កំពង់ស្ពឺ ៖ ចាប់តាំងពីថ្ងៃទី០៦-០៧ ខែមករា ឆ្នាំ២០១៥ ស្នងការនគរបាលខេត្តកំពង់ស្ពឺក្រោមការចង្អុលបង្ហាញ និងបញ្ជាពីលោក អ៊ូ សំអួន គណៈអភិបាលខេត្ត និងជាគណៈបញ្ជាការឯកភាពខេត្ត ជំរុញដល់មន្ត្រីក៏ដូចជាកងកម្លាំងក្នុងខេត្ត ក្នុងកិច្ចការថែរក្សាបរិស្ថាន និងថែរក្សាសោភណភាពក្នុងខេត្តតាមយុទ្ធសាស្ត្រទីក្រុងស្អាតរបស់រាជរដ្ឋាភិបាល ដែលដឹកនាំដោយសម្ដេចតេជោ សែន។
តាមការបញ្ជាក់ពីមន្ត្រីនៃការិយាល័យជំនាញបង្ការនិងពន្លត់អគ្គីភ័យរបស់ស្នងការនគរបាលខេត្តកំពង់ស្ពឺបានឲ្យដឹងថា ទឹកប្រមាណជាង២០ឡាន ត្រូវបានប្រើប្រាស់ក្នុងការបាញ់សម្អាត និងលាងតាមផ្លូវ រួមទាំងសួនច្បារសាធារណៈនានាក្នុងខេត្ត គិតតាំងពីអាគាររបស់ខេត្តផងដែរ។
យោងតាមការផ្ញើសារអេឡិចត្រូនិកមកកាន់ភ្នាក់ងារកាសែតកម្ពុជាថ្មីបានឲ្យដឹងថា ក្រុមបង្ការនិងពន្លត់អគ្គីភ័យរបស់ស្នងការខេត្តកំពង់ស្ពឺ ត្រូវបានដឹកនាំដោយលោក សេក ហេង នាយការិយាល័យបង្ការ និងពន្លត់អគ្គីភ័យខេត្ត។
តាមការលើកឡើងបានឲ្យដឹងទៀតថា មន្ត្រីចំណុះនៃការិយាល័យភ្នាក់ងារបង្ការនិងពន្លត់អគ្គីភ័យទាំងអស់បានប្រើនៅរថយន្តបាញ់ទឹករបស់ស្នងការក្នុងការដុសលាង បោសសម្អាត នៅតាមដងផ្លូវសួនច្បារសាធារណៈ រួមទាំងដុសលាងតាមរបងរបស់មន្ទីរគណៈបក្សប្រជាជនកម្ពុជា ក៏ដូចជារបងរបស់សាលាខេត្តដែរ។
ពលរដ្ឋក៏ជាអ្នកធ្វើដំណើរតាមដងផ្លូវក្នុងខេត្តម្នាក់ៗសុទ្ធតែបានលើកសសើរមិនដាច់ពីមាត់ពីទង្វើរបស់មន្ត្រីខាងលើ ហើយពោលសសើរដល់ការដឹកនាំរបស់ លោក អ៊ូ សំអួន អភិបាលខេត្ត និងលោក យឹម សុខុម ប្រធានក្រុមព្រឹក្សាខេត្ត ដែលតែងតែយកចិត្តទុកដាក់ក្នុងការដឹកនាំខេត្តមួយនេះប្រកបដោយការអភិវឌ្ឍន៍ទាំងលើហេដ្ឋារចនាសម្ព័ន្ធបរិស្ថាន និងសោភណភាពទាំងជនបទ និងក្នុងខេត្ត៕
ច្បារមន
0 Comments