ក្រុមបាល់ទាត់ព្រះខ័នរាជស្វាយរៀង នឹងបើកទ្វារកីឡដ្ឋានខេត្តស្វាយរៀង របស់ខ្លួនទទួលស្វាគមន៍ក្រុមភ្នំពេញក្រោន នៅវេលាម៉ោង៦ល្ងាចថ្ងៃអាទិត្យ ទី២១ ខែមេសា ឆ្នាំ២០១៩ នេះក្នុងសប្ដាហ៍ទី៤ នៃពានរង្វាន់លីគកំពូលកម្ពុជា (Metfone Cambodian League) រដូវកាលឆ្នាំ២០១៩ ខណៈប្រកួតនេះមានផ្សាយផ្ទាល់តាមប៉ុស្តិ៍ទូរទស្សន៍ BTV News ផងដែរ។
ទន្ទឹមនឹងគ្នានេះដែរ កីឡាករ អ៊ុក សុធី ដែលជាប្រធានក្រុមភ្នំពេញក្រោន មានរហស្សនាមថា Messi បានលើកឡើងទៅទស្សនៈរបស់ខ្លួនមុនធ្វើដំណើរទៅកាន់ខេត្តព្រំដែនកម្ពុជា-វៀតណាមថាក្រុមទាំងមូលមានការរៀបចំបានល្អ បើទោះបីជាមានការឈប់សម្រាកប៉ុន្មានថ្ងៃក្តីនាថ្ងៃចូលឆ្នាំប្រពៃណីខ្មែរក្តី។ ខ្សែបម្រើកណ្តាលរូបនេះបានលើកឡើងថា « ក្រុមកីឡាកររបស់យើងមានការត្រៀមខ្លួនបានល្អ ព្រោះពួកយើងបានសម្រាកនៅពេលចូលឆ្នាំខ្មែរ ហើយក្រោយមកពួកយើងក៏បានចូលធ្វើការហ្វឹកហាត់វិញត្រឹមត្រូវ នឹងមានពេលវេលាគ្រប់គ្រាប់សម្រាប់ការត្រៀមខ្លួនប្រកួតនេះផងដែរ»។
កីឡាករដែលមានប្រភពពីខេត្តបាត់ដំបង រូបនេះបន្តថា «តាមរយៈការប្រកួតរបស់ក្រុមស្វាយរៀង នាពេលកន្លងមកគឺពួកគេមានការការពារល្អ ដោយមិនទាន់មានក្រុមណាទាត់បញ្ចូលទីពួកគេនៅឡើយទេ ប៉ុន្តែពួកយើងក៏មានអ្នកប្រយុទ្ធល្អដូចគ្នា ដូច្នេះខ្ញុំសង្ឃឹមថា យើងនឹងអាចរកគ្រាប់បាល់បាននាពេលប្រកួតខាងមុខនេះ។ ចំពោះចំណុចដែលយើងត្រូវប្រុងប្រយ័ត្នបន្ថែមនៅការប្រកួតនេះគឺចំណុចការពាររបស់យើង ព្រោះពួកគេមានកីឡាករប្រយុទ្ធដែលមានល្បឿនលឿន។ ដូច្នេះការវាយបកក៏លឿនដូចគ្នា សរុបមកនៅពេលដែលយើងប្រយុទ្ធយើងក៏ត្រូវរៀបចំការការពារដែរ»។
ជាចុងក្រោយកីឡាករវ័យ៣១ឆ្នាំរូបនេះបានបន្ថែមថា « ថ្វីត្បិតតែក្រុមរបស់គេកំពុងតែឡើងជើងដែលស្ថិតនៅកំពូលតារាងក៏ពិតមែន ប៉ុន្តែក្រុមរបស់យើងបានប្តេជ្ញាចិត្តហើយថានឹងធ្វើឲ្យបានល្អបំផុតចាប់ពីប្រកួតនេះតទៅ ព្រោះយើងត្រូវការឈ្នះជាដាច់ខាតដើម្បីការប្រកួតប្រជែងដណ្តើមពានរង្វាន់លីគកំពូលកម្ពុជានៅឆ្នាំនេះ»។
សូមរំលឹកថា ប្រវត្តិប៉ះគ្នា៥លើកចុងក្រោយក្នុងពានរង្វាន់លីកកំពូលកម្ពុជាក្រុមព្រះខ័នរាជស្វាយរៀង បានយកឈ្នះចំនួន៣លើក ហើយក្រុមភ្នំពេញក្រោន វិញធ្លាប់ឈ្នះបាន២លើក។ បើមើលចំណាត់ថ្នាក់បណ្តោះអាសន្នក្រោយឆ្លងកាត់ការប្រកួត៣លើកមកនេះក្រុមព្រះខ័នរាជស្វាយរៀង កំពុងតែឈរកំពូលតារាងដែលមានសមាជិកសរុបទាំង១៤ក្រុម ក្រោយឈ្នះទាំង៣លើកមាន៩ពិន្ទុក្នុងដៃ ខណៈក្រុមភ្នំពេញក្រោយវិញឈរចំណាត់ថ្នាក់លេខ៩ មាន៣ពិន្ទុក្នុងដៃ៕
Source: Kampuchea Thmey Daily
0 Comments