ភ្នំពេញ ៖ និស្សិតម្នាក់ខណៈជិះម៉ូតូចេញពីរៀន ត្រូវជនសង្ស័យវាយប្លន់យកម៉ូតូបានដោយសុវត្ថិភាព កាលពីវេលាម៉ោង០៧យប់ ថ្ងៃទី០៥ មករា ២០១៥ ស្ថិតនៅចំណុចខាងក្រោយមន្ទីរពេទ្យមិត្តភាពខ្មែរ-សូវៀត តាមផ្លូវលេខ៣៤០ សង្កាត់ទំនប់ទឹក ខណ្ឌចំការមន។ ប៉ុន្តែសមត្ថកិច្ចបានព្យាយាមលាក់បាំង។
នារីរងគ្រោះបានឱ្យដឹងទៀតថា មុនពេលកើតហេតុ នាងទើបនឹងចេញពីរៀនត្រឡប់ទៅផ្ទះវិញ ដោយជិះម៉ូតូអាយខន ពណ៌លឿង ពាក់ស្លាកលេខភ្នំពេញ 1BI 9226 ជិះម្នាក់ឯង ពីជើងទៅត្បូង លុះមកដល់ចំណុចខាងលើជាកន្លែងស្ងាត់ ស្រាប់តែមានជនសង្ស័យ២នាក់ជិះម៉ូតូស្គូពីដែរ ពណ៌ផ្កាឈូក បានជិះទៅអែបជិត ហើយវាយមួយដៃ និងដកកាំភ្លើងភ្ជង់គំរាមឱ្យឈប់ប្លន់យកម៉ូតូជិះចេញទៅបាត់ ដោយ ជនសង្ស័យជិះឆ្ពោះទៅទិសខាងត្បូង ចំណែកបក្សពួកម្នាក់ទៀត ជិះឆ្ពោះទៅទិសខាងជើងវិញ។
ក្រោយកើតហេតុជនរងគ្រោះ បានទៅដាក់ពាក្យបណ្តឹងទៅសមត្ថកិច្ចមូលដ្ឋាន ប៉ុន្តែសំណុំរឿងនោះមិនត្រូវបានសមត្ថកិច្ចរាយការណ៍ទៅថ្នាក់លើឡើយ។ នារីរងគ្រោះឈ្មោះរស់ ស៊ីនួន អាយុ២០ឆ្នាំ ជានិស្សិតឆ្នាំទី២នៅសាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច ស្នាក់នៅភូមិចំរើនផល សង្កាត់បឹងទំពុន ខណ្ឌមានជ័យ មានឪពុកជាមន្ត្រីនគរបាលព្រហ្មទណ្ឌក្រសួងមហាផ្ទៃ៕
0 Comments