តាកែវ ៖ ជនរងគ្រោះបើកបរម៉ូតូយ៉ាម៉ាហាកម្លាំង១៥០សេសេមួយគ្រឿង ក្នុងល្បឿនលឿន ជ្រុលចង្កូតទៅបុករថយន្តដឹកទំនិញពីក្រោយមួយគ្រឿង បណ្តាលឲ្យម្ចាស់ម៉ូតូស្លាប់ភ្លាមៗមួយរំពេចនៅនឹងកន្លែងកើតហេតុ។
ករណីគ្រោះថ្នាក់ចរាចរណ៍រវាងរថយន្ត និងម៉ូតូនេះ កើតឡើងនៅវេលាម៉ោង២០និង០០នាទី ថ្ងៃទី២១ ខែមេសា ឆ្នាំ២០១៩ នៅលើផ្លូវជាតិលេខ២ ចន្លោះគីឡូម៉ែត្រលេខ ៨១-៨២ ស្ថិតក្នុងភូមិសូចាន់ សង្កាត់រកាក្រៅ ក្នុងដូនកែវ ខេត្តតាកែវ។ តាមការឲ្យដឹងពីប៉ូលិសក្រុងដូនកែវបានប្រាប់ថា ភាគីខាងរថយន្តម៉ាកហ៊ីយ៉ាន់ដាយ ពណ៌ស ពាក់ស្លាក់លេខ តាកែវ 3A 3176 បើកបរដោយឈ្មោះ សេង សារុំ ភេទប្រុស អាយុ២៨ឆ្នាំ មុខរបរបើកបររថយន្ត មានទីលំនៅភូមិសូចាន់ សង្កាត់រកាក្រៅ ក្រុងដូនកែវ ខេត្តតាកែវ។ ចំណែកភាគីជនរងគ្រោះខាងម៉ូតូមាន ឈ្មោះ ម៉ៅ រ៉ាវី ភេទប្រុស អាយុ២៥ឆ្នាំ មុខរបរធ្វើស្រែ រស់នៅភូមិព្រៃមៀន ឃុំព្រៃស្លឹក ស្រុកទ្រាំង ខេត្តតាកែវ ដោយឡែកម៉ូតូដែលបើកបរម៉ាកយ៉ាម៉ាហាអិចសង់ទ័រ ពណ៌ក្រហមលាយស គ្មានស្លាក់លេខ។
ករណីនេះដែរ តាមសាក្សីនៅក្បែរកន្លែងកើតហេតុបានប្រាប់ថា មុខពេលកើតហេតុភាគីជនរងគ្រោះបើកបរម៉ូតូក្នុងល្បឿនលឿន ពីទិសខាងត្បូងទៅជើង មិនមានកញ្ចក់មើលក្រោយ និងមិនពាក់មួកសុវត្ថិភាព លុះមកដល់កន្លែងកើតហេតុវ៉ារថយន្តមិនផុត ក៏បុកពីក្រោយពេញទំហឹងបណ្តាលឲ្យដួលបោកក្បាលស្លាប់ភ្លាមៗមួយរំពេចនៅនឹងកន្លែងកើតហេតុតែម្តងទៅ។
ក្រោយកើតហេតុ ប៉ូលិសជំនាញក្រុងដូនកែវបានចុះដល់ធ្វើកំណត់ហេតុវាស់វែង និងយកវត្ថុតាងទាំងពីរគ្រឿងមករក្សាទុកនៅអធិការដ្ឋាននគរបាលក្រុងដូនកែវ ដើម្បីដោះស្រាយគ្នាតាមនីតិវិធីនៅពេលក្រោយ។ ចំណែកសពជនរងគ្រោះ បានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments