សហរដ្ឋអាមេរិកកាលពីថ្ងៃសុក្រ បានទទួលការគាំទ្រពីគូប្រជែងរុស្ស៊ីនិងចិនស្តីពីរូបមន្តសំខាន់នៃកិច្ចព្រមព្រៀងសន្តិភាពមួយដែលខ្លួនកំពុងចរចានៅក្នុងប្រទេសអាហ្វហ្គានីស្ថាន។ នោះគឺជាការដកកងទ័ពដើម្បីឆ្លើយតបទៅនឹងការសន្យារបស់ក្រុមតាលីបង់ដែលថាខ្លួនមិនស្វាគមន៍ពួកជ្រុលនិយមបរទេស។
លោក Zalmay Khalilzad បេសកជនអាមេរិកដែលត្រូវបានគេកំណត់ថានឹងរៀបចំកិច្ចចរចាជុំចុងក្រោយជាមួយពួកតាលីបង់បានហៅការមូលមតិគ្នានេះថាជា “ព្រឹត្តិការណ៍ដ៏សំខាន់មួយ” នៅក្នុងកិច្ចខិតខំប្រឹងប្រែងដើម្បីបញ្ចប់សង្គ្រាមបន្ទាប់ពីលោកបានជួបតំណាងរុស្ស៊ីនិងចិននៅក្នុងទីក្រុងមូស្គូ។
សេចក្តីថ្លែងការណ៍រួមគ្នាមួយដោយប្រទេសទាំងបីបានអំពាវនាវឲ្យមានដំណើរការសន្តិភាពដែលដឹកនាំដោយអាហ្វហ្គានីស្ថាននិងចំណុចបញ្ជាក់ដែលគ្រោងនឹងបង្ហាញនៅក្នុងកិច្ចព្រមព្រៀងចុងក្រោយមួយ។
សេចក្តីថ្លែងការណ៍ដែលចេញដោយក្រសួងការបរទេសអាមេរិកបាននិយាយថា “ភាគីទាំងបីបានអំពាវនាវឲ្យមានការដកកងទ័ពបរទេសចេញពីប្រទេសអាហ្វហ្គានីស្ថានតាមសម្រួលនិងទទួលខុសត្រូវដែលជាផ្នែកមួយនៃដំណើរការសន្តិភាពទាំងមូល”។
ពួកគេក៏បាននិយាយផងដែរថា ក្រុមតាលីបង់បានធ្វើការប្តេជ្ញាចិត្តដើម្បីប្រយុទ្ធប្រឆាំងនឹងក្រុមជ្រុលនិយមរដ្ឋឥស្លាមនិងកាត់ផ្តាច់ទំនាក់ទំនងជាមួយក្រុមអាល់កៃដា។
សេចក្តីថ្លែងការណ៍ដដែលនេះបាននិយាយទៀតថា ក្រុមតាលីបង់បានសន្យាធានាថា តំបន់ដែលពួកគេគ្រប់គ្រងនឹងមិនត្រូវបានប្រើប្រាស់ដើម្បីគំរាមកំហែងដល់ប្រទេសណាមួយឡើយ។ សេចក្តីថ្លែងការណ៍នេះបានអំពាវនាវឲ្យពួកគេរារាំងពីការជ្រើសរើសភេរវករ បណ្តុះបណ្តាលនិងរៃអង្គាសមូលនិធិ។
លោកប្រធានាធិបតី Donald Trump មានឆន្ទៈក្នុងការបញ្ចប់សង្គ្រាមយូរបំផុតរបស់អាមេរិកដែលត្រូវបានចាប់ផ្តើមឡើងដើម្បីឆ្លើយតបទៅនឹងការវាយប្រហារថ្ងៃទី១១ខែកញ្ញាឆ្នាំ២០០១នៅពេលដែលអតីតរបបតាលីបង់បានផ្តល់ទីជ្រកកោនដល់ក្រុមអាល់កៃដា។
ប្រទេសរុស្ស៊ីនិងប្រទេសចិនមានការពាក់ព័ន្ធយ៉ាងខ្លាំងនៅក្នុងប្រទេសអាហ្វហ្គានីស្ថាន។ ទាហានសូវៀតប្រហែល១៤,០០០នាក់ត្រូវបានសម្លាប់នៅក្នុងប្រទេសអាហ្វហ្គានីស្ថានចាប់ពីឆ្នាំ១៩៧៩ដល់ឆ្នាំ១៩៨៩នៅក្នុងជម្លោះជាមួយទ័ពព្រៃឥស្លាមដែលគាំទ្រដោយអាមេរិក។
ប្រទេសចិនបានបង្កើនការចូលរួមរបស់ខ្លួននៅក្នុងប្រទេសអាហ្វហ្គានីស្ថានទាំងផ្នែកយោធានិងសេដ្ឋកិច្ចនៅពេលដែលខ្លួនបង្ហាញការព្រួយបារម្ភថា ពួកសកម្មប្រយុទ្ធអាចជ្រៀតចូលទៅក្នុងតំបន់ស៊ីនជាំងរបស់ខ្លួនដែលជាកន្លែងមានជនមូស្លីមភាគច្រើន៕ AFP
Source: Kampuchea Thmey Daily
0 Comments