រដ្ឋមន្ត្រីការបរទេសអាមេរិកលោក Mike Pompeo បាននិយាយកាលពីថ្ងៃសុក្រថា លោកនៅតែទទួលបន្ទុកក្នុងការចរចាជាមួយប្រទេសកូរ៉េខាងជើងបើទោះបីជាមានការទាមទាររបបនេះឲ្យដកគាត់ចេញក៏ដោយស្របពេលដែលគាត់បានសម្តែងក្តីសង្ឃឹមជាមួយប្រទេសជប៉ុនចំពោះការធានាកិច្ចព្រមព្រៀងមួយ។
លោក Pompeo បានដឹកនាំកិច្ចពិភាក្សាបួនភាគីនៅក្នុងទីក្រុងវ៉ាស៊ីនតោនរវាងប្រមុខការបរទេសនិងការពារជាតិរបស់សហរដ្ឋអាមេរិកនិងជប៉ុនដែលនេះជាកិច្ចប្រជុំចុងក្រោយបង្អស់ក្នុងចំណោមកិច្ចប្រជុំសំខាន់ៗរវាងសម្ព័ន្ធមិត្តជិតស្និទ្ធទាំងពីរ។ស្របពេលមានភាពជាប់គាំងជាមួយកូរ៉េខាងជើង លោក Pompeo បានច្រានចោលសេចក្ដីថ្លែងការណ៍ខឹងសម្បាមួយនៅសប្ដាហ៍នេះដែលក្នុង នោះទីក្រុងព្យុងយ៉ាងបានហៅអ្នកការទូតកំពូលរបស់សហរដ្ឋអាមេរិកថា “មិនប្រុងប្រយ័ត្ន” និងមិនទាន់ពេញវ័យហើយបានទាមទារឲ្យគាត់ត្រូវដកចេញពីការចរចានាពេលអនាគត។
លោក Pompeo ត្រូវបានគេជឿថាបានលើកទឹកចិត្តដល់លោក Trump ឲ្យបន្តការងារជាមួយមេដឹកនាំផ្តាច់ការវ័យក្មេងរបស់កូរ៉េខាងជើងអំឡុងជំនួបកំពូលមួយក្នុងទីក្រុងហាណូយកាលពីខែកុម្ភៈដែលបានបញ្ចប់ទៅក្នុងភាពជាប់គាំង។លោក Pompeo បានប្រាប់សន្និសីទកាសែតរួមមួយថា “មិនមានអ្វីផ្លាស់ប្តូរឡើយ។ យើងកំពុងបន្តធ្វើការចរចា។ ខ្ញុំនៅតែជាអ្នកទទួលបន្ទុកក្រុមការងារនេះ”។ លោកបានបន្ថែមថា “លោក Trump ពិតជាទទួលខុសត្រូវលើកិច្ចខិតខំប្រឹងប្រែងទាំងមូល”។
លោក Pompeo ដែលបានធ្វើដំណើរ៤ដងកាលពីឆ្នាំមុនទៅទីក្រុងព្យុងយ៉ាងបាននិយាយថា លោកនៅតែសង្ឃឹមថានឹងមានកិច្ចព្រមព្រៀងមួយដែលនឹងពង្រឹងការសន្យារបស់លោកគីមជុងអ៊ុនឲ្យបោះបង់ឃ្លាំងអាវុធនុយក្លេអ៊ែររបស់គាត់។លោក Trump បានសម្តែងការកោតសរសើរដល់លោកគីមម្តងហើយម្តងទៀតហើយកាលពីខែមុនបានរារាំងការដាក់ទណ្ឌកម្មថ្មីរបស់អាមេរិកទៅលើកូរ៉េខាងជើងដោយនិយាយថា លោកចង់រក្សាទំនាក់ទំនងនេះបើទោះបីជាមានការប្តេជ្ញារបស់លោក Pompeo ដើម្បីបន្តដាក់សម្ពាធអតិបរមាក៏ដោយ៕ AFP
Source: Kampuchea Thmey Daily
0 Comments