ភ្នំពេញ ៖ ប្រជាពលរដ្ឋគ្រួសារក្រីក្ររស់នៅតំបន់ចាក់សំរាមស្ទឹងមានជ័យ ដែលភាគច្រើន ជាគ្រួសារដែលមានកុមាររើសសំរាម និងគ្រួសារចាស់ជរានោះបានទទួលផ្ទះថ្មីចំនួន២០០ខ្នង ពីអង្គការមូលនិធិកុមារកម្ពុជា(CCF)។
ពិធីប្រគល់ផ្ទះថ្មីដល់គ្រួសារក្រីក្រនៅតំបន់ចាក់សំរាមស្ទឹងមានជ័យនេះបានប្រព្រឹត្តទៅកាលពីល្ងាចថ្ងៃទី៨ ខែមករា ឆ្នាំ២០១៥នេះ។ ផ្ទះទាំងអស់នេះត្រូវបានសាងសង់ឡើងនៅក្នុងរាជធានីភ្នំពេញ ដោយក្រុមជាងជាអ្នកស្រុក ដោយសម្រេចបានជាផ្ទះជាមធ្យមចំនួន២០ខ្នងក្នុងមួយខែ។ រហូតមកដល់ពេលនេះសហគមន៍ចំនួន១៥ត្រូវបានបង្កើតឡើងនៅក្នុងតំបន់ស្ទឹងមានជ័យដោយមានផ្ទះសរុបចំនួន១៩៨ខ្នងត្រូវបានប្រគល់ជូនជាអំណោយរួចស្រេចហើយ។
ផ្ទះថ្មី៣៦០ខ្នងបន្ថែមទៀត ត្រូវបានអង្គការមូលនិធិកុមារកម្ពុជា គ្រោងសាងសង់សម្រាប់ឆ្នាំ២០១៥នេះដល់សហគមន៍ក្រៅពីរាជធានីភ្នំពេញ។
គម្រោងសាងសង់លំនៅដ្ឋានសហគមន៍របស់អង្គការមូលនិធិកុមារកម្ពុជា មានការសហការក្នុងភាពជាដៃគូរវាងអង្គការមូលនិធិកុមារកម្ពុជា នឹងអង្គការលំនៅដ្ឋានពិភពលោក ដែលផ្អែកលើមូលដ្ឋាន អចលនទ្រព្យបណ្តាក់ទុនសង្គមមួយរបស់ប្រទេសកាណាដា។
លោក Scott Neesonដែលជាស្ថាបនិក និងជានាយកប្រតិបត្តិអង្គការមូលនិធិកុមារកម្ពុជាបានថ្លែងថា «ខណៈពេលដែលផ្ទះទាំងនេះត្រូវបានផ្តល់ជូនជាអំណោយដោយពុំមានសំណងនោះ អាទិភាពចម្បងត្រូវបានផ្តល់ទៅដល់គ្រួសារដែលមានការប្តេជ្ញាចិត្តចំពោះការអប់រំកូនៗរបស់ពួកគេដោយផ្តល់នូវជីវិតលំនៅដ្ឋានប្រកបដោយសុវត្ថិភាពនិងយល់ព្រមក្នុងការការពារកូនៗរបស់ខ្លួនពីការរកប្រាក់ដោយលក់កម្លាំងពលកម្ម»។
លោកបានបន្តថា ផ្ទះនីមួយៗមានទំហំ ១៣ ម៉ែត្រការ៉េ ដែលនៅដាច់ៗពីគ្នា បំពាក់ដោយប្រព័ន្ធអគ្គិសនីដើរដោយពន្លឺព្រះអាទិត្យ និងបានសាងសង់ បានលើកឡើងខ្ពស់ផុតពីដីនៅក្នុងរចនាប័ទ្មខ្មែរបុរាណ ដោយចាក់បេតុងផ្នែកខាងក្រោម។
អង្គការ មូលនិធិកុមារកម្ពុជាបានសាងសង់ផ្ទះដើម្បីសម្រួលដល់ការស្នាក់នៅរបស់មនុស្សវ័យចំណាស់។ សហគមន៍ភាគច្រើនទទួលបានផ្ទះមួយខ្នងដែលផ្ដល់ជូនសម្រាប់ជីដូនជីតាដើម្បីឲ្យកុមារបានទទួលនូវចំណេះដឹងផ្នែកប្រពៃណីខ្មែររចនាសម្ព័ន្ធនិងគុណតម្លៃសង្គម។
ជាក់ស្តែងគំរូផ្ទះនៅភូមិឫស្សីខណ្ឌស្ទឹងមានជ័យមាន សួនច្បារសហគមន៍ ដែលជាតំបន់រួមសម្រាប់ប្រជាជននិងជាតំបន់សម្រាប់កុមារលេង នឹងត្រូវបានចាត់ទុកជាបទដ្ឋានគំរូសម្រាប់សហគមន៍ថ្មីៗជាច្រើនទៀត។ រាល់សហគមន៍របស់អង្គការមូលនិធិកុមារកម្ពុជា/អង្គការលំនៅដ្ឋានពិភពលោក (World Housing)បានតភ្ជាប់នូវទឹកសម្រាប់ប្រើសប្រាស់ បង្គន់អនាម័យទឹកនិងឋាមពលអគ្គិសនីរួចជាស្រេច។ ផ្ទះនីមួយៗអាចត្រូវបានជួលក្នុងតម្លៃ១៥ ដុល្លារក្នុងមួយខែដែលជាតម្លៃបន្ទាប់បន្សំ ដែលគ្របដណ្ដប់ផ្នែកខ្លះនៃការចំណាយលើការជួលដី។
អង្គការមូលនិធិកុមារកម្ពុជា (CCF) ត្រូវបានបង្កើតឡើងនៅឆ្នាំ២០០៤ ដោយលោកScott Neeson ដែលជាអតីតនាយកប្រតិបត្តិភាពយន្តមួយរូប។ អង្គការមូលនិធិកុមារកម្ពុជាផ្តល់នូវការអប់រំដើម្បីផ្លាស់ប្តូរជីវិតការចិញ្ចឹមបីបាច់ និងការព្យាបាលដល់កុមារដែលងាយរងគ្រោះ មានប្រភពចេញមកពីសហគមន៍ទុរគតបំផុតនៅប្រទេសកម្ពុជា។
គួរបញ្ជាក់ថា នៅឆ្នាំ២០២០ខាងមុខនេះបេសកកម្មសង្គមរបស់អង្គការលំនៅដ្ឋានពិភពលោក(World Housing)គ្រោងនឹងផ្តល់នូវលំនៅដ្ឋានដល់ប្រជាពលរដ្ឋ ចំនួន ៣០,០០០ នាក់៕
0 Comments