ស្ទឹងត្រែង ៖ សង្កាត់សាមគ្គីក្រុងខេត្តស្ទឹងត្រែងបង្កើតឲ្យមានអ្នកប្រជាការពារចំនួន១៣០នាក់នៅក្នុងសង្កាត់ សំរាប់បំរើឲ្យការងារសន្តិសុខ ដោយសារកន្លងមកកំលាំងសកត្ថកិច្ចប៉ុស្តិ៍ មានគ្នាតិចភូមិសាស្ត្រធំបទល្មើសកើតឡើង ចាត់វិធានការមិនបានធ្វើអោយប្រជាពលរដ្ឋ នៅក្នុងភូមិសង្កាត់ការភ័យព្រួយពីសុវត្ថិភាពរស់នៅ។
ក្នុងកម្មវិធីចែកអាវជូនប្រជាការពារ នៅវត្តជោត្តិញ្ញារាម(ហៅវត្តគីឡូ៨)ស្ថិតក្នុងភូមិគីឡូ៨សង្កាត់សាមគ្គី ក្រុងស្ទឹងត្រែងថ្មីៗនេះ លោកស្រីវ៉ន ប៊ុនលី ជាចៅសង្កាត់លើកថា សង្កាត់សាមគ្គីមានភូមិសាស្ត្រធំប្រជាពលរដ្ឋរស់នៅដាច់ដោយដុំ ពេលកើតមានបទល្មើសសមត្ថកិច្ច ពិបាកធ្វើការបង្ក្រាបការចាប់ជន ល្មើស ក៏មិនបានទាន់ពេលវេលា ទើបអាជ្ញាធររៀបចំបង្កើត ឲ្យមានប្រជាការពារចំនួន១៣០នាក់ នៅក្នុង សង្កាត់នេះ ដើម្បីធ្វើកិច្ចសហប្រតិបត្តិការរួមគ្នា ការពារសន្តិសុខនៅក្នុងមូលដ្ឋាន។
លោកវរសេនីយ៍ត្រី ឈូក កុម៉ល់ អធិការក្រុងស្ទឹងត្រែងបានបញ្ជាក់ថា ចលនាប្រជាការពារមានតួនាទីសំខាន់ការពារសន្តិសុខនៅក្នុងភូមិ ធ្វើជាអ្នកចំរើប្រជាពលរដ្ឋ ការពារសណ្តាប់ធ្នាប់សាធារណៈនៅក្នុងមូលដ្ឋានរបស់ខ្លួន គឺជាការចូលរួមដោយស្មាកចិត្តដើម្បី ធ្វើឲ្យភូមិឃុំសង្កាត់របស់យើងមានសន្តិសុខល្អអនុវត្តបាននូវគោលនយោបាយភូមិឃុំមានសុវត្តិភាពទាំង៩ចំណុច។
លោកបន្ថែមថា ប្រជាការពារអាចពាក់សំលៀកបំពាក់ជាឯកសណ្ឋានមានលក្ខណៈមិនខុសពីកម្លាំងប្រដាប់អាវុធនោះទេ គ្រាន់តែពុំមានសិទ្ធប្រើប្រាស់អាវុធ តែបើមានរឿងរ៉ាវអ្វីកើតឡើងវិញនោះ គឺមានសិទ្ធឃាត់ខ្លួនជនសង្ស័យ ហើយរាយការណ៍ជូនមន្ត្រីប៉ូលិសប៉ុស្តិ៍រដ្ឋបាល ឬកងរាជអាវុធហត្ថជាបន្ទាន់ ដែលមាននៅជិតបំផុត។
បន្ថែមពីលើនេះ លោក ផាន់ ម៉េងឈឿន សមាជិកក្រុមព្រឹក្សាខេត្ត និងជាប្រធានក្រុមការងារចុះជួយសង្កាត់សាមគ្គី បានសំណូមពរដល់បងប្អូនប្រជាការពារទាំងអស់ ត្រូវយកចិត្តទុកដាក់ខិតខំបំពេញតួនាទីរបស់ខ្លួន ការពារសេចក្តីសុខជូនប្រជាពរដ្ឋ នៅក្នុងសង្កាត់របស់យើងឲ្យបានល្អប្រសើរ ឈានទៅរួមគ្នាលប់បំបាត់ អំពើលួច ឆក់ ប្លន់ ល្បែងស៊ីសងអំពើហិង្សា ក្នុងគ្រួសារ និងសកម្មភាពបទល្មើសផ្សេងៗទៀត។
សូមបព្ជាក់ថា នៅក្នុងសង្កាត់សាមគ្គីមានភូមិចំនួន៦ភូមិ ចំណែកកំលាំងប៉ូលិសប៉ុស្តិ៍មានគ្នាតិចទើបបង្កើត ឲ្យមានកំលាំងប្រជាការពារ បន្ថែមមានសម្លៀកបំពាក់ ឯកសណ្ឋានគ្រប់ៗគ្នា ដើម្បីជាសញ្ញាសំគាល់ពេលចុះធ្វើកិច្ចសហប្រតិបត្តិការការពារសន្តិសុខនៅក្នុងភូមិ៕
0 Comments