នៅដើមខែឧសភាខាងមុខនេះ កីឡាករកីឡាការិនីរបស់សហព័ន្ធកីឡាយុទ្ធគុនចម្រុះ៣រូប ដែល២រូបនឹងចេញទៅប្រកួតក្នុងព្រឹត្តិការណ៍ONE FOR HONOR នារដ្ឋធានីហ្សាកាតា ប្រទេសឥណ្ឌូណេស៊ី និង១រូបចូលរួមប្រកួតក្នុងព្រឹត្តិការណ៍ one WARRIORS OF LIGHT នៅទីក្រុងបាងកក ប្រទេសថៃ។
យុទ្ធគុនចម្រុះ ឬMMA(Mixed Martial Art) ជាប្រភេទកីឡាប្រយុទ្ធ ដែលកំពុងតែពេញនិយមនៅក្នុងពិភពលោក វាជាប្រភេទកីឡា ដែលមានបង្កប់នៅក្បាច់ប្រដាល់គុនខ្មែរនៅក្នុងនោះ។
កីឡាករ MMA ជើងចាស់កម្ពុជាចាន់ រតនា និង កីឡាការិនីប្រដាល់គុនខ្មែរជម្រើសជាតិ នៅ ស្រីពៅ ត្រូវចេញទៅប្រកួតនៅក្នុងព្រឹត្តិការណ៍ONE FOR HONOR នារដ្ឋធានីហ្សាកាតា ប្រទេសឥណ្ឌូណេស៊ី ដែលនឹងប្រព្រឹត្តទៅនាថ្ងៃទី០៣ ខែឧសភា ឆ្នាំ២០១៩ ហើយកីឡាករប្រដាល់គុនខ្មែរសុខ ធី នឹងចេញទៅចូលរួមប្រកួតក្នុងព្រឹត្តិការណ៍ one WARRIORS OF LIGHT នៅទីក្រុងបាងកក ប្រទេសថៃ នាថ្ងៃទី១០ ខែឧសភា ឆ្នាំ២០១៩។
លោក វ៉ាត់ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជាស្ថាបនិកសហព័ន្ធកីឡាយុទ្ធគុនចម្រុះកម្ពុជា(MMA) បានមានប្រសាសន៍ឲ្យដឹងនៅក្នុងសន្និសីទសារព័ត៌មានដែលរៀបចំធ្វើនៅទីស្នាក់ការគណៈកម្មាធិការជាតិអូឡាំពិកកម្ពុជា នាថ្ងៃទី២៧ ខែមេសា ឆ្នាំ២០១៩នេះថា កីឡាប្រយុទ្ធមួយនេះ ទាមទារជំនាញច្បាស់លាស់ណាស់។ កីឡាករ-កីឡាការិនី ត្រូវតែចេះក្បាច់ប្រដាល់គុនខ្មែរ ក្បាច់បោក កាច់ តែកីឡាប្រភេទនេះមិនប្រកាន់ថា តើត្រូវតែចេះក្បាច់គុនអ្វីនោះទេ គឺទាមទារទៅលើការសម្រេចចិត្តរបស់បុគ្គលដែលជាអ្នកប្រយុទ្ធ។ ចេះការាត់តេ ឬ ហាប់គីដូ ប្រដាល់... សុទ្ធតែអាចចូលរួមប្រកួតបានទាំងអស់ ។
កីឡាករសុខ ធី ដែលត្រូវប្រកួតថ្ងៃទី១០ឧសភា នៅប្រទេសថៃនោះ បានអះអាងថា លើកនេះគេជួបជាមួយជើងឯកប្រចាំប្រទេសថៃ។ គេពិតជាខ្លាំងតែសុខ ធី អះអាងថា ទោះបីចាញ់ ឬ ឈ្នះគេត្រូវតែវ៉ៃឲ្យអស់ពីសមត្ថភាព។ រីឯកីឡាការិនីនូវ ស្រីពៅ វិញ ក៏បានអះអាងដែរថា គូប្រកួតរបស់គេលើកនេះល្អទាំងក្បាច់កាច់ ស្នៀតបោក និងការវាយដោយប្រយោល។
កីឡាករចាន់ រតនា ដែលជាអ្នកប្រយុទ្ធលើសង្វៀនMMAដ៏ចាស់វស្សានោះ បានដៃគូប្រកួតរបស់គេលើកនេះទំនងជាមិនខ្សោយទេ គេនឹងវាយឲ្យបានអស្ចារ្យ។ សូមបញ្ជាក់ថា កីឡាករចាន់ រតនា និង នូវ ស្រីពៅ ប្រកួតនៅប្រទេសឥណ្ឌូនេស៊ីថ្ងៃទី៣ឧសភា។
លោក ហ៊ុន ចាន់រាជ ដែលជាអគ្គលេខាធិការសហព័ន្ធបានបញ្ជាក់ដែរថា រាល់គ្រោះថ្នាក់ដែលកើតមាននៅក្នុងពេលប្រកួត គឺអ្នករៀបចំកម្មវិធីគេរ៉ាប់រងទាំងអស់។
លោកវ៉ាត់ ចំរើន វិញបានអះអាងថា កីឡាករ-កីឡាការិនីល្អៗរបស់កម្ពុជាសុទ្ធតែមានប័ណ្ណរបបសន្តិសុខសង្គមហេតុនេះ ប្រសិនជាមានបញ្ហាគេអាចប្រើប័ណ្ណនេះ ដើម្បីចូលមន្ទីរពេទ្យព្យាបាលបាន។ លោកក៏អះអាងដែរថា លោកនឹងរៀបចំឲ្យមានការប្រកួតជើងឯកថ្នាក់ជាតិ នៃកីឡាយុទ្ធគុនចម្រុះនេះ។
លោក វ៉ាត់ ចំរើន បានផ្ដាំផ្ញើ និងផ្តល់អនុសាសន៍ដល់កីឡាករ កីឡាការិនីMMA ថា សហព័ន្ធកីឡាយុទ្ធគុនចម្រុះទើបតែបង្កើតឡើងមិនដល់១ឆ្នាំទេ តែយើងមានកីឡាករល្បីល្បីដែលអាចចូលរួមការប្រកួតក្នុងព្រឹត្តិការណ៍ one fc នេះបាន។ ដូច្នេះកីឡាករ កីឡាការិនី យើងម្នាក់ៗ ត្រូវតែខិតខំប្រឹងប្រែងដើម្បីកិត្តិយសរបស់ជាតិ និងសង្គម។
លោកបញ្ជាក់ថា កីឡាចាញ់ឈ្នះគ្រាន់តែជាលទ្ធផល ប៉ុន្តែសំខាន់ជាងគេគឺ Perfomance ឬហៅថាបច្ចេកទេស បើទោះបីជាយើងចាញ់ដោយបច្ចេកទេសទាប គឺនឹងមានការមាក់ងាយ ហើយបើសិនជាលទ្ធផលយើងចាញ់ដោយបច្ចេកទេសខ្ពស់ ក៏ជាការចាញ់ដោយកិត្តិយស និយាយរួមចាញ់ ឬឈ្នះគឺដោយកិត្តិយស។ មួយទៀត គឺក្រមសីលធម៌ចាញ់ឈ្នះក៏ដោយ ក៏ត្រូវតែចាញ់ដោយត្រឹមត្រូវ ដោយអស់ចិត្ត និងដោយកិត្តិយសដែរ៕
Source: Kampuchea Thmey Daily
0 Comments