សៀមរាប ៖ នៅថ្ងៃទី៨ ខែមករានេះ តុលាការខេត្តសៀមរាបបានធ្វើការកោះហៅតំណាងសហគមន៍ស្គន់ឲ្យចូលខ្លួនបំភ្លឺពីរឿងទំនាស់ដីធ្លី ប៉ុន្តែក្រុមអ្នកភូមិប្រមាណជិត២០០នាក់មកពី៨សហគមន៍ ក្នុងឃុំចំនួនពីរនៃស្រុកបន្ទាយស្រី ខេត្តសៀមរាប បានលើកគ្នាមកឈរត្រៀបត្រាពាសពេញមុខតុលាការ បំណងរារាំងតវ៉ាកុំឲ្យតុលាការឃុំខ្លួនតំណាងរបស់ពួកគាត់ បន្ទាប់ពីតុលាការកោះហៅឲ្យចូលខ្លួន។ តំណាងក្រុមអ្នកភូមិ លោក ចន្ទ័ រិទ្ធ ភេទប្រុស អាយុ៥៥ឆ្នាំ រស់នៅភូមិចំបក់បីដើម ឃុំត្បែង ស្រុកបន្ទាយស្រី និងជាតំណាងពលរដ្ឋក្នុងរឿងទំនាស់ដីធ្លីផងនោះ បានត្រូវចៅក្រមស៊ើបសួរសាលាដំបូងខេត្ត លោកសំ ប៊ុនពៅ ចេញដីកាបង្គាប់ឲ្យចូលខ្លួនក្រោមបទចោទប្រកាន់អំពើលួច(លួចគោ) ដែលបានប្រព្រឹត្តកាលពីថ្ងៃទី៤ ខែសីហា ឆ្នាំ២០១៤ នៅក្នុងភូមិត្បែងខាងលិច ឃុំត្បែង ស្រុកបន្ទាយស្រី ខេត្តសៀមរាប។
ប្រភពពីពលរដ្ឋដែលលើកទឹកចិត្តតំណាងពលរដ្ឋចំនួនជិត២០០នាក់នោះបាននិយាយថា ពួកគាត់មកពីសហគមន៍ចំនួន៨ ក្នុងឃុំត្បែង ស្រុកបន្ទាយស្រី ខេត្តសៀមរាប ហើយមកនេះក្នុងបំណងតវ៉ានិងរារាំងដល់ស្ថាប័នតុលាការ ប្រសិនបើចៅក្រមស៊ើបសួរសម្រេចឃុំខ្លួនលោក ចន្ទ័ រិទ្ធ មែននោះ។ ពលរដ្ឋបានបន្តថា ប្រសិនបើពួកគាត់មិនឃើញតំណាងចេញមកទេនោះ ក៏មិនអាចវិលទៅលំនៅស្ថានវិញដែរ បើឈ្មោះ ចន្ទ័ រិទ្ធ មិនបានវិលទៅជាមួយគ្នា ពីព្រោះថា មិនបានប្រព្រឹត្តិដូចការចោទប្រកាន់របស់ដើមបណ្ដឹងនោះឡើយ។
ចំណែកស្ត្រីដែលជាប្រពន្ធរបស់លោក ចន្ទ័ រិទ្ធ គាត់មានឈ្មោះ ឃី ភីរម្យ បាននិយាយនៅចំពោះមុខតុលាការថា រូបគាត់មានការព្រួយបារម្ភពីការឃុំខ្លួនប្ដីរបស់គាត់ណាស់ ក្រៅពីរូបគាត់និងក្រុមអ្នកភូមិក៏ដូចគ្នាដែរ ទើបពួកគាត់នាំគ្នាមកឈរត្រៀមត្រាពេញមុខតុលាការដើម្បីតវ៉ាបែបនេះ។
លោក សួស ណារិន អ្នកឃ្លាំមើលសិទ្ធិមនុស្សនៃសមាគមន៍អាដហុក ខេត្តសៀមរាបបានមានប្រសាសន៍នៅរសៀលថ្ងៃទី០៩ ខែមករាថា ករណីហ្នឹងបើតាមលោកទទួលបានពីជនសង្ស័យឈ្មោះ ចន្ទ័ រិទ្ធ ខាងលើនេះត្រូវបានតុលាការឲ្យនៅក្រៅឃុំបណ្ដោះអាសន្ន ប៉ុន្តែនៅក្រោមការស៊ើបអង្កេតរបស់តុលាការ។ លោកបន្តថា ករណីលោកនឹងបន្តតាមដានបន្ថែមទៀត។
នៅរសៀលថ្ងៃទី០៨ ខែមករា ឆ្នាំ២០១៥ លោក ចន្ទ័ រិទ្ធ រួមទាំងក្រុមអ្នកភូមិបានវិលទៅផ្ទះរៀងៗខ្លួនវិញអស់ហើយ បន្ទាប់ពីតុលាការសម្រេចដោះលែងតំណាងពលរដ្ឋគឺ លោក ចន្ទ័ រិទ្ធ ដោយឲ្យស្ថិតនៅក្រោមការស៊ើបអង្កេតពីតុលាការ។
លោក សំ ប៊ុនពៅ ចៅក្រមស៊ើបសួរសាលាដំបូងខេត្តបានមានប្រសាសន៍ប្រាប់អ្នកកាសែតនៅល្ងាចថ្ងៃទី៨ ខែមករាថា លោកសម្រេចឲ្យលោក(ចន្ទ័ រិទ្ធ) ត្រឡប់ទៅផ្ទះវិញហើយ តែលោក ចន្ទ័ រិទ្ធ ត្រូវចូលខ្លួនមកបំភ្លឺនៅប៉ុស្តិ៍នគរបាលក្នុងមូលដ្ឋានរបស់គាត់ជារៀងរាល់ខែ៕
ដោយ កុសល
0 Comments