ភ្នំពេញ ៖ បុរសអ្នកធាក់ស៊ីក្លូម្នាក់បានរងរបួសសន្លប់ឈឹងបន្ទាប់ពីត្រូវជនជាតិចិនរថយន្តបុកទាំងកំរោលកាលពីវេលាម៉ោង២០និង៥០នាទីយប់ថ្ងៃទី០៨ខែមករាឆ្នាំ២០១៥នៅចំណុចផ្លូវលេខ៩០កែងផ្លូវព្រះស៊ីសុវត្ថិក្នុងសង្កាត់ស្រះចកខណ្ឌដូនពេញ។
សមត្ថកិច្ចបានឱ្យដឹងទៀតថា បុរសអ្នកធាក់ស៊ីក្លូមានឈ្មោះ ជុំ សុផាន់ ភេទប្រុស អាយុ៤២ឆ្នាំ ស្នាក់នៅសង្កាត់ស្រះចក ខណ្ឌដូនពេញ មានស្រុកកំណើតនៅភូមិព្រៃសណ្តែក ឃុំព្រៃស្លឹក ស្រុកទ្រាំង ខេត្តតាកែវ។
ប្រភពព័ត៌មានពីប្រជាពលរដ្ឋជិតខាងកន្លែងកើតហេតុបានឲ្យដឹងថា នៅវេលាកើតហេតុ គេឃើញរថយន្តម៉ាកកាមរីហើម ពណ៌ស្លែ ពាក់ស្លាកលេខ ភ្នំពេញ 2A-9243 បើកបរដោយបុរសជនជាតិចិនម្នាក់ប្រហែលទើបចេញពីផឹកស៊ីមានសភាពស្រវឹងធ្លាក់ភ្នែក បើកពីជើងទៅត្បូង និងរេចង្កូតពេញផ្លូវលុះមកដល់ចំណុចកើតហេតុក៏បុកពីក្រោយស៊ីក្លូ ធ្វើឲ្យបុរសជាអ្នកធាក់ស៊ីក្លូត្រូវធ្លាក់សន្លប់ឈឹងប្រហែលកន្លះម៉ោងទើបដឹងខ្លួន។
ប្រភពព័ត៌មានដដែលបានបន្តទៀតថា ក្នុងហេតុការណ៍នោះដែររថយន្តបង្កបានព្យាយាមបើករត់រហូតទៅដល់មុខភោជនីយដ្ឋានហ្គោលដិន ណូរ៉ាវិឡា នៅតាមផ្លូវលេខ១៧៨ សង្កាត់ជ័យជំនះ ខណ្ឌដូនពេញ ទើបសមត្ថកិច្ចឃាត់ជាប់ហើយបែរជាបុរសជនជាតិចិនរូបនោះព្យាយាមមិនព្រមទទួលខុសត្រូវបន្ទាប់មកសមត្ថកិច្ចបានបញ្ជាឲ្យអ្នកបើករថយន្តបង្កហេតុនោះនាំមកកន្លែងកើតហេតុ ធ្វើការសម្របសម្រួលដោះស្រាយគ្នាសងទៅឲ្យតាស៊ីក្លូចំនួន១០០ដុល្លារដើម្បីបញ្ចប់បញ្ហាផងដែរ៕
0 Comments