ភ្នំពេញ ៖ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថា កូរ៉េជាប្រជាធិបតេយ្យ ប៉ុន្តែបើមាននរណាម្នាក់ប្រព្រឹត្តខុសច្បាប់ ហើយមានដីកាពីតុលាការ ជននោះពិតជាត្រូវចាប់ខ្លួនដាក់គុកជាមិនខាន ហើយករណីនេះ ក៏ដូចនៅកម្ពុជាដែរ ពីព្រោះប្រជាធិបតេយ្យ ត្រូវគោរពច្បាប់។
សារនយោបាយរបស់អ្នកនាំពាក្យគណបក្សប្រជាជនកម្ពុជានេះ បានធ្វើឡើងតាមរយៈបណ្តាញទំនាក់ទំនាក់តេឡេក្រាមរបស់ខ្លួន នៅថ្ងៃទី២០ ខែមេសា ឆ្នាំ២០១៩ និងស្របពេលដែល ក្រុមប្រឆាំង ដែលមាននិន្នាការសមរង្ស៉ីនិយម ត្រៀមធ្វើបាតុកម្មមួយ ដែលមានឈ្មោះថា “បាតុកម្មភ្លើងទៀន” នៅលើទឹកដីប្រទេសកូរ៉េ ដើម្បីប្រឆាំងជាមួយរាជរដ្ឋាភិបាលកម្ពុជា។
សារនយោបាយរបស់ លោក សុខ ឥសាន បានបញ្ជាក់យ៉ាងដូច្នេះថា “ប្រទេសកូរ៉េជាប្រទេសប្រជាធិបតេយ្យ ប៉ុន្តែបើមាននរណាម្នាក់ប្រព្រឹត្តខុសច្បាប់ ហើយមានដីកាពីតុលាការ ជននោះប្រាកដជាមិនរួចខ្លួនទេ ច្បាស់ជាត្រូវចាប់ខ្លួនញាត់ចូលគុកជាមិនខាន។ រឿងនេះក៏មិនខុសគ្នានៅប្រទេសកម្ពុជាដែរ។ ប្រទេសកម្ពុជាជាប្រទេសប្រជាធិបតេយ្យ និងនីតិរដ្ឋ។ បើមានជនណាល្មើសច្បាប់ ប្រាកដជាត្រូវចាប់ញាត់គុកដូចនៅកូរ៉េដែរ ប៉ុន្តែដោយសារតែអាមេឧទ្ទាមក្រៅច្បាប់ពូកែរត់គេចខ្លួនទៅនៅបរទេស បានជានៅរួចខ្លួនដូចសព្វថ្ងៃ ប៉ុន្តែមិនអីទេ គង់មានថ្ងៃណាមួយ ភ្លេចខ្លួន នឹងរត់មករកជុចជាមិនខាន”។
តាមលោក សុខ ឥសាន ការចាប់ខ្លួនអ្នកទោស ដែលមានដីការចាបខ្លួនជាការងាយទេ ជាពិសេសជាមួយបណ្តាប្រទេស ដែលមានកិច្ចព្រមព្រៀងបត្យាប័នជាមួយគ្នារួចហើយ ប៉ុន្តែករណីនៅកូរ៉េខាងត្បូងរាជរដ្ឋាភិបាលកម្ពុជា មិនគិតពីកិច្ចព្រមព្រៀងបត្យាប័នជាមួយគ្នានោះទេ ដោយទុកឲ្យធ្វើតាមចិត្ត ហើយចង់ដឹងពីកម្លាំង ដែលគេហៅថា មហាបាតុកម្មពិភពលោកនោះ មានកម្រិតប៉ុនណា មានមនុស្សប៉ុន្មាននាក់ចូលរួម ហើយមានឥទ្ធិពលយ៉ាងណាដល់ផ្ទៃក្នុងប្រទេសកម្ពុជា ? ។
សូមបញ្ជាក់ថា លោក សម រង្ស៊ី និង សហការី មានដូចជា លោកស្រី មូរ សុខហួរ លោកម៉ែន សុថាវរិន្ទ្រ ជាដើម កាលពីថ្ងៃទី១៩ ខែមេសា ឆ្នាំ២០១៩ បានទៅដល់ប្រទេសកូរ៉េខាងត្បូង ដើម្បីចូលរួមប្រជុំជាមួយសកម្មជនប្រឆាំង និងធ្វើមហាបាតុកម្មមួយដែលមានឈ្មោះថា "បាតុកម្មភ្លើងទៀន" ជាលើកទី២នៅទីនោះ ហើយបាតុកម្មនេះ គ្រោងធ្វើឡើងស្របពេល ដែលពលរដ្ឋ និងពលករខ្មែរមួយចំនួន បានប្រកាសត្រៀមចូលរួម រាំលេងសប្បាយជាមួយការប្រគំតន្ត្រីដ៏ធំមួយ ដែលដឹកនាំដោយលោកឧកញ៉ា ឡេង ណាវ៉ាត់ត្រា នៅលើទឹកដីកូរ៉េខាងត្បូងនេះ ហើយការសម្តែង និងប្រគំតន្ត្រីនេះ មានការចូលរួមដោយតារាល្បីខ្មែរចំនួន១០នាក់ ដែលជាតារាល្បីៗពីប្រទេសកម្ពុជា ដែលមានដូចជា កញ្ញា ឡូ រ៉ាម៉ម, លោក ខេម,លោក វុទ្ធា, កញ្ញា បាន ម៉ុន្នីល័ក្ខ,លោក ចាន់ សម័យ, កញ្ញ៉ា យូរី, លោក Bmo លោក Tampo,ពិធីក កំពូលកូ លោក ប៉ែន ចំរ៉ុង និង លោក យឹម តាស្រង់។
ការប្រគំតន្ត្រីខាងលើ ធ្វើឡើងតែ១ថ្ងៃប៉ុណ្ណោះ ដោយមិនការលក់សំបុត្រឡើយ គឺ បងប្អូនពលករខ្មែរអាចចូលរួមទស្សនាដោយសេរី នៅទីក្រុង ប៊ូសាន សួនឧទ្យាន សាមណាក់ ក្បែរស្ថានីយរថភ្លើងសាសាងចាប់ពីម៉ោង៤ល្ងាចដល់ម៉ោង១០យប់។ តាមការរំពឹងទុក ព្រឹត្តិការណ៍នេះ នឹងមានបងប្អូនខ្មែរទៅចូលរួមទស្សនារាប់ម៉ឺននាក់។ តោះយ៉ាងណា ក្រុមអ្នករៀបចំធ្វើបាតុកម្ម បានចាត់ទុកតន្ត្រីនេះថា ជាការបំបែកកម្លាំងរបស់ពួកគេ ក្នុងការចូលរួមជាមួយ លោក សម រង្ស៉ី៕
Source: Kampuchea Thmey Daily
0 Comments