ក្រុមបាល់ទាត់ខេត្តកំពង់ចាម ត្រូវទទួលក្រុមបឹងកេតអែហ្វស៊ី ហើយក្រុមអគ្គស្នងការដ្ឋាននគរបាលជាតិ (ប៉ូលីស) ត្រូវប៉ះក្រសួងការពារជាតិ (ទ័ព) ខណៈក្រុមសូលទីឡូជួបក្រុមជើងឯកឆ្នាំចាស់ណាហ្គាវើល និងក្រុមព្រះខ័នរាជស្វាយរៀង ប៉ះក្រុមភ្នំពេញក្រោន ក្នុងសប្ដាហ៍ទី៤នៃពានរង្វាន់លីគកំពូលកម្ពុជា (Metfone Cambodian League) រដូវកាលឆ្នាំ២០១៩ នៅល្ងាចថ្ងៃអាទិត្យទី២១ ខែមេសា ឆ្នាំ២០១៩។
*កំពង់ចាម ទទួលបឹងកេត
ក្រុមខេត្តកំពង់ចាម ត្រូវបើកទ្វារទីលានវិទ្យាល័យ ប៊ុនរ៉ានីហ៊ុនសែន មេមត់ នៅវេលាម៉ោង ៣និង៣០នាទីរសៀល ខណៈប្រកួតនេះមានតាមទំព័រហ្វេសប៊ុករបស់ CNCC ផងដែរ។ ក្រុមទាំង២មិនធ្លាប់មានប្រវត្តិប៉ះគ្នាពីមុនមកទេ ព្រោះក្រុមខេត្តកំពង់ចាម ទើបតែទទួលសិទ្ធិចូលលេងលីគកំពូលកម្ពុជា នៅឆ្នាំ២០១៩នេះប៉ុណ្ណោះ។
ក្រុមខេត្តកំពង់ចាម កំពុងតែដឹកនាំដោយលោក ថុល កុលស ជាគ្រូបង្វឹកហើយក្រុមនេះបានរបូតគ្រាប់បាល់រហូតដល់២២គ្រាប់ក្នុងចំណោម២ប្រកួតចុងក្រោយពោលគឺចាញ់ក្រុមអង្គរថាយហ្គឺរ ១១ទល់០ និងបន្តចាញ់ក្រសួងការពារជាតិ ១១ទល់០ ខណៈប្រកួតបើកឆាកបានឈ្នះក្រុមអគ្គីសនីកម្ពុជា ១ទល់០។ ចំណែកក្រុមបឹងកេតវិញ កំពុងតែឃ្លានជ័យជម្នះព្រោះថាប្រកួតបើកឆាក៣លើកមកនេះហាក់មិនសូវសមប្រកបប៉ុន្មាននោះទេ ក្រោយឈ្នះភ្នំពេញក្រោន ៣ទល់២ ហើយចាញ់អគ្គីសនីកម្ពុជា ១ទល់០ និងស្មើគ្នាជាមួយអង្គរថាយហ្គឺរ ១ទល់១។
*អគ្គស្នងការដ្ឋាននគរបាលជាតិ ប៉ះក្រសួងការពារជាតិ
ក្រុមអគ្គស្នងការដ្ឋាននគរបាលជាតិ ត្រូវប៉ះក្រុមក្រសួងការពារជាតិ នៅវេលាម៉ោង៣និង៣០នាទីរសៀលលើទីលានអគ្គីសនីកម្ពុជា។ ប្រកួតនេះមានផ្សាយផ្ទាល់តាមប៉ុស្តិ៍ BTV News ផងដែរ។ បើងាកមើលប្រវត្តិជួបគ្នាចំនួន៧លើកចុងក្រោយឃើញថា ក្រុមក្រសួងការពារជាតិ ឈ្នះលើអគ្គស្នងការដ្ឋាននគរបាលជាតិទាំង៧លើក។
ក្រុមអគ្គស្នងការដ្ឋាននគរបាលជាតិ កំពុងតែដឹកនាំដោយលោក ប្រាក់ សុវណ្ណារ៉ា អតីតគ្រូបង្វឹករបស់ក្រុមជម្រើសជាតិកម្ពុជា ស្របពេលដែលលទ្ធផលហាក់មិនសូវសមប្រកបសោះពោលគឺបានប្រកួតចាញ់ក្រុមព្រះខ័នរាជស្វាយរៀង ២ទល់០ ហើយឈ្នះអាស៊ីអឺរ៉ុប ៣ទល់២ និងចុងក្រោយចាញ់ណាហ្គាវើល ៦ទល់០។ ចំណែកក្រុមក្រសួងការពារជាតិ វិញកំពុងតែឈរលេខ២កំពូលតារាងក្រោយប្រកួតឈ្នះ២លើកនិងស្មើគ្នា១លើក។ លោក ភា សុភត្រា ដែលជាគ្រូបង្វឹកបាននាំយកកីឡាករបរទេសសុទ្ធសឹងជាខ្សែប្រយុទ្ធនៅរដូវកាលនេះដើម្បីចាប់ដៃជាមួយកីឡាករខ្មែរដែលមានកម្រិតបច្ចេកទេសនៅតំបន់ការពារនិងបម្រើបានល្អ។
*សូលទីឡូអង្គរ ប៉ះណាហ្គាវើល
ក្រុមសូលទីឡូអង្គរ ត្រូវបើកទ្វារទីលានកីឡដ្ឋានខេត្តសៀមរាប របស់ខ្លួនទទួលក្រុមជើងឯកឆ្នាំចាស់ណាហ្គាវើល នៅវេលាម៉ោង៣និង៣០នាទីរសៀល ហើយប្រកួតនេះមានផ្សាយផ្ទាល់តាមហ្វេសប៊ុករបស់សារព័ត៌មានកម្ពុជាថ្មី ផងដែរ។ ងាកទៅមើលប្រវត្តិប៉ះគ្នា២ដង គឺក្រុមណាហ្គាវើល ឈ្នះទាំង២លើកដោយជើងទី១ឈ្នះក្នុងលទ្ធផល ៤ទល់១ ហើយជើងទី២បន្តឈ្នះ២ទល់០ ទៀត។
កីឡាករជប៉ុនKento Fujihara ដើរតួជាប្រធានក្រុមលើទីលានផងនិងជាគ្រូបង្វឹកផង ស្របពេលក្រុមនេះកំពុងតែឈរលេខ២បាតតារាងក្រោយប្រកួត៣លើក មិនដែលឈ្នះតែស្មើគ្នា១លើកនិងចាញ់២លើក។ ជ័យជម្នះក្នុងប្រកួតនេះគឺចាំបាច់ណាស់សម្រាប់សូលទីឡូអង្គរ ក្នុងការដកខ្លួនចេញពីបាតតារាង។ ចំណែកក្រុមណាហ្គាវើល ទើបតែខកចិត្តនៅក្នុងប្រកួតពានរង្វាន់ AFC Cup 2019 ថ្មីៗនេះក្រោយចាញ់ម្ចាស់ផ្ទះ Tampine Rovers របស់សឹង្ហបុរី ៣ទល់២ ខណៈលោក មាស ចាន់ណា ដែលជាគ្រូបង្វឹកមានសម្ពាធជាងរាល់ឆ្នាំព្រោះត្រូវរៀបចំក្រុមប្រកួត៣ពានរង្វាន់ផ្សេងគ្នាគឺក្នុងពានរង្វាន់ AFC Cup,ពានរង្វាន់លីគកំពូលកម្ពុជា និងពានរង្វាន់សម្តេចតេជោ ហ៊ុន សែន ផងដែរ។
*ព្រះខ័នរាជស្វាយរៀង ប៉ះភ្នំពេញក្រោន
ក្រុមបាល់ទាត់ព្រះខ័នរាជស្វាយរៀង ត្រូវទទួលស្វាគមន៍ក្រុមភ្នំពេញក្រោន នៅវេលាម៉ោង៦ល្ងាចលើទីលានកីឡដ្ឋានខេត្តស្វាយរៀង ហើយប្រកួតនេះដែរក៏មានផ្សាយផ្ទាល់តាមប៉ុស្តិ៍ទូរទស្សន៍ BTV News ផងដែរ។ សម្រាប់ប្រវត្តិប៉ះគ្នា១០លើកចុងក្រោយឃើញថាក្រុមព្រះខ័នរាជស្វាយរៀង ធ្លាប់ឈ្នះបាន៥លើក ហើយភ្នំពេញក្រោនឈ្នះបាន៥លើក និងធ្លាប់បានស្មើគ្នា១លើក។
លោក Conor Nestor ដែលជាគ្រូបង្វឹកក្រុមព្រះខ័នរាជស្វាយរៀង រំពឹងថា កូនក្រុមនឹងបន្តធ្វើបានល្អដើម្បីរក្សាកៅអីកំពូលតារាងបន្តទៀត ក្រោយប្រកួតកន្លងមកក្រុមនេះមិនទាន់ស្គាល់បរាជ័យនោះទេ ហើយក៏មិនទាន់មានក្រុមណាអាចទាត់បញ្ចូលទីក្រុមខ្លួនបានឡើយ។ ចំណែកក្រុមភ្នំពេញក្រោន ដែលដឹកនាំដោយលោក Leonardo Vitorino អតីតគ្រូបង្វឹកក្រុមជម្រើសជាតិកម្ពុជា ក៏បង្ហាញខ្លួនមិនសូវបានល្អផងដែរក្រោយចាញ់ក្រុមបឹងកេត ៣ទល់២ នៅថ្ងៃបើកឆាកតែយកឈ្នះយុវជនបាទី២ទល់០ និងចុងក្រោយចាញ់វិសាខា ៣ទល់១៕
Source: Kampuchea Thmey Daily
0 Comments