ភ្នំពេញ ៖ ជនសង្ស័យម្នាក់ លួចម៉ូទ័របូមកម្ដៅរបស់មន្ត្រីក្រសួងសាធារណការ យកចេញមិនរួច ហៅបក្ខពួកម្នាក់ទៀតមកជួយយកចេញ ស្រាប់តែម្ចាស់មកទាន់ ស្រែកឆោឡោ ដេញចាប់ប្រគល់ឲ្យសមត្ថកិច្ចទាំង២នាក់ កាលពីវេលាម៉ោង១០យប់ ថ្ងៃទី១៩ ខែមេសា ឆ្នាំ២០១៩ ចំណុចដីឡូត៍លក់គ្រឿងសំណង់ ផ្លូវបេតុង ក្រុមទី១៥ ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ។
ជនសង្ស័យពីរនាក់ ទី១.ឈ្មោះ អ៊ែល សុះហ្វីន ភេទប្រុស អាយុ២៤ឆ្នាំ ជនជាតិខ្មែរឥស្លាម មានទីលំនៅក្រុមទី៣ ភូមិខ២ សង្កាត់ច្រាំងចំរេះ២ មុខរបរមិនពិតប្រាកដ ជាមុខសញ្ញាចាស់ (មានសារធាតុញៀន)។ ទី២.ឈ្មោះ សេត រ៉ូហ្សិត ភេទប្រុស អាយុ២១ឆ្នាំ ជនជាតិខ្មែរឥស្លាម មានទីលំនៅផ្លូវបេតុង ក្រុមទី៣ ភូមិខ២ សង្កាត់ច្រាំងចំរេះ២ ខណ្ឌឫស្សីកែវ មុខរបរកម្មករសំណង់(មានសារធាតុញៀន)។ រីឯសម្ភារៈដកហូតរួមមាន ៖ ម៉ូទ័របូមកម្ដៅមួយគ្រឿង,ម៉ូតូមួយគ្រឿងម៉ាកC125 គ្មានស្លាកលេខ។
ជនរងគ្រោះ ឈ្មោះ ទូច ស្រីពៅ ភេទស្រី អាយុ៣២ឆ្នាំ ជនជាតិខ្មែរ មានទីលំនៅផ្ទះលេខ២៧៧H ផ្លូវបេតុង ក្រុមទី១៣ ភូមិក្រោលគោ សង្កាត់គីឡូម៉ែត្រលេខ៦ មុខរបរមន្ត្រីក្រសួងសាធារណការ។
សមត្ថកិច្ចឲ្យដឹងថា នៅថ្ងៃខែឆ្នាំខាងលើ ជនសង្ស័យបានជិះម៉ូតូចេញពីផ្ទះ លុះពេលមកដល់កន្លែងកើតហេតុ បានឈប់ម៉ូតូចូលទៅក្នុងដីឡូត៍ ឃើញម៉ូទ័រ រួចលើកយកមិនរួច ក៏ជិះម៉ូតូទៅហៅបក្សពួកម្នាក់ទៀតមកជួយយក ពេលមកដល់កំពុងធ្វើសកម្មភាពលួច ក៏ម្ចាស់មកទាន់ បានស្រែកឆោឡោស្របពេលសមត្ថកិច្ចយើងកំពុងល្បាត ក៏ជួយអន្តរាគមន៍ឃាត់ខ្លួនជនសង្ស័យបានតែម្តង។
ក្រោយឃាត់ខ្លួន ជនសង្ស័យ ត្រូវបានសមត្ថកិច្ចកសាងសំណុំរឿងបញ្ជូនតាមនីតិវិធី៕
Source: Kampuchea Thmey Daily
0 Comments