បាត់ដំបង ៖ គ្រាប់ផ្លោងមួយគ្រាប់ដែលគុណភាពវាអាចសម្លាប់ជីវិតមនុស្សបាន ត្រូវបានគេប្រទះឃើញកប់ក្នុងស្មៅ ស្ថិតនៅក្រោមគុម្ពសង្កែ ក្បែរផ្លូវវាងក្រុង ក្នុងភូមិព្រៃកូនសេក សង្កាត់អូរចារ ក្រុងបាត់ដំបង កាលពីថ្ងៃទី១១ ខែកុម្ភៈ ឆ្នាំ២០១៥ វេលាម៉ោង១០ព្រឹក ខណៈដែលអ្នកបើកបររថយន្តម្នាក់ដើរចុះទៅបត់ជើង។
តាមសំដីរបស់សមត្ថកិច្ចប៉ុស្តិ៍អូរចារម្នាក់បាននិយាយថា នៅព្រឹកនោះមានអ្នកបើកបររថយន្តដឹកជ្រូកម្នាក់បានមកប្រាប់ថាគេបានប្រទះឃើញគ្រាប់ផ្លោងមួយគ្រាប់យ៉ាងធំនៅក្នុងដុបសង្កែ ក្បែរផ្លូវពេលដែលគាត់ដើរចុះទៅបត់ជើង ភ្លាមៗនោះសមត្ថកិច្ចបានរាយការណ៍ទៅកម្លាំងអង្គភាពCMACដើម្បីចុះទៅត្រួតពិនិត្យ និងមានចំណាត់ការទៅតាមជំនាញ។
លោក ហេង មួយ ប្រធានក្រុមកម្ទេចគ្រឿងផ្ទុះលេខ២៦នៃមជ្ឈមណ្ឌលកំចាត់មីនទី២CMACបាត់ដំបងបានលើកឡើងថា គ្រាប់នេះជាប្រភេទគ្រាប់ផ្លោងទំហំ១០៥មិល្លីម៉ែត្រ ដោយក្បាលគ្រាប់នេះមានការបាក់មួយកំណាត់ ប៉ុន្តែទោះបីជាគ្រាប់នេះមានសភាពច្រេះស៊ី និងបាក់ក្បាលកូនជ្រូក
ក៏ដោយក៏គុណភាព និងអានុភាពវានៅមួយរយភាគរយគឺអាចសម្លាប់មនុស្សបាន ព្រោះដុំគីបខាងក្នុងមិនអាចច្រេះស៊ីបានឡើយ។
លោកបានសន្និដ្ឋានថា គ្រាប់នេះគឺអាចបន្សល់មកតាំងពីអំឡុងឆ្នាំ២០០២មកម្ល៉េះ ដោយសារតែមានការឆេះឃ្លាំងគ្រាប់នៅចំណុចអណ្ដូងចេញ ហើយធ្វើឲ្យគ្រាប់ផ្លោងជាច្រើនបានហោះប៉ើងតាមកម្លាំងនៃការរុញច្រានរបស់កម្លាំងផ្ទុះរបស់គ្រាប់ដទៃ ព្រោះក្រោយពេលផ្ទុះឃ្លាំងគ្រាប់នោះ ក្រុមការងាររបស់លោកបានដើរប្រមូលគឺមានចម្ងាយរហូតដល់៥ទៅ៦គីឡូម៉ែត្រឯណោះ។ បើគិតចម្ងាយពីកន្លែងដែលប្រទះឃើញគ្រាប់នេះទៅទល់នឹងឃ្លាំងដែលឆេះនោះគឺប្រហែលជិត៣គីឡូម៉ែត្រប៉ុណ្ណោះ ដែលជាការងាយបំផុតសម្រាប់គ្រាប់នេះហោះមក។
ជាចុងក្រោយលោកបានបន្ថែមថា គ្រាប់នេះគឺមិនអាចធ្វើការកម្ទេចនៅនឹងកន្លែងដែលប្រទះ
ឃើញនោះបានទេ ព្រោះអានុភាពវានៅខ្លាំងណាស់ ហើយលោកក៏មិនអាចយកទៅរក្សាទុកបានដែរ
គឺត្រូវនាំយកទៅកម្ទេចចោលនៅវាលបឹងត្រាវ ស្ថិតក្នុងភូមិស្នឹង ព្រោះនៅទីនោះវាអាចឃ្លាតឆ្ងាយ
ពីលំនៅដ្ឋានរបស់ប្រជាពលរដ្ឋ។ លោកបានផ្តាំផ្ញើដល់ប្រជាពលរដ្ឋទាំងអស់ថានៅពេលណាដែល
ពួកគាត់បានប្រទះឃើញគ្រាប់មីនឬគ្រាប់មិនទាន់ផ្ទុះ គឺត្រូវរាយការជាបន្ទាន់ដល់អាជ្ញាធរឬក៏អង្គភាពCMAC ដើម្បីគេចាត់កម្លាំងចុះទៅប្រមូល ឬក៏ត្រូវកម្ទេចចោល ដោយមិនអាចប៉ះពាល់បានឡើយ ដែលវាអាចបង្កឲ្យមានគ្រោះថ្នាក់ដល់ជីវិតបាន៕ សោ និយមរ័ត្ន
0 Comments