ប៉ៃលិន ៖ បុរសម្នាក់ដែលគេស្គាល់ថាជាអ្នកបកប្រែឱ្យក្រុមហ៊ុនវៀតណាម បានស្រវឹងស្រាជោកជាំជិះម៉ូតូឌុបគ្នាក្នុងល្បឿនលឿន លុះដល់ចំណុចផ្លូវកោងកាច់ចង្កូតមិនទាន់ បណ្ដាលឱ្យដួលបោកក្បាលទៅនឹងថ្នល់ស្លាប់អ្នកបើកបរម្នាក់ពេលបញ្ជូនមកសង្គ្រោះនៅមន្ទីរពេទ្យបង្អែកខេត្ត ដោយសាររបួសធ្ងន់ ,ចំណែកឯបុរសម្នាក់ទៀតដែលជិះពីក្រោយរងរបួសស្រាល។ ហេតុការណ៍គ្រោះថ្នាក់នេះ បានកើតឡើងកាលពីវេលាម៉ោង៤និង៣៥នាទីរសៀល ថ្ងៃទី១១ ខែកុម្ភៈ ឆ្នាំ២០១៥ នៅចំណុចផ្លូវលំមួយខ្សែ ក្នុងភូមិចំការកាហ្វេ សង្កាត់ទូលល្វា ក្រុងប៉ៃលិន ខេត្តប៉ៃលិន។
តាមប្រភពពីសាច់ញាតិបានឲ្យអ្នកយកព័ត៌មានដឹងថា បុរសរងគ្រោះដែលបាត់បង់ជីវិតមានឈ្មោះ សាផន ចិត្រា ហៅបារាំង ភេទប្រុស អាយុ៣៥ឆ្នាំ ជាអ្នកបកប្រែភាសាឲ្យក្រុមហ៊ុនវៀតណាម មានស្រុកកំណើតភូមិកំប៉ោ ឃុំពង្រ ស្រុកពង្រ ខេត្តស្វាយរៀង ,បច្ចុប្បន្នរស់នៅជាមួយក្រុមហ៊ុនវៀតណាម ក្នុងភូមិបរតាំងស៊ូ សង្កាត់បរយ៉ាខា ក្រុងប៉ៃលិន ខេត្តប៉ៃលិន ជិះម៉ូតូម៉ាកសង់កូរ៉េពណ៌ខៀវ អត់ស្លាកលេខ រងការខូចខាតយ៉ាងដំណំ។ ចំណែកម្នាក់ទៀតរងរបួសស្រាលឈ្មោះ ឯក សាត ភេទប្រុស អាយុ៣០ឆ្នាំ ជាកម្មករ (អ្នកជិះពីក្រោយ) រស់នៅភូមិសួនអំពៅលិច សង្កាត់ប៉ៃលិន ក្រុងប៉ៃលិន ខេត្តប៉ៃលិន។
ប្រភពពីកន្លែងកើតហេតុបានឲ្យដឹងថា គេឃើញបុរស០២នាក់ជិះម៉ូតូមួយគ្រឿងចេញពីហាងផឹកស៊ី ក្នុងស្ថានភាពស្រវឹងជោកជាំ រេចង្កូតពេញផ្លូវ លុះដល់ចំណុចផ្លូវកោង ទប់ចង្កូតមិនជាប់ក៏ដួលតែម្តង។ ប្រភពបន្តថា ជនរងគ្រោះទាំង២នាក់ជិះម៉ូតូក្នុងល្បឿនលឿន ហើយអត់ពាក់មួកសុវត្ថិភាពទៀត ទើបបណ្ដាលឱ្យដួលបោកក្បាលស្លាប់បាត់បង់ជីវិត៕
សេង សុវណ្ណារិទ្ធ
0 Comments