អាជ្ញាធរអាមេរិកបានចាប់ខ្លួនអតីតទាហានម៉ារីនអាមេរិកម្នាក់ដែលជាសមាជិកនៃក្រុមមួយដែលត្រូវបានគេចោទប្រកាន់ថាបានឆ្មក់ចូលស្ថានទូតកូរ៉េខាងជើងនៅទីក្រុងម៉ាឌ្រីដកាលពីខែកុម្ភៈនិងបានលួចគ្រឿងអេឡិចត្រូនិច។ នេះបើយោងតាមប្រភពពីរដែលដឹងពីការចាប់ខ្លួននេះ។
យោងតាមមន្ត្រីអនុវត្តច្បាប់ម្នាក់និងប្រភពមួយដែលជិតស្និទ្ធនឹងក្រុមនេះបានឲ្យដឹងថា លោក Christopher Ahn ត្រូវបានចាប់ខ្លួនកាលពីថ្ងៃព្រហស្បតិ៍និងបានបង្ហាញខ្លួនកាលពីថ្ងៃសុក្រនៅក្នុងតុលាការសហព័ន្ធនៃទីក្រុង Los Angeles។
នៅក្នុងព័ត៌មានដែលទាក់ទងមួយទៀត ភ្នាក់ងារសហព័ន្ធអាមេរិកប្រដាប់អាវុធកាលពីថ្ងៃព្រហស្បតិ៍បានវាយឆ្មក់អគាររបស់លោក Adrian Hong ដែលជាមេដឹកនាំក្រុមការពារស៊ីវិល Cheolima។ វាជាក្រុមមួយដែលស្វែងរកការផ្ដួលរំលំមេដឹកនាំកូរ៉េខាងជើងលោកគីមជុងអ៊ុនហើយក្រុមនេះត្រូវបានគេស្តីបន្ទោសថាបានវាយឆ្មក់ស្ថានទូតកាលពីថ្ងៃទី២២ខែកុម្ភៈ។ ប្រភពនោះបាននិយាយថា លោក Hong មិនមានវត្តមាននៅឯលំនៅដ្ឋានរបស់គាត់ទេនៅពេលការវាយឆ្មក់កើតឡើង។
ទោះបីជាយ៉ាងណាក៏ដោយ ក្រសួងយុត្តិធម៌អាមេរិកបានបដិសេធធ្វើអត្ថាធិប្បាយ។
យោងតាមតុលាការអេស្ប៉ាញបានឲ្យដឹងថា មនុស្សមួយក្រុមមានគ្នាយ៉ាងតិច១០នាក់បានវាយលុកចូលស្ថានទូត ឃាត់ខ្លួននិងវាយធ្វើបាបលើបុគ្គលិកមួយចំនួនហើយបានចាប់ពួកគេធ្វើជាចំណាប់ខ្មាំងជាច្រើនម៉ោងមុនពេលគេចខ្លួន។
ក្រុមអ្នកស៊ើបអង្កេតអេស្ប៉ាញបាននិយាយថា ក្រុមអ្នកឈ្លានពានបានដកយកកុំព្យូទ័រនិង USB Flashចេញពីស្ថានទូតមុនពេលភៀសខ្លួនទៅសហរដ្ឋអាមេរិក។
ប្រភពតុលាការរបស់អេស្ប៉ាញបាននិយាយនៅសប្តាហ៍នេះថា សម្ភារៈទាំងនេះត្រូវបានប្រគល់ដោយអាជ្ញាធរអេស្ប៉ាញទៅឲ្យបេសកកម្មរបស់ក្រុងព្យុងយ៉ាងវិញបន្ទាប់ពីត្រូវបានប្រគល់ដោយ FBI ទៅឲ្យតុលាការអេស្ប៉ាញដែលស៊ើបអង្កេតការវាយឆ្មក់នេះនៅពីរសប្តាហ៍មុននោះ៕
REUTERS
Source: Kampuchea Thmey Daily
0 Comments