កោះកុង ៖ ក្រោមការចង្អុលបង្ហាញ និងបញ្ជាផ្ទាល់ពីលោក ប៊ូ ប៊ុនហាង ព្រះរាជអាជ្ញាអមសាលាដំបូងខេត្តកោះកុង កម្លាំងកងរាជអាវុធហត្ថក្រុងខេមរភូមិន្ទបានធ្វើការវាយឆ្មក់បំបែកសំបុកគ្រឿងញៀន៣កន្លែងផ្សេងគ្នា កាលពីវេលាម៉ោង៥និង០០នាទីល្ងាច នាថ្ងៃទី១០ ខែកុម្ភៈ ឆ្នាំ២០១៥ នៅចំណុចសង្កាត់ស្ទឹងវែង សង្កាត់ដងទង់ និងសង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។
បើតាមការឲ្យដឹងពីលោកវរសេនីយ៍ត្រី នួន វុត្ថា មេបញ្ជាការកងរាជអាវុធហត្ថក្រុងខេមរភូមិន្ទ បានឲ្យដឹងថា ក្រោមការពួនវាយឆ្មក់អស់រយៈពេល១ថ្ងៃ ២យប់ និងមានការសហការពីលោកព្រះរាជអាជ្ញាផងនោះ កម្លាំងកងរាជអាវុធហត្ថក្រុងក៏បានឃាត់ខ្លួន កំណត់បាននូវមុខសញ្ញាជួញដូរ និង រក្សាទុកនូវសារធាតុញៀនចំនួន៣នាក់ ដោយទី១ឈ្មោះ ឈុន កក្កដា ភេទប្រុស អាយុ២៣ឆ្នាំ ទីលំនៅបច្ចុប្បន្នភូមិស្ទឹងវែង សង្កាត់ស្ទឹងវែង ក្រុងខេមរភូមិន្ទ ខេត្តកោះកុង ទី២-ឈ្មោះ ឆាយ សុខ ភេទប្រុស អាយុ៥៨ឆ្នាំ មានទីលំនៅភូមិស្ទឹងវែង សង្កាត់ស្ទឹងវែង ក្រុងខេមរភូមិន្ទ ខេត្តកោះកុង និងទី៣-ឈ្មោះ ម៉ី សុវណ្ណារិទ្ធ ភេទប្រុស អាយុ២៨ឆ្នាំ មានទីលំនៅបច្ចុប្បន្នភូមិ៣ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។
លោកបានឲ្យដឹងបន្ថែមទៀតថា ក្នុងការឃាត់ខ្លួនជនសង្ស័យទាំង៣នាក់ កម្លាំងអាវុធហត្ថ
ដកហូតបាននូវវត្ថុតាងរួមមាន យ៉ាម៉ាពណ៌ផ្កាឈូកចំនួន១៩គ្រាប់ ក្លែងក្លាយ៥គ្រាប់ ម៉ាទឹកកក១កញ្ចប់តូច ម៉ូតូ២គ្រឿង ទូរស័ព្ទដៃ៥គ្រឿង កាំបិត១ដើម និងវត្ថុតាងមួយចំនួនទៀត។
បច្ចុប្បន្ន ជនសង្ស័យទាំង៣នាក់ត្រូវបានកម្លាំងកងរាជអាវុធហត្ថក្រុងខេមរភូមិន្ទកសាងសំណុំរឿងដើម្បីបញ្ជូនខ្លួនទៅតុលាការចាត់ការបន្តតាមនីតិវិធីច្បាប់៕
លីម ហួរ
0 Comments