ព្រៃវែង ៖ មានមេគោចម្លែកមួយក្បាលកើតបានកូនភ្លោះរហូតដល់ទៅ៥ក្បាលធ្វើឲ្យមានការភ្ញាក់ផ្អើលយ៉ាងខ្លាំង ដោយមានប្រជាពលរដ្ឋយ៉ាងច្រើនកុះករមកចោមរោមមើល។ ហេតុការណ៍គោរកើតបានកូនភ្លោះ៥ខាងលើនេះបានកើតឡើងនៅក្នុងភូមិស្នាយបាំង ឃុំកំពង់សឹង ស្រុកព្រះស្ដេចខេត្តព្រៃវែង។ លោក វ៉ន រឹម មានអាយុ៦៦ឆ្នាំ មុខរបរជាកសិករ រស់នៅភូមិ/ឃុំខាងលើ នឹងត្រូវជាម្ចាស់គោបានប្រាប់ឲ្យកម្ពុជាថ្មីដឹងថា មេគោរបស់លោកគឺកើតកូនបានចំនួនពីរលើកមកហើយ កាលពីកើតលើកទីមួយបានកូនភ្លោះ២ តែងាប់មួយ នៅរស់មួយ រហូតដល់សព្វថ្ងៃតែរហូតដល់ថ្ងៃទី៥ខែមករា ឆ្នាំ២០១៥ មេគោរបស់លោកបានកើតកូនម្តងទៀត តែកើតម្តងនេះគឺនៅវេលាម៉ោង៦ ថ្ងៃទី៥ ខែមករា ឆ្នាំ២០១៥ គឺកើតបានកូនមួយរហូតដល់ម៉ោងប្រហែល៩យប់កើតបានមួយទៀតលោកគិតថា ប្រហែលអស់ហើយ លុះរហូតដល់ម៉ោង១២យប់កណ្ដាលអាធ្រាត្រ ស្រាប់កើតបានកូនចំនួន៣ទៀតជាបន្តបន្ទាប់ តែជាអកុសលកូនគោដែលកើតមកបីចុងក្រោយគឺបានស្លាប់ទាំបី ហើយនៅតែកូនចំនួនពីរដែលកើតមកមុនគេ ហើយកូនគោដែលកើតមកមុនគេនោះគឺមានសភាពមិនសូវរឹងមាំនោះទេ ដូចនេះលោកសូមឲ្យមន្ត្រីពេទ្យសត្វមេត្តាជួយមកពិនិត្យនឹងជួយព្យាបាលកូនគោរបស់លោកផង។ ពាក់ព័ន្ធករណីខាងលើនេះផងដែរ លោក ចន វិសាល ប្រធានការិយាល័យបសុព្យាបាលខេត្តព្រៃវែងបានឲ្យអ្នកយកព័ត៌មានយើងដឹងនៅថ្ងៃទី៦ ខែមករា ឆ្នាំ២០១៥ថា លោកក៏បានចាត់ឲ្យមន្ត្រីរបស់លោកចុះទៅពិនិត្យនឹងព្យាបាលកូនគោខាងលើនោះផងដែរ៕ វិចិត្រ
0 Comments