ភ្នំពេញ ៖ តារាកំប្លែងជើងចាស់មានប្រជាប្រិយភាព និងតែងបង្កភាពសប្បាយរីករាយជូនទស្សនិកជនគ្រប់វ័យ លោកតា សង់ ស៊ីស គិតមកទល់ពេលនេះ គឺលោកតាបានធ្លាក់ខ្លួនឈឺមានរយៈពេលជាច្រើនឆ្នាំមកហើយ ខណៈដែលអាជីពសិល្បៈ ត្រូវបានបាត់បង់សមត្ថភាពសម្តែងទាំងស្រុងផងនោះ។
ទន្ទឹមពេលជាមួយគ្នាដែរ វ័យកាន់តែជរា និង សុខភាពក៏ធ្លាក់ចុះទ្រុឌទ្រោមអន់ថយផងនោះ តារាកំប្លែង លោកតា សង់ស៊ីស ត្រូវបានទស្សនិកជន និងអ្នកគាំទ្រជាច្រើនបានបង្ហាញការអាណិតអាសូរ និងតែងជូនពរឲ្យលោកតាមានសុខភាពល្អជាសះស្បើយពីជំងឺ។ លើសពីនេះ កាលពីថ្ងៃទី២៦ ខែមេសា ឆ្នាំ២០១៩កន្លងមកនេះ លោកតា សង់ស៊ីស ក៏ទទួលបានការយកចិត្តទុកដាក់ និងឧបត្ថម្ភថវិកា ព្រមទាំងគ្រឿងបរិភោគមួយចំនួនពីខាងសមាគមសិល្បករខ្មែរ។
ប្រភពពីខាងសមាគមសិល្បករខ្មែរឲ្យដឹងថា តំណាងឲ្យសមាគមសិល្បករខ្មែរ អតីតតារាកំប្លែងនាយ ឃ្លោក បានជូនថវិកាមូលនិធិសិល្បករចាស់ជរា និង គ្រឿងឧបភោគបរិភោគមួយចំនួន និងជារៀងរាល់ខែដល់សិល្បករ លោកតា សង់ស៊ីស ដែលគាត់មានជំងឺប្រចាំកាយនិយាយពុំរួច បានធ្វើឲ្យលោកតាបាត់បង់នូវសមត្ថភាពសម្តែង។
ប្រភពដដែលបន្តទៀតថា សមាគមសិល្បករខ្មែរ សូមគោរពថ្លែងអំណរគុណដល់សប្បុរសជនទាំងអស់ដែលបានជួយឧបត្ថម្ភដល់ «មូលនិធិសិល្បករចាស់ជរា» ជាពិសេសសូមគោរពថ្លែងអំណរគុណដល់ សម្ដេចតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត ប៊ុន រ៉ានី ដែលបានឧបត្ថម្ភថវិកា៥ម៉ឺនដុល្លារ ក្នុង១ឆ្នាំ ក្នុងរយៈពេល៥ឆ្នាំ,អ្នកឧកញ៉ា លាង ឃុន អគ្គនាយកក្រុមហ៊ុន ជីប ម៉ុង និងអ្នកឧកញ៉ា ហុ ងពីវ អគ្គនាយក បុរីពិភពថ្មី ដែលបានឧបត្ថម្ភថវិកាក្នុងមួយនាក់៥ម៉ឺនដុល្លារ ក្នុង១ឆ្នាំ ក្នុងរយៈពេល៥ឆ្នាំ ដើម្បីទ្រទ្រង់ដល់សិល្បករចាស់ជរា។
គួររម្លឹកថា តារាកំប្លែងវ័យចំណាស់ លោកតា សង់ស៊ីស បានធ្លាក់ខ្លួនឈឺធ្ងន់ ដោយសារជំងឺលើសឈាម ដែលគិតមកទល់ពេលនេះ មានរយៈពេលប្រមាណជាង៣ឆ្នាំហើយ ដែលធ្វើឲ្យតារាកំប្លែងជើងចាស់រូបនេះមិនអាចបន្តអាជីពសម្តែងកំប្លែងបានដូចគ្រាមុនៗ។ ខណៈដែលមានមហាជនជាច្រើននៅតែអាណិត និងគាំទ្រ លោកតា សង់ស៊ីស ផងនោះ៕
Source: Kampuchea Thmey Daily
0 Comments