កណ្ដាល ៖ ជនសង្ស័យម្នាក់ ត្រូវបាននគរបាលប៉ុស្តិ៍ត្រើយស្លា ឃាត់ខ្លួនយកមកសួរនាំពាក់ព័ន្ធនិងករណីលួចម៉ូតូប្រជាពលរដ្ឋមិនបានសម្រេច។
ហេតុការណ៍នេះបានកើតឡើងកាលពីវេលាម៉ោង១និង៣០នាទី ថ្ងៃទី០៦ ខែមករា ឆ្នាំ២០១៥ នៅចំណុចក្រោមផ្ទះរបស់ឈ្មោះ សែម សោភ័ណ្ឌ ភូមិព្រែកតាឯក ឃុំត្រើយស្លា ស្រុកស្អាង ខេត្តកណ្ដាល។ ជនសង្ស័យឈ្មោះ មួយ ហ៊ុយ ភេទប្រុស អាយុ៤០ឆ្នាំ នៅភូមិព្រែកតាឯក ឃុំត្រើយស្លា ស្រុកស្អាង ខេត្តកណ្តាល មានមុខរបររត់ម៉ូតូឌុប។ រីឯជនរងគ្រោះមានឈ្មោះ សែម សោភ័ណ្ឌ ភេទប្រុស អាយុ៣០ឆ្នាំ នៅភូមិព្រែកតាឯក ឃុំត្រើយស្លា ស្រុកស្អាង ខេត្តកណ្តាល មានមុខរបរកសិករ។ វត្ថុតាងរួមមានម៉ូតូចំនួន២គ្រឿងទី១-ម៉ាកហុងដាC90ជ្រុង ពណ៌ទឹកប៊ិច ពាក់ស្លាកស្លាកលេខកណ្ដាល1L7783 (របស់ជនរងគ្រោះ) ទី២-ម៉ូតូម៉ាក វីវ៉ា ព័ណ៌ខ្មៅ ពាក់ស្លាកលេខ ពោធិ៍សាត់ 1C2069(របស់ជនសង្ស័យ) និងកូនសោចំនួន៣ដើម លេខ១៧ចំនួនមួយដើម លេខ១៣មួយដើម លេខ១២មួយដើម។
លោក អនុសេនីយ៍ទោ ពុយ ទ្រី នាយប៉ុស្តិ៍ត្រើយស្លានៃអធិការដ្ឋាននគរបាលស្រុកស្អាង បានឲ្យដឹងថា កាលពីថ្ងៃទី៦ ខែមករា ឆ្នាំ២០១៥ វេលាម៉ោង១និង៣០នាទី ជនសង្ស័យឈ្មោះ មួយ ហ៊ុយ បានជិះម៉ូតូម៉ាកវីវ៉ា មកចតទុកនៅក្បែរផ្លូវលំ រួចចូលទៅក្រោមផ្ទះជនរងគ្រោះឈ្មោះ សែម សោភ័ណ្ឌ យកកូនសោដោះខ្ចៅកង់ម៉ូតូខាងមុខ ដែលជាប់សោច្រវាក់ជាប់សសររោង ពេលដោះរួចហើយជនសង្ស័យបានចាប់លើកដៃម៉ូតូខាងមុខអូសមកផ្ទះរបស់ឈ្មោះ ផ្លុង ទូច ជិះសំដៅមកទិសខាងជើងបានចម្ងាយប្រហែល១០ម៉ែត្រ ភ្លាមនោះមានឈ្មោះ ផ្លុង ទូច បានចុះពីលើផ្ទះចុចពិលមើលគោ រំពេចនោះជនសង្ស័យភ័យក៏បានទុកម៉ូតូចោលរត់ទៅពួនក្នុងចំការចេក។
លោក ពុយ ទ្រី ប្រាប់បន្តថា ពេលជាមួយគ្នានោះជនរងគ្រោះបានផ្អើលឆោឡោបាត់ម៉ូតូ ក៏រត់ទៅរកឃើញម៉ូតូរបស់ខ្លួននៅក្បែរផ្ទះរបស់ឈ្មោះ ផ្លុង ទូច និងឃើញម៉ូតូ១គ្រឿងទៀត ជារបស់ជនសង្ស័យដែលទុកចោលក្បែរផ្លូវលំផងដែរ។ ក្រោយទទួលបានព័តមានខាងលើសមត្ថកិច្ចប៉ុស្តិ៍ត្រើយស្លាដែលកំពុងដើរល្បាតតាមផ្លូវលេខ១១០ បានធ្វើការស្រាវជ្រាវឃាត់ខ្លួនជនសង្ស័យតែម្តង។
លោក ពុយ ទ្រី ប្រាប់បញ្ជាក់ឲ្យដឹងថា បច្ចុប្បន្នជនសង្ស័យត្រូវបានសមត្ថកិច្ចឃុំខ្លួនបណ្ដោះអាសន្ននៅពន្ធនាគារខេត្តកណ្តាល៕
មុនី
0 Comments