ភ្នំពេញ ៖ ជនសង្ស័យម្នាក់ក្នុងចំណោមបក្ខពួក២នាក់ ត្រូវបានសមត្ថកិច្ចប៉ូលិសប៉ុស្តិ៍រដ្ឋបាល ទឹកល្អក់ទី៣ ខណ្ឌទួលគោកធ្វើការឃាត់ខ្លួន ក្នុងខណៈពេលដែលជនសង្ស័យម្នាក់នេះរួមជាមួយបក្ខពួកសកម្មភាពឆក់កាបូបតាមផ្លូវ ហើយត្រូវកូនជនរងគ្រោះជិះម៉ូតូដេញតាម និងបានស្រែកចោរៗ ទើបត្រូវប៉ូលិសស្ទាក់ចាប់បានតែម្តង ចំណែកបក្ខពួកម្នាក់ទៀតបានរត់គេចខ្លួនបាត់។
អំពើឆក់កាបូបខាងលើបានកើតមានឡើងកាលពីវេលាម៉ោង៧និង៤០នាទីយប់ ថ្ងៃទី១១ ខែកុម្ភៈ ឆ្នាំ២០១៥ ស្ថិតនៅចំណុចភ្លើងស្ដុបម៉ុងឌីយ៉ាល់ ផ្លូវម៉ៅសេទុង កែងផ្លូវលេខ២៣០ ក្រុមទី០១ ភូមិ០១ សង្កាត់ទឹកល្អក់ទី០៣ ខណ្ឌទួលគោក។
ជនសង្ស័យម្នាក់នេះត្រូវបានប៉ូលិសប្រាប់ឲ្យស្គាល់ឈ្មោះ សំណង់ ពិន ហៅតឿ ហៅវ៉ា អាយុ២១ឆ្នាំ មុខរបរមិនពិតប្រាកដ ស្នាក់នៅស្តង់ផ្លែឈើផ្សារនាគមាស សង្កាត់ផ្សារដើមគ ខណ្ឌទួលគោក ជាមុខសញ្ញាឆក់យ៉ាងសកម្មក្នុងរាជធានីភ្នំពេញ។ ចំណែកជនរងគ្រោះត្រូវបានគេស្គាល់ឈ្មោះ ជួន ណាវី ភេទស្រី អាយុ៤៦ឆ្នាំ មុខរបរលក់បន្លែនៅផ្សារដើមគរ ស្នាក់នៅផ្ទះជួល ផ្លូវលេខ២៧០ សង្កាត់បឹងសាឡាង ខណ្ឌទួលគោក។
មន្ត្រីនគរបាលប៉ូលិសខណ្ឌទួលគោកបានបញ្ជាក់ឲ្យដឹងថា នៅមុនពេលកើតហេតុ ស្ត្រីរងគ្រោះបានជិះម៉ូតូជាមួយកូនប្រុសចេញពីផ្សារដើមគរ លុះដល់ចំណុចកើតហេតុបានឈប់ម៉ូតូដើម្បីទិញសាច់កាប់ ពេលនោះក៏ស្រាប់តែមានជនសង្ស័យទាំងពីរនាក់ជិះម៉ូតូម៉ាកស៊ុយស៊ូគីនិក ពណ៌ខ្មៅ គ្មានស្លាកលេខមួយគ្រឿង ធ្វើដំណើរតាមផ្លូវលេខ២៣០ ក្នុងទិសដៅពីកើតទៅលិច បានធ្វើសកម្មភាពឆក់យកកាបូបពីជនរងគ្រោះ រួចបើកម៉ូតូគេចខ្លួន។ ភ្លាមៗនោះកូនប្រុសរបស់ស្ត្រីរងគ្រោះ បានជិះម៉ូតូដេញតាមពីក្រោយ ដោយស្រែកថា ចោរៗ ពេលជិះទៅដល់មុខផ្សារឃ្លាំងរំសេវ ក៏ត្រូវនគរបាលល្បាតរបស់ប៉ុស្តិ៍ផ្សារដើមគរចេញមកជួយអន្តរាគមន៍ចាប់បានជនសង្ស័យម្នាក់ ព្រមទាំងវត្ថុតាងជាច្រើនផងដែរ។ ចំណែកបក្ខពួកម្នាក់ទៀតបានរត់គេចខ្លួនបាត់។
សមត្ថកិច្ចក្រោយការឃាត់ខ្លួនបានដកហូតវត្ថុតាងពីជនសង្ស័យក្នុងនោះរួមមាន កាបូបរបស់ជនរងគ្រោះ ដែលមានលុយ២០ម៉ឺនរៀល ម៉ូតូជិះធ្វើសកម្មភាព ទូរស័ព្ទដៃចំនួន៩គ្រឿង និង ដាវកែច្នៃមួយដើមផងដែរ។
បច្ចុប្បន្នជនសង្ស័យរូបនេះ ត្រូវបានឃុំខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីកសាងសំណុំរឿងបញ្ជូនទៅកាន់តុលាការចាត់ការតាមផ្លូវច្បាប់៕
ស្រីរ័ត្ន
0 Comments