សៀមរាប ៖ លោកវរសេនីយ៍ឯក ចៅ ម៉ៅ វីរៈ ស្នងការរងទទួលបន្ទុកអន្តោប្រវេសន៍នៃស្នងការដ្ឋាននគរបាលខេត្តសៀមរាប និងលោកវរសេនីយ៍ត្រី ជា គឹមសាន នាយការិយាល័យអន្តោប្រវេសន៍នៃស្នងការដ្ឋាននគរបាលខេត្តសៀមរាប បានឲ្យដឹងថា ដោយអនុវត្តតាមការយកចិត្តទុកដាក់ខ្ពស់ជាប្រចាំពីសំណាក់ឯកឧត្តមនាយឧត្តមសេនីយ៍សុខផល អគ្គនាយកនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ ក៏ដូចជាលោកឧត្ដមសេនីយ៍ទោ សត ណាឌី ស្នងការនគរបាលខេត្តសៀមរាប និងដើម្បីធ្វើឲ្យការអនុវត្តនូវគោលនយោបាយភូមិឃុំមានសុវត្ថិភាពកាន់តែមានប្រសិទ្ធភាពខ្ពស់ផងនោះ កម្លាំងនគរបាលការិយាល័យអន្តោប្រវេសន៍នៃស្នងការដ្ឋាននគរបាលខេត្តសៀមរាបតែងតែចុះធ្វើការត្រួតពិនិត្យការងាររដ្ឋបាលចំពោះជនបរទេសដែលរស់នៅក្នុងក្រុងសៀមរាបដែលមកប្រកបរបរផ្សេងៗផងដែរ។
លោកវរសេនីយ៍ឯក ចៅ ម៉ៅ វីរៈ ស្នងការរងទទួលបន្ទុកអន្តោប្រវេសន៍នៃស្នងការដ្ឋាននគរបាលខេត្តសៀមរាបបានបញ្ជាក់ថា បន្ទាប់ពីកម្លាំងសមត្ថកិច្ចជំនាញបានធ្វើការត្រួតពិនិត្យចំពោះជនបរទេសដែលរស់នៅក្នុងក្រុងសៀមរាបទាំងទីតាំងស្នាក់នៅ ប្រកបអាជីវកម្ម និងបម្រើការងារផ្សេងៗជាច្រើនកន្លែងកាលពីថ្ងៃទី០៦ ខែមករា ឆ្នាំ២០១៥កន្លងទៅរួចមក ជាលទ្ធផលសមត្ថកិច្ចជំនាញបានរកឃើញ និងនាំខ្លួនជនជាតិវៀតណាមភេទស្រីចំនួន៦នាក់ ដែលមិនទាន់មានឯកសារគ្រប់គ្រាន់ក្នុងការបំពេញបែបបទសុំស្នាក់នៅឲ្យបានត្រឹមត្រូវ។ សមត្ថកិច្ចបានបញ្ជាក់ទៀតថាបន្ទាប់ពីបានឃាត់ខ្លួន និងធ្វើការត្រួតពិនិត្យរកមើលឯកសារពីជនអន្តោប្រវេសន៍ខាងលើទាំងអស់ហើយនោះ រហូតមកដល់ថ្ងៃទី០៨ខែមករានេះ សមត្ថកិច្ចបានបញ្ជូនខ្លួនជនជាតិវៀតណាមភេទស្រីទាំង៦នាក់ទៅកាន់អគ្គនាយកដ្ឋានអន្តោប្រវេសន៍ក្រសួងមហាផ្ទៃដើម្បីចំណាត់ការទៅតាមផ្លូវច្បាប់បន្តដោយចោទប្រកាន់ពីបទស្នាក់នៅខុសច្បាប់៕
0 Comments