ភ្នំពេញ ៖ តាមប្រភពព័ត៌មានពី លោក ហ៊ួត ហ៊ុយ នាយករដ្ឋបាលសាលាខណ្ឌច្បារអំពៅ បានប្រាប់កម្ពុជាថ្មីថា កាលពីរសៀលថ្ងៃទី២៦មេសានេះ លោក ចេង មុនីរ៉ា អភិបាល នៃគណៈអភិបាលខណ្ឌច្បារអំពៅរួមដំណើរដោយលោក និងលោកស្រីអភិបាលរងខណ្ឌ បានអញ្ជើញចុះសាកសួរសុខទុក្ខលោក យី ធារ៉ាត់ ប្រធានការិយាល័យច្រកចេញចូលតែមួយដែលកំពុងមានជំងឺគ្រុនឈាម។
លោកនាយករដ្ឋបាលបានបន្តថា លោក យី ធារ៉ាត់ បានមានជំងឺគ្រុឌឈាមអស់រយៈពេលជិតមួយសប្ដាហ៍ទៅហើយ ប៉ុន្តែមកដល់រសៀលថ្ងៃទី២៦មេសានេះ លោកបានធូរស្រាល ហើយបានវិលមកសម្រាកព្យាបាលនៅលំនៅដ្ឋានរបស់លោកស្ថិតក្នុងសង្កាត់ព្រែកថ្មី ខណ្ឌច្បារអំពៅ។ ក្នុងពេលចុះសាកសួរសុខទុក្ខ លោក យី ធារ៉ាត់ នារសៀលថ្ងៃទី២៦នេះ លោក ចេង មុនីរ៉ា បាននាំយកថវិកា និងផ្លែឈើយកទៅផ្តល់ លោក យី ធារ៉ាត់ ដើម្បីយកទៅប្រើប្រាស់តាមការចាំបាច់។
គួរបញ្ជាក់ថា នៅពេលដែលមានមន្ត្រីរាជការក្រោមឱវាទមានជំងឺ ឬ ជួបគ្រោះថ្នាក់អ្វីមួយ គេសង្កេតឃើញ លោក ចេង មុនីរ៉ា អភិបាល នៃគណៈអភិបាលខណ្ឌច្បារអំពៅ តែងអញ្ជើញចុះសាកសួរសុខទុក្ខ និងផ្តល់ជាថវិកាយកទៅដោះស្រាយភ្លាមៗដែលសកម្មភាពនេះធ្វើឲ្យមន្ត្រីរាជការ ក៏ដូចជាប្រជាពលរដ្ឋមិនអាចបំភ្លេចគុណធម៌របស់លោកអភិបាលខណ្ឌបានឡើយ៕
Source: Kampuchea Thmey Daily
0 Comments