លោក Conor Nestor គ្រូបង្វឹករបស់ក្រុមព្រះខ័នរាជស្វាយរៀង ដែលធ្លាប់ដឹកនាំក្រុមយកឈ្នះលើក្រុមភ្នំពេញក្រោន ដោយលទ្ធផល៦ទល់៣ កាលពីរដូវកាលឆ្នាំ២០១៨ កន្លងទៅលើទឹកដីខេត្តស្វាយរៀង របស់ខ្លួន នៅពេលនេះគ្រូបង្វឹកអៀងឡង់រូបនេះមានជំនឿចិត្តលើកូនក្រុមរបស់ខ្លួនថានឹងបន្តរកពិន្ទុជូនអ្នកគាំទ្រមុនការប្រកួតមកដល់នៅល្ងាចថ្ងៃអាទិត្យសប្ដាហ៍នេះ។
ក្រុមបាល់ទាត់ព្រះខ័នរាជស្វាយរៀង ត្រូវទទួលស្វាគមន៍ក្រុមភ្នំពេញក្រោន នៅវេលាម៉ោង៦ល្ងាចថ្ងៃអាទិត្យ ទី២១ ខែមេសា ឆ្នាំ២០១៩ នេះក្នុងសប្ដាហ៍ទី៤ នៃពានរង្វាន់លីគកំពូលកម្ពុជា (Metfone Cambodian League) រដូវកាលឆ្នាំ២០១៩ លើទីលានកីឡដ្ឋានខេត្តស្វាយរៀង ហើយប្រកួតនេះដែរក៏មានផ្សាយផ្ទាល់តាមប៉ុស្តិ៍ទូរទស្សន៍ BTV News ផងដែរ។
គ្រូបង្វឹកវ័យ៣៤ឆ្នាំខាងលើបានលើកឡើងមុនការប្រកួតមកដល់ថា « ខ្ញុំគិតថារដូវកាលនេះក្រុមទាំង២មានភាពខុសគ្នាច្រើន ចឹងលទ្ធផលរដូវកាលមុនគឺពុំមានន័យ។ យើងចង់បង្កើតនូវអ្វីថ្មីសម្រាប់អ្នកគាំទ្ររបស់យើង និងខ្ញុំដឹងថាកីឡាករអាចផ្តល់គ្រប់យ៉ាងសម្រាប់ជ័យជម្នះ»។ ជាមួយគ្នានោះដែរ លោក Conor ក៏បានបន្ថែមពីផលវិបាកមួយចំនួនដោយលើកឡើងថា ភ្នំពេញក្រោន មានកីឡាករល្អច្រើនដែលអាចឈ្នះការប្រកួត ដូច្នេះត្រូវតែគោរពគូប្រកួត និងការពារជាក្រុម ប៉ុន្តែលោកក៏មានកីឡាករអាចឈ្នះការប្រកួតផងដែរ។ លោកមានជឿចិត្តថាប្រកួតនេះគឺជាប្រកួតជក់ចិត្ត។
លោកគ្រូបង្វឹកកំពុងកាន់អាជ្ញាប័ណ្ណUEFA A license ខាងលើបានដឹកនាំក្រុមព្រះខ័នរាជស្វាយរៀង ឈរកំពូលតារាងបណ្តោះអាសន្នក្រោមប្រកួតបាន៣លើកឈ្នះទាំង៣លើកពោលគឺឈ្នះអគ្គស្នងការដ្ឋាននគរបាលជាតិ ២ទល់០ បន្តឈ្នះសូលទីឡូអង្គរ ១ទល់០ និងចុងក្រោយឈ្នះគីរីវង់សុខសែនជ័យ ២ទល់០។ កាលពីរដូវកាលមុនលោក Conor Nestor ដឹកនាំក្រុមព្រះខ័នរាជស្វាយរៀង ឈ្នះក្រុមភ្នំពេញក្រោន ៦ទល់៣ ក្នុងជើងទី១នៅខេត្តស្វាយរៀង តែជើងទី២ធ្វើឡើងនៅកីឡដ្ឋាន RSN Stadium របស់ភ្នំពេញក្រោនវិញម្តងគឺបានចាញ់វិញ២ទល់១៕
Source: Kampuchea Thmey Daily
0 Comments