ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានសម្តែងនូវក្តីរន្ធត់យ៉ាងខ្លាំង និងថ្កោលទោសចំពោះការបាញ់ប្រហារទៅលើទីស្នាក់ការទស្សនាវដ្ដីបារាំង កាលពីថ្ងៃទី០៧ ខែមករា ឆ្នាំ២០១៥ កន្លងទៅថ្មីៗនេះ។
យោងតាមលិខិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលផ្ញើជូន Manuel Valls នាយករដ្ឋមន្ត្រីនៃសាធារណរដ្ឋបារាំងចុះថ្ងៃទី០៨ ខែមករា ឆ្នាំ២០១៥ បានឲ្យដឹងថា "ខ្ញុំមានក្តីរន្ធត់ឥត ដោយទទួលព័ត៌មានពីការវាយប្រហារពីក្រុមភេរវករទៅលើទស្សនាវដ្តីបារាំង Charlis Hebdo ដែលធ្វើឲ្យប្រជាជនស្លូតត្រង់បាត់បង់ជីវិត និងរបួសជាច្រើននាក់ និងបណ្តាលឲ្យប្រជាជនបារាំង មានការតក់ស្លុតយ៉ាងខ្លាំង កាលពីថ្ងៃទី០៧ ខែមករា ឆ្នាំ២០១៥"។
ជាមួយនឹងការលើកឡើងខាងលើនេះ សម្តេចអគ្គមហាសេនាបតីតេជោ ហ៊ុន សែន ក្នុងនាមរាជរដ្ឋាភិបាលកម្ពុជា សូមថ្កោលទោសយ៉ាងខ្លាំងបំផុត ចំពោះអំពើភេរវកម្មដ៏សាហាវព្រៃផ្សៃនេះ។ ទង្វើដ៏សាហាវឃោរឃៅជ្រុលនិយមនេះ វាក៏ជាការវាយប្រហារមួយផងដែរ ប្រឆាំងទៅនឹងលទ្ធិប្រជាធិបតេយ្យ និងសេរីភាពអ្នកកាសែត។
សម្តេចបានបញ្ជាក់ថា "ខ្ញុំសូមចូលរួមរំលែកទុក្ខយ៉ាងក្រៀមក្រំនេះ ដល់ជនរងង្គ្រោះ និងក្រុមគ្រួសារនៃសព ចំពោះការបាត់បង់ជីវិតជនស្លូតត្រង់ ក្នុងអំពើហិង្សាគួរឲ្យស្អប់ខ្ពើមនេះ៕
0 Comments