ភ្នំពេញ ៖ ប្រជាពលរដ្ឋរស់នៅក្នុងសង្កាត់ឃ្មួញ ខណ្ឌសែនសុខ ប្រមាណ២.០៤២នាក់ ត្រូវបាន លោក លី សាវេត គណៈអភិបាលខណ្ឌនេះចាត់ចែងចែកអត្តសញ្ញាណប័ណ្ណសម្គាល់ខ្លួនជូនដល់ពួកគាត់ កាលពីព្រឹកថ្ងៃទី១១ ខែកុម្ភៈ ឆ្នាំ២០១៥ នៅក្នុងបរិវេណសាលាសង្កាត់ឃ្មួញ ក្រោមអធិបតីភាពលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានក្រុមការងារគណបក្សប្រជាជនចុះជួយខណ្ឌសែនសុខ។ ការចែកអត្តសញ្ញាណប័ណ្ណនេះបានធ្វើឡើងនៅក្នុងពិធីបើកវេទិកាបញ្ចេញមតិសាធារណៈដើម្បីភូមិ/សង្កាត់មានសុវត្ថិភាព ជាគោលការណ៍របស់រាជរដ្ឋាភិបាល។
លោក ម៉ក់ ហុង អធិការនគរបាលខណ្ឌសែនសុខបានមានប្រសាសន៍ថា នៅក្នុងមូលដ្ឋានសង្កាត់ឃ្មួញ មានប្រជាជនរស់នៅចំនួន៤២៦គ្រួសារ ក្នុងនោះបានចែកអត្តសញ្ញាណជូនពួកគាត់ចំនួន៦លើកមកហើយ ស្មើនិងចំនួន៥.៦៨៣នាក់ ហើយនឹងចែកជូននៅពេលនេះចំនួន
២.០៤២នាក់បន្ថែមទៀត។
តាមប្រសាសន៍របស់លោកអធិការបានឲ្យដឹងថា ពេលនេះដោយមានការយកចិត្តទុកដាក់ពី លោកស្នងការ និងលោក លោក លី សាវេត អភិបាលខណ្ឌសែនសុខបានផ្តល់ថវិកាឧបត្ថម្ភចំនួន៧លានរៀលដល់កម្លាំងនគរបាលយើងចុះធ្វើសៀវភៅស្នាក់នៅជូនប្រជាជននៅតាមមូលដ្ឋានភូមិ/ សង្កាត់តែម្តង ដើម្បីសម្រួលដល់ភាពងាយស្រួលជូនប្រជាពលរដ្ឋ៕
សឿន
0 Comments