នគរបាលចាប់ខ្លួនជនសង្ស័យជាចោរប្លន់ប្រដាប់អាវុធឆែកឆេររកឃើញកាំភ្លើងខ្លីមួយដើមនៅក្នុងផ្ទះជួល
ភ្នំពេញ ៖ បុរសម្នាក់ដែលបានបាញ់បោះសេរីដោយមិនដឹងមូលហេតុត្រូវបានប្រជាពលរដ្ឋលួចរាយការណ៍ប្រាប់ឲ្យដឹងពីសកម្មភាពរបស់ជនសង្ស័យ លុះព្រឹកឡើងត្រូវបានកម្លាំងនគរបាលព្រហ្មទណ្ឌខណ្ឌពោធិ៍សេនជ័យសហការជាប៉ុស្ដិ៍ចោមចៅចុះទៅចាប់ខ្លួនដល់ក្នុងផ្ទះជួលរបស់ខ្លួនហើយឆែកឆេររកឃើញកាំភ្លើងខ្លីមួយដើមជវត្ថុតាង។
ការចុះទៅចាប់ខ្លួនជនសង្ស័យនេះធ្វើឡើងកាលពីវេលាម៉ោង៧និង២០ព្រឹកនាទីព្រឹកថ្ងៃទី៩ខែមករាឆ្នាំ២០១៥នៅចំណុចផ្ទះជួលរបស់ជនសង្ស័យស្ថិតក្នុងភូមិថ្មគោលសង្កាត់ចោមចៅខណ្ឌពោធិ៍សែនជ័យ។
ជនសង្ស័យដែលត្រូវឃាត់ខ្លួនមានឈ្មោះចាន់ សុខាភេទប្រុសអាយុ២៩ឆ្នាំមុខរបរកម្មករសំណង់ស្នាក់នៅផ្ទះជួលនៅភូមិកើតហេតុ។ នគរបាលឆែកឆេរដកហូតបានកាំភ្លើងខ្លីមួយដើមម៉ាកកា៥៤និងមានគ្រាប់ចំនួនពីរគ្រាប់ផង។
លោកយឹម សារ៉ាន់អធិការនគរបាលខណ្ឌពោធិ៍សេនជ័យបានឲ្យដឹងថា មុនពេលឈានដល់ការឃាត់ខ្លួនជនសង្ស័យរូបនេះដោយសារកាលពីយប់ថ្ងៃទី៨ មករា ជនសង្ស័យបានបាញ់មួយគ្រាប់ឡើងលើនៅក្បែរផ្ទះជួលរបស់ខ្លួនដោយមិនដឹងថា បាញ់បោះរឿងអីទេព្រោះប្រជាពលរដ្ឋមិនហ៊ានចូលទៅសួរនាំទេ ប៉ុន្ដែប្រជាពលរដ្ឋបានលួចរាយការណ៍ជូនសមត្ថកិច្ចមូលដ្ឋានឲ្យបានដឹងពីសកម្មភាពនេះ។
ប្រភពបន្ដថា បន្ទាប់បីទទួលបានព័ត៌មាននេះភ្លាមលោកបានបញ្ជាឲ្យកម្លាំងចុះធ្វើការតាមដាននិងកំណត់មុខសញ្ញាឲ្យបានច្បាស់លាស់លុះមកដល់ព្រឹកឡើងទើបកម្លាំងនគរបាលព្រហ្មទណ្ឌខណ្ឌសហការជាមួយនគរបាលប៉ុស្ដិ៍ចុះទៅដល់ផ្ទះជនសង្ស័យដោយមានការប្រុងប្រយ័ត្នខ្ពស់ហើយក៏បានធ្វើការឆែកឆេរនៅក្នុងផ្ទះនោះរកឃើញកាំភ្លើងខ្លីមួយដើមដូចអ្វីដែលពលរដ្ឋបានរាយការណ៍នោះមែនបន្ទាប់មកក៏ឃាត់ខ្លួនយកមកសួរនាំនៅប៉ុស្ដិ៍តែម្ដង។
ពេលនគរបាលប្រើជំនាញសួរនាំជនសង្ស័យបានសារភាពថា ខ្លួនមានបក្ខពួកបីនាក់និងធ្លាប់បានធ្វើសកម្មភាពប្លន់បាញ់តដៃជាមួយប៉េអិមនៅនៅខណ្ឌសែនសុខកាលពីជាងមួយសប្ដាហ៍មុនដោយប្លន់បានសម្រេចយកបានម៉ូតូជនរងគ្រោះមួយគ្រឿងម៉ាកហុងដាសេ១២៥។ ពេលនេះនគរបាលបាននឹងកំពុងកសាងឯកសារបញ្ជូនទៅតុលាការចាត់ការតាមនីតិវិធីនិងកំពុងបន្ដស្រាវជ្រាវស្វែងរកចាប់ខ្លួនបក្ខពួកគេជាបន្ដទៀត៕
វិទូ
0 Comments