ប៉ូលិសបាននិយាយកាលពីថ្ងៃសុក្រថា បុរសម្នាក់នៅរដ្ឋកាលីហ្វ័រនីញ៉ាដែលបើកឡានបុកចូលទៅក្នុងហ្វូងមនុស្សដោយធ្វើឲ្យរបួសមនុស្ស៨នាក់គឺបានធ្វើបែបនេះដោយសារតែគាត់គិតថា ពួកគេជាជនមូស្លីម។
យោងតាមប៉ូលិសក្នុងទីក្រុង Sunnyvale ក្បែរទីក្រុង San Francisco បានឲ្យដឹងថា អ្នកបើកបរឈ្មោះ Isaiah Peoples អាយុ៣៤ឆ្នាំត្រូវបានគេរាយការណ៍ថា បានសំដៅទៅលើមនុស្សមួយគ្រួសារ។
សេវាសន្តិសុខសាធារណៈក្រុង Sunnyvale បាននិយាយនៅក្នុងសេចក្តីថ្លែងការណ៍មួយថា “មានភស្តុតាងថ្មីដែលថា ប្រជាពលរដ្ឋបានកំណត់គោលដៅលើជនរងគ្រោះដោយផ្អែកទៅលើពូជសាសន៍របស់ពួកគេហើយជឿថា ពួកគេគឺជាជនមូស្លីម”។
យោងតាមសារព័ត៌មានក្នុងស្រុកបានឲ្យដឹងថា សមាជិកបីនាក់មកពីគ្រួសារតែមួយគឺស្ថិតក្នុងចំណោមអ្នកដំណើរទាំង៨នាក់ដែលរងរបួស។ ក្នុងនោះមានឪពុក កូនប្រុសនិងកូនស្រី។
ទោះបីជាយ៉ាងណាក៏ដោយ សញ្ជាតិនិងសាសនានៃគ្រួសារនោះមិនត្រូវបានគេបញ្ចេញឲ្យដឹងទេ។
មេធាវីរបស់លោក Peoples បាននិយាយថា ឧបទ្ទវហេតុនេះគឺជាលទ្ធផលនៃជំងឺផ្លូវចិត្តយ៉ាងច្បាស់ក្រឡែតហើយគាត់នឹងស្វែងរកការព្យាបាលជំងឺផ្លូវចិត្តសម្រាប់កូនក្តីរបស់គាត់ដែលគាត់បានពិពណ៌នាថាជាទាហានជើងចាស់ដែលមានជំងឺស្ត្រេសបន្ទាប់ពីរងការប៉ះទង្គិច។
គួរបញ្ជាក់ថា ការសម្លាប់អ្នកកាន់សាសនាឥស្លាមយ៉ាងតិច៥០នាក់នៅវិហារឥស្លាមពីរកន្លែងកាលពីខែមុនក្នុងប្រទេសនូវែលហ្សេឡង់គឺជាការវាយប្រហារចុងក្រោយបំផុតប្រឆាំងនឹងជនមូស្លីមនៅក្នុងបណ្តាប្រទេសលោកខាងលិច៕ AFP
Source: Kampuchea Thmey Daily
0 Comments