ក្រុមបាល់ទាត់អាស៊ីអឺរ៉ុប ក្រុមអង្គរថាយហ្គឺរ និងក្រុមវិសាខា សុទ្ធតែរកបាន៣ពិន្ទុដូចគ្នាប្រចាំសប្ដាហ៍ទី៤នៃពានរង្វាន់លីគកំពូលកម្ពុជា (Metfone Cambodian League) រដូវកាលឆ្នាំ២០១៩ នាល្ងាចថ្ងៃសៅរ៍ ទី២០ ខែមេសា ឆ្នាំ២០១៩។
ចំពោះក្រុមអាស៊ីអឺរ៉ុប បានយកឈ្នះលើក្រុមគីរីវង់សុខសែនជ័យ ដោយលទ្ធផល២ទល់១ លើទីលានកីឡដ្ឋាន AEU Sport Park ម្តុំអរិយក្សត្រ។ កីឡាករជនជាតិកូឌីវ័រ Abdel Kader Coulibali បានរកគ្រាប់បាល់២គ្រាប់ម្នាក់ឯងនាំជ័យជម្នះឲ្យម្ចាស់ផ្ទះអាស៊ីអឺរ៉ុប គឺនៅនាទីនាទី២និងនាទី៣៥ ខណៈ១គ្រាប់វាយបករបស់ក្រុមគីរីវង់សុខសែនជ័យ រកបានដោយកីឡាករជប៉ុន Yuto Sasaki នៅនាទី៤៥+២ មុនចប់តង់ទី១។
ចំណែកក្រុមយុវជនសាលាបាល់ទាត់ជាតិបាទី វិញបានប្រកួតចាញ់ក្រុមអង្គរថាយហ្គឺរ ដោយលទ្ធផល៦ទល់០ លើទីលានមជ្ឈមណ្ឌលនិងសាលាបាល់ទាត់ជាតិបាទី ក្នុងខេត្តតាកែវ។ កីឡាករជនជាតិនីហ្សេរីយ៉ា Okereke Timothy រកបានគ្រាប់បាល់៤គ្រាប់ម្នាក់ឯងគឺនៅនាទី ១៣,៤៩,៥៣,៦៧ ស្របពេលកីឡាករជប៉ុន Joichiro Sugiyama រកបានគ្រាប់បាល់ទី៥ នៅនាទី៦៥ និងកីឡាករ ពៅ ភារិទ្ធិ បន្ថែមគ្រាប់បាល់ទី៦នៅនាទី៧២។
ចុងក្រោយក្រុមវិសាខា បានយកឈ្នះលើក្រុមអគ្គីសនីកម្ពុជា ៤ទល់០ លើទីលានវិសាខា របស់ខ្លួនក្នុងរាជធានីភ្នំពេញ។ គ្រាប់បាល់ជ័យជម្នះទាំង៤គ្រាប់របស់ក្រុមវិសាខា គឺរកបានដោយកីឡាករកូរ៉េខាងជើង Pak Song-chol នៅនាទី១២ ហើយកីឡាករ ទិត្យ ឌីណា បន្ថែមគ្រាប់ទី២នៅនាទី៤៧ កីឡាករជនជាតិអ៊ីស្រាអែល Evangelos Skraparas រកបានគ្រាប់បាល់ទី៣នៅនាទី៦៧ និងកីឡាករជប៉ុន Masaaki Ideguchi រកបានគ្រាប់បាល់ចុងក្រោយនៅនាទី៧៣។
ចំណែក៤គូផ្សេងទៀតប្រចាំសប្ដាហ៍ទី៤នេះ ត្រូវប្រកួតនៅថ្ងៃអាទិត្យ ទី២១ ខែមេសា ឆ្នាំ២០១៩វិញម្តងដោយក្រុមខេត្តកំពង់ចាម ទទួលក្រុមបឹងកេត នៅវេលាម៉ោង៣:៣០នាទីរសៀលលើទីលានបាល់ទាត់វិទ្យាល័យ ប៊ុន រ៉ានី ហ៊ុន សែន មេមត់ ហើយក្រុមព្រះខ័នរាជស្វាយរៀង ប៉ះក្រុមភ្នំពេញក្រោន នៅវេលាម៉ោង៦ល្ងាចលើទីលានកីឡដ្ឋានខេត្តស្វាយរៀង ស្របពេលក្រុមអគ្គស្នងការដ្ឋាននគរបាលជាតិ ត្រូវប៉ះក្រសួងការពារជាតិ នៅម៉ោង៣និង៣០នាទីរសៀលលើទីលានកីឡដ្ឋានអគ្គីសនីកម្ពុជា និងក្រុមសូលទីឡូអង្គរ ទទួលក្រុមណាហ្គាវើល នៅវេលាម៉ោង៣និង៣០នាទីរសៀលលើទីលានកីឡដ្ឋានខេត្តសៀមរាប។
តាមគម្រោងពានរង្វាន់បាល់ទាត់លីគកំពូលកម្ពុជារដូវកាលថ្មីឆ្នាំ ២០១៩ នេះនឹងចាប់ផ្ដើមពីថ្ងៃទី១៦ ខែមីនា ដល់ថ្ងៃទី១៧ ខែតុលា ឆ្នាំ២០១៩។ ក្រុមជើងឯកលីគកំពូលកម្ពុជាមានឱកាសចេញទៅប្រកួតលើឆាកអន្តរជាតិមួយចំនួនដូចជាពានរង្វាន់ AFC Cup, Mekong Championship និងពានរង្វាន់មួយចំនួនទៀត៕
Source: Kampuchea Thmey Daily
0 Comments