ទីភ្នាក់ងារព័ត៌មានរដ្ឋ Anadolu បានចុះផ្សាយកាលពីថ្ងៃសុក្រថាប្រទេសទួរគីបានចាប់ខ្លួនបុរសពីរនាក់ដែលគេសង្ស័យថាធ្វើចារកម្មឲ្យប្រទេសអារ៉ាបរួមហើយកំពុងស៊ើបអង្កេតថាតើពួកគេមានជាប់ ទាក់ទងនឹងការ សម្លាប់អ្នកកាសែតអារ៉ាប៊ីសាអ៊ូឌីតលោក Jamal Khashoggi ដែរឬអត់។
Anadolu បានរាយការណ៍ថា អ្នកទាំងពីរត្រូវបានឃុំខ្លួនជាផ្លូវការដោយអាជ្ញាធរទួរគីកាលពីថ្ងៃសុក្រដែលជាផ្នែកមួយនៃការស៊ើបអង្កេតដោយរដ្ឋអាជ្ញាក្រុងអ៊ីស្តង់ប៊ុលចូលទៅក្នុងការសង្ស័យចារកម្មដោយរដ្ឋឈូងសមុទ្រមួយនេះ។ ទោះបីជាយ៉ាណាក៏ដោយ ភ្នាក់ងារព័ត៌មាននេះមិនបាននិយាយថានៅពេលណាដែលពួកគេត្រូវបានចាប់ខ្លួនឬឈ្មោះបុរសទាំងពីរនាក់នោះទេ។
អ្នករិះគន់លើរបបអារ៉ាប៊ីសាអ៊ូឌីតលោក Khashoggi ត្រូវបានសម្លាប់នៅថ្ងៃទី២ខែតុលាក្នុងស្ថានទូតអារ៉ាប៊ីសាអ៊ូឌីតប្រចាំទីក្រុងអ៊ីស្តង់ប៊ុលដោយភ្នាក់ងារមួយក្រុមមានគ្នាចំនួន១៥នាក់ដែលបញ្ជូនមកពីទីក្រុងរីយ៉ាដ។ សាកសពរបស់គាត់មិនទាន់ត្រូវបានគេរកឃើញទេ។កាសែតទួរគីគាំទ្ររដ្ឋាភិបាល Yeni Safak បានរាយការណ៍ថា ជនសង្ស័យទាំងពីរនាក់ត្រូវបានចាប់ខ្លួនកាលពីថ្ងៃចន្ទនៅក្នុងប្រតិបត្តិការរួមគ្នាមួយដោយប៉ូលិសទួរគីនិងសេវាចារកម្ម MIT។
កាសែតនេះបានរាយការណ៍ថា អ្នកទាំងពីរដែលជាពលរដ្ឋអារ៉ាប់រួមគឺមានទំនាក់ទំនងជាមួយនឹងបុគ្គលម្នាក់ ដែលស្ថិតនៅក្រោមការឃ្លាំមើល នៅក្នុងករណីរបស់លោក Khashoggi ។ក្រោយពីបានបដិសេធធ្វើឃាតលោក Khashoggi, ក្រោយមកអារ៉ាប៊ីសាអ៊ូឌីតបាននិយាយថា មានភ្នាក់ងារបានអនុវត្តប្រតិបត្តិការនេះ។ភាគច្រើននៃករណីនេះនៅមិនទាន់ច្បាស់នៅឡើយទេដោយរួមមានទាំងតួនាទីរបស់រាជទាយាទដ៏មានអំណាចរបស់អារ៉ាប៊ីសាអ៊ូឌីតគឺព្រះអង្គម្ចាស់ Mohammed bin Salman ផងដែរ។
CIA បានសន្និដ្ឋានថា ប្រតិបត្តិការរបស់អារ៉ាប៊ីសាអ៊ូឌីតទំនងជាត្រូវបានបញ្ជាដោយរាជទាយាទប៉ុន្តែសេតវិមានបានបញ្ចៀសការរកឃើញនេះចំពេលមានការបដិសេធដោយទីក្រុងរីយ៉ាដដែលជាសម្ព័ន្ធមិត្តដ៏សំខាន់របស់សហរដ្ឋអាមេរិក៕ AFP
Source: Kampuchea Thmey Daily
0 Comments