ភ្នំពេញ ៖ លោក ទេព ងន អនុប្រធានទី២ព្រឹទ្ធសភាបានចាត់ទុកថាថ្នាំជក់ជាមូលហេតុចម្បងដែលនាំឲ្យកើតជំងឺជាច្រើនដូចជា ជំងឺហើមសួត ជំងឺបេះដូង ជំងឺដាច់សរសៃឈាមខួរក្បាល ជំងឺពុកធ្មេញ ជាពិសេសជំងឺមហារីក។
នៅក្នុងសិក្ខាសាលាស្តីអំពីការវិវឌ្ឍនៃការអនុវត្តអនុសញ្ញាស្ដីពីការត្រួតពិនិត្យថ្នាំជក់ នៅព្រឹកថ្ងៃទី១២ ខែកុម្ភៈ ឆ្នាំ២០១៥នេះ នៅវិមានព្រឹទ្ធសភាលោក ទេព ងន បានបញ្ជាក់ថា ជារៀងរាល់ឆ្នាំ ថ្នាំជក់បានសម្លាប់មនុស្សប្រមាណ៦លាននាក់នៅលើពិភពលោក ដោយឡែកនៅកម្ពុជាស្ត្រី៧៥ភាគរយ និងកុមារ៨០ភាគរយកំពុងស្រូបផ្សែងបារីពីគេនៅតាមផ្ទះ ហើយប្រជាជនកម្ពុជាជិត៩០ភាគរយកំពុងស្រូបផ្សែងបារីពីគេនៅតាមភោជនីយដ្ឋាន កន្លែងទទួលទានអាហារ ភេសជ្ជះ និងជិត៦០ភាគរយនៅពេលធ្វើដំណើរតាមមធ្យោបាយសាធារណៈ និងជិត៥០ភាគរយនៅកន្លែងធ្វើការ និងធ្វើឲ្យប្រជាពលរដ្ឋកម្ពុជាប្រមាណជាង១ម៉ឺននាក់ស្លាប់ជារៀងរាល់ឆ្នាំ ហើយភាគច្រើននៃអ្នកស្លាប់ទាំងនោះ គឺស្ថិតនៅក្នុងវ័យកំពុងពេញកម្លាំងពលកម្មក្នុងការអភិវឌ្ឍន៍សង្គមជាតិ។
លោកបានបន្តថា ក្រៅពីបាត់បង់ជីវិតនៅមានទឹកប្រាក់ប្រមាណជា១០០លានដុល្លារអាមេរិកទៀតត្រូវបានខាតបង់ដោយសារការប្រើប្រាស់សម្រាប់ទិញបារីជក់ក្នុងមួយឆ្នាំៗនៅកម្ពុជា។ រីឯការចំណាយទៅលើការព្យាបាលជំងឺដែលបង្កឡើងដោយការជក់បារីវិញ មានទំហំធំជាងប្រាក់ដែលចំណាយទៅលើការទិញបារីនេះកាន់តែច្រើនថែមទៀត។ លោកអនុប្រធានទី២ព្រឹទ្ធសភា ក្នុងនាមជារដ្ឋភាគីដែលបានផ្តល់សច្ចាប័នចូលជាសមាជិកនៃអនុសញ្ញាស្ដីពីការត្រួតពិនិត្យថ្នាំជក់ កាលពីថ្ងៃទី១៥ ខែវិច្ឆិកា ឆ្នាំ២០០៥កន្លងមកនេះ ព្រះរាជាណាចក្រកម្ពុជាត្រូវមានកាតព្វកិច្ចអនុវត្តតាមវិធានការនានាដែលបានលើកឡើងក្នុងអនុសញ្ញាដើម្បីកាត់បន្ថយការប្រើប្រាស់ថ្នាំជក់។ ក្នុងនោះអនុសញ្ញាស្ដីពីការត្រួតពិនិត្យថ្នាំជក់របស់អង្គការសុខភាពពិភពលោកតម្រូវឲ្យរដ្ឋភាគីបង្កើតច្បាប់ ឬលិខិតបទដ្ឋានគតិយុត្តិប្រកបដោយប្រសិទ្ធភាព ដើម្បីការពារប្រជាពលរដ្ឋអាចបង្ការបន្ថយការប្រើប្រាស់ថ្នាំជក់ ការញៀនជាតិនីកូទីន និងការរងផ្សែងថ្នាំជក់។
លោកស្រី Pamela coffrey តំណាងអង្គការ campaign for Tobacco Free Kids ដែលជាអង្គការជំនាញធ្វើការសិក្សាលើផលិតផលថ្នាំជក់(បារី)បានលើកឡើងថា ក្រៅតែពីបណ្ដាលឲ្យមនុស្សស្លាប់ជាច្រើននាក់ បារីក៏បានបណ្ដាលឲ្យមានបន្ទុកផ្នែកសុខភាពធ្ងន់ធ្ងរ។ ការជំរិតយកប្រាក់ពីគ្រួសារចំណាយទៅលើថ្នាំជក់ច្រើនជាជាងយកទៅចំណាយទៅលើអាហារ និងការសិក្សាអប់រំទៅទៀត។
គួរបញ្ជាក់ថា កម្ពុជាមានអនុក្រឹត្យសម្រាប់ជាវិធានការចំនួន២ក្នុងការទប់ស្កាត់ផលិតផលថ្នាំជក់ ទី១-គឺ វិធានការហាមឃាត់ចំពោះការផ្សាយពាណិជ្ជកម្ម ផលិតផលបារី និងអនុក្រឹត្យ ស្តីអំពីការបោះពុម្ពសារព្រមានសុខភាពលើកញ្ចប់បារី និងសារាចរលេខ០០៣ស.ន.ក ស្តីអំពីវិធាន ការហាមជក់ និងការបង្ហុយផ្សែងផលិតផលថ្នាំជក់នៅកន្លែងធ្វើការ និងទីសាធារណៈ ប្រយោជន៍ដើម្បី ជាវិធានការត្រួតពិនិត្យផលិតផលថ្នាំថ្នាំជក់ កាត់បន្ថយផលប៉ះពាល់សុខភាព សេដ្ឋកិច្ច សង្គម និងបរិស្ថាន៕
សុងយោ
0 Comments