់ពីការវាយប្រហារនៃពិធីបុណ្យ Easter។ អំឡុងប្រតិបត្តិការនេះ អ្នកបំផ្ទុះគ្រាប់បែកអត្តឃាតបីនាក់ បានបំផ្ទុះខ្លួនឯងហើយអ្នកផ្សេងទៀតត្រូវបានបាញ់សម្លាប់។
បុរសទាំងបីនាក់នេះបានបំផ្ទុះគ្រាប់បែក។ គ្រាប់បែកក៏បានសម្លាប់ស្ត្រីចំនួន៣នាក់និងកុមារ៦នាក់ផងដែរនៅខាងក្នុងអ្វីដែលគេជឿថាជាផ្ទះសុវត្ថិភាពជីហាដមួយនៅជិតទីក្រុង Kalmunai ភាគខាងកើតកាលពីយប់ថ្ងៃសុក្រ។
ប៉ូលិសបាននិយាយនៅក្នុងសេចក្តីថ្លែងការណ៍មួយថា “បុរសបីនាក់ផ្សេងទៀតដែលក៏ត្រូវបានគេជឿថាជាអ្នកបំផ្ទុះគ្រាប់បែកអត្តឃាតផងដែរនោះគឺត្រូវបានគេប្រទះឃើញស្លាប់នៅខាងក្រៅផ្ទះនោះ”។
មន្ត្រីយោធាម្នាក់បាននិយាយថា ប៉ូលិសដែលគាំទ្រដោយកងទ័ពបានបាញ់តបតគ្នាជាមួយអ្នកនៅខាងក្នុងផ្ទះរយៈពេលជាងមួយម៉ោង។ មន្ត្រីដដែលបានបន្ថែមថា សាកសពទាំងនោះត្រូវបានគេរកឃើញនៅថ្ងៃសៅរ៍បន្ទាប់ពីប្រតិបត្តិការស្វែងរកមួយ។
កងកម្លាំងសន្តិសុខបានបង្កើនការស្វែងរកជនជ្រុលនិយមបន្ទាប់ពីក្រុមរដ្ឋឥស្លាមបានប្រកាសទទួលខុសត្រូវចំពោះការវាយប្រហារអត្តឃាតលើព្រះវិហារគ្រិស្តបីកន្លែងនិងសណ្ឋាគារប្រណីត៣កន្លែងដែលបានសម្លាប់មនុស្សយ៉ាងតិច២៥៣នាក់និងរងរបួសរាប់រយនាក់ទៀត។
ប្រតិបត្តិការរួមគ្នារវាងប៉ូលិសនិងកងទ័ពត្រូវបានធ្វើឡើងបន្ទាប់ពីមានការផ្តល់ព័ត៌មានថា អ្នកដែលទទួលខុសត្រូវគឺកំពុងលាក់ខ្លួននៅក្នុងតំបន់មួយនៃទីក្រុង Kalmunai ដែលមានចម្ងាយ៣៧០គីឡូម៉ែត្រភាគខាងកើតរដ្ឋធានី។
ប៉ូលិសបាននិយាយថា មិនមានជនរងគ្រោះស្ថិតនៅក្នុងចំណោមកងកម្លាំងសន្តិសុខទេ។
រដ្ឋាភិបាលបានសារភាពទទួលកំហុសឆ្គងសំខាន់ៗបើទោះបីជាលោកនាយករដ្ឋមន្ត្រី Ranil Wickremesinghe បាននិយាយថា លោកមិនដឹងអំពីការព្រមានណាមួយមុនការវាយប្រហារនោះទេដែលការលើកឡើងបែបនេះបានបង្កឲ្យមានជម្លោះរវាងលោកជាមួយប្រធានាធិបតី Maithripala Sirisena៕ AFP
Source: Kampuchea Thmey Daily
0 Comments