បន្ទាយមានជ័យ ៖ ផ្ទះមួយខ្នងធ្វើអំពីឈើប្រក់ស័ង្កសី ត្រូវបានអគ្គីសភ័យលេបត្របាក់មួយប៉ប្រិចភ្នែកអស់ទាំងស្រុង ខណៈពេលម្ចាស់បានងើបដាំបាយយកទៅវត្តនៅថ្ងៃសីល។ ភ្លើងឆេះផ្ទះនេះកើតឡើងកាលពីវេលាម៉ោង៧និង៣០នាទីព្រឹក ថ្ងៃទី១១ ខែកុម្ភៈ ឆ្នាំ២០១៥ ស្ថិតនៅភូមិតាអ៊ិនពីរ ឃុំស្រះរាំង ស្រុកមង្គលបូរី ខេត្តបន្ទាយមានជ័យ។ លោកវរសេនីយ៍ទោ ស៊ី ឌី អធិការនគរបាលស្រុកមង្គលបូរីបានឲ្យដឹងថា ម្ចាស់ផ្ទះដែលត្រូវអគ្គីភ័យឆាបឆេះមានឈ្មោះ សួង ទី ភេទប្រុស អាយុ៧៧ឆ្នាំ និងប្រពន្ធឈ្មោះ ហួត ឡាំង អាយុ៧៤ឆ្នាំ រស់នៅភូមិកើតហេតុខាងលើ។
តាមសំដីម្ចាស់ផ្ទះបានប្រាប់ថា មុនពេលអគ្គីភ័យលេបត្របាក់ផ្ទះអស់ទាំងស្រុង គឺគ្រួសាររបស់គាត់បានងើបដាំបាយធ្វើម្ហូបទៅវត្ត ព្រោះថាថ្ងៃសីល ប៉ុន្តែក្រោយពេលដែលធ្វើហើយស្មានថាភ្លើងចង្ក្រានដែលដុតអុសត្រូវបានរលត់អស់មិនបានចាប់អារម្មណ៍ទើបទៅវត្តទាំងអស់គ្នា។ លុះវេលាម៉ោង៧និង៣០នាទី ក៏ស្រាប់អ្នកជិតខាងបានប្រាប់ថាអគ្គីភ័យបាននិងកំពុងឆាបឆេះផ្ទះរបស់ខ្លួន ហើយពេលនោះគាត់ទន់ជង្គង់ដើរទៅមុខលែងរួច ត្រូវបានអ្នកក្បែរគ្រាព្រោះស្លន់ស្លោពេក។
មកដល់ឃើញផ្ទះត្រូវអគ្គីភ័យកំពុងឆាប់ឆេះត្រូវបានអ្នកជិតខាងជួយពន្លត់ ដោយខ្លះយកទឹកជះ តែភ្លើងនៅតែខ្លាំងឆេះរហូតអស់ស្ទើរទាំងស្រុងប្រមាណ៧០ភាគរយ។ ម្ចាស់ផ្ទះបានប្រាប់ថា ផ្ទះដែលត្រូវអគ្គីភ័យលេបត្របាក់នេះគឺ ផ្ទះឈើប្រក់ស័ង្កសី និងជញ្ជាំងស័ង្កសីមួយចំហៀង និងជញ្ជាំងប្រក់ស្លឹកមួយចំហៀងដែលមានបណ្តោយ៩ម៉ែត្រនិងទទឹង៨ម៉ែត្រ ឆេះម៉ូតូ១គ្រឿងធុនហុងដាសេរីឆ្នាំ២០០៧ និងលុយបាតថៃ១២ម៉ឺនបាត ខ្សែករមាស៦ជី ខ្សែដៃ៥ជី ចិញ្ចៀនមាស៥ជី ខ្សែកផ្លាក់ទីន៣ជី ក្រវិល២ជី និងសម្ភារៈឆេះអស់ទាំងស្រុង បើគិតជាទឹកប្រាក់អស់រាប់ម៉ឺនដុល្លារឯណោះ៕
គង្គា
0 Comments