ពួកសាក្សីបាននិយាយនៅថ្ងៃព្រហស្បតិ៍ថា ពួកសកម្មប្រយុទ្ធបូកូហារ៉ាន បានសម្លាប់មនុស្សរាប់សិបនាក់ និងបានដុតកំទេចផ្ទះសម្បែងនៅក្នុងទីក្រុងបាហ្កា នៅភាគឦសានប្រទេសនីហ្សេរីយ៉ាពិរថ្ងៃកន្លងមក ដែលការបាញ់សម្លាប់លើកទីពីរ ចាប់តាំងពីបានដណ្តើមកាន់កាប់នៅទីនោះ កាលពីដំណាច់សប្តាហ៍នោះ។
អ្នកស្រុកពីរនាក់និយាយថា ពួកឧទ្ទាមឥស្លាមនិយម បានបាញ់ដោយមិនរើសមុខ និងបានដុតផ្ទះសម្បែងកាលពីល្ងាចថ្ងៃអង្គារ នៅក្នុងការវាយឆ្មក់ ទៅលើប្រជាជនស៊ីវិល ដែលបានបន្តរហូរដល់ថ្ងៃពុធ។
លោក មហាមេដ ប៊ូកា (Mohamed Bucar) បាននិយាយប្រាប់រ៉យទ័រ ក្រោយពីរត់គេចទៅកាន់រដ្ឋធានីម៉ៃឌូហ្កូរីថា «ខ្ញុំបានគេចខ្លួនជាមួយគ្រួសាររបស់ខ្ញុំ ដោយជិះរថយន្ត ក្រោយពីមើលឃើញ ក្រុមបូកូហារ៉ាម សម្លាប់ប្រជាជនមក ខ្ញុំបានឃើញសាកសពនៅតាមផ្លូវ។ កូនក្មេង និងស្ត្រី មានអ្នកខ្លះស្រែកយំឲ្យជួយ»។
តាមតួលេខរបស់ក្រុមប្រឹក្សាទំនាក់ទំនងបរទេស នៅក្នុងខែវិច្ឆិកា បានឲ្យដឹងថា ពួកឧទ្ទាមបានសម្លាប់ប្រជាជនជាង ១០.០០០នាក់ កាលពីឆ្នាំមុន។ បញ្ហានេះត្រូវបានគេមើលឃើញថា ជាការគំរាមដ៏ធ្ងន់ធ្ងរបំផុតចំពោះប្រទេសនីហ្សេរីយ៉ា ដែលជាប្រទេសសេដ្ឋកិច្ចដ៏ធំបំផុតរបស់អាហ្រ្វិក និងជាការឈឺក្បាលសម្រាប់ប្រធានាធិបតីលោក ហ្កត់ឡាក់ ចូណាថាន់ (Goodluck Jonathan) មុនការបោះឆ្នោតនៅថ្ងៃទី១៤ ខែកុម្ភៈ៕
0 Comments