ភ្នំពេញ ៖ ក្រសួងសង្គមកិច្ចសហការជាមួយអង្គការដៃគូបានជំរុញការផលិត និងការផ្ដល់សេវាកម្មរទេះរុញជូនដល់ជនពិការឲ្យបានទាន់ពេលវេលាដើម្បីឆ្លើយតបតាមតម្រូវការនៃការប្រើប្រាស់របស់បងប្អូនជន ពិការនៅទូទាំងប្រទេសនោះ។ នេះបើយោងតាមការផ្សាយរបស់ទីភ្នាក់ងារសារព័ត៌មានកម្ពុជា។
លោក កែវ រិទ្ធី នាយកអង្គការអតីតយុទ្ធជនអន្តរជាតិកម្ពុជា (វី អាយ ស៊ី) បានថ្លែងនៅក្នុងក្នុងសិក្ខាសាលាស្ដីពីវគ្គបណ្ដុះបណ្ដាលថ្នាក់ជាតិលើសេវាកម្មរទេះរុញកម្រិតមធ្យមកាលពីថ្ងៃទី១០ ខែកុម្ភៈ ឆ្នាំ២០១៥កន្លងទៅ នៅមជ្ឈមណ្ឌលជាតិស្ដារលទ្ធភាពពលកម្មគៀនឃ្លាំងថា ការបណ្ដុះបណ្ដាលជំនាញផលិតរទេះរុញសម្រាប់ជនពិការនេះ គឺដើម្បីបង្កើតឱ្យផលិតផលរទេះរុញកាន់តែមានស្តង់ដារខ្ពស់ និងបម្រើការប្រើប្រាស់របស់ជនពិការ។ លោកបានបញ្ជាក់ថា ការផ្ដល់ជំនាញនេះ គឺដើម្បីឱ្យជនពិការមានសមត្ថភាពផលិតអាចរកប្រាក់ចំណូល និងចំណេះដឹងក្នុងការផ្ដល់សេវាកម្មឱ្យបានសមស្របទៅនឹងស្ថានភាពជាក់ស្ដែងរបស់ជនពិការ និងអាចយកជំនាញទាំងនេះមកផ្គត់ផ្គង់ជីវភាពផ្ទាល់ខ្លួនបាន។
លោកបានបន្តថា ការផលិត និងការផ្ដល់រទេះដល់ជនពិការ គឺអាចផ្ដល់បានសម្រាប់តែតម្រូវការធម្មតា ប៉ុន្តែបើការផលិតរទេះពិសេស ឬកម្រិតពិការភាពធ្ងន់ធ្ងរនោះ ត្រូវមានចំណេះដឹង ជំនាញត្រឹមត្រូវក្នុងការជួយដោះស្រាយឱ្យបានសមស្របទៅតាមពិការភាព និងធ្វើឱ្យជនពិការរស់នៅមានឯករាជ្យភាព និងសមស្របទៅតាមស្តង់ដាររទេះនោះ។
លោកបានលើកឡើងថា ការផលិតរទេះ និងចែកចាយរទេះនេះត្រូវតែមានការវាយតម្លៃអំពីគុណភាព សុវត្ថិភាពក្នុងការប្រើប្រាស់ដល់ជនពិការ ហើយប្រសិនបើការផ្ដល់រទេះនោះមិនមានការត្រួតពិនិត្យត្រឹមត្រូវ វាមិនត្រឹមតែមិនបានជួយដល់ជនពិការទេ ប៉ុន្តែថែមទាំងធ្វើឱ្យជនពិការកាន់តែពិការភាពធ្ងន់ធ្ងរថែមទៀត។
លោក កែវ បូរេន្ទ្រ អនុរដ្ឋលេខាធិការក្រសួងសង្គមកិច្ចអតីតយុទ្ធជន និងយុវនីតិសម្បទាបានមានប្រសាសន៍ថា ការបណ្ដុះបណ្ដាល និងការផ្ដល់សេវាកម្មរទេះរុញដល់ជនពិការ គឺពិតជាមានសារៈសំខាន់ណាស់ ពីព្រោះរទេះរុញគឺជាឧបករណ៍មួយជំនួយដល់ជនពិការក្នុងការផ្លាស់ប្ដូរ និងចល័តពីកន្លែងមួយទៅកន្លែងមួយទៀត ដើម្បីជួយជ្រោមជ្រែងលើកកម្ពស់ និងផ្ដល់ភាពងាយស្រួលដល់បងប្អូនជនពិការនៅទូទាំងប្រទេស។ លោកបញ្ជាក់ថា តាមរយៈវគ្គបណ្ដុះបណ្ដាលនេះនឹងអាចផ្ដល់លទ្ធភាពឱ្យជនពិការទទួលបាននូវរទេះដែលសមស្របត្រឹមត្រូវក្នុងការបង្កើនស្វ័យភាព និងចល័តភាពរបស់ជនពិការដើម្បីចូលរួមប្រកបការងារផ្សេងៗនៅក្នុងសង្គម ពិសេសអាចជួយឱ្យជនពិការរស់នៅក្នុងសង្គមមួយដោយគ្មានឧបសគ្គរារាំង និងគ្មានការរើសអើង។
សូមរំលឹកថា ចាប់តាំងពីឆ្នាំ១៩៩២ រហូតមកដល់ពេលនេះ អង្គការ( វី អាយ ស៊ី )សហការជាមួយក្រសួងសង្គមកិច្ចបានផ្ដល់រទេះរុញជាច្រើនប្រភេទជូនដល់បងប្អូនជនពិការបានចំនួនជាង៤ម៉ឺនគ្រឿង នៅក្នុងរាជធានីភ្នំពេញ ខេត្តកណ្ដាល ព្រៃវែង ស្វាយរៀង ក្រចេះ ស្ទឹងត្រែង មណ្ឌលគិរី និងខេត្តរតនគិរី៕
ឌួងវិរះជ័យ
0 Comments